Telangana | విద్యుత్ ఉత్పత్తిని పెంచకపోతే భవిష్యత్తులో ఇబ్బందులు : డిప్యూటీ సీఎం భట్టి

సోలార్‌ పవర్‌ రేట్లు నిరంతరం తగ్గుతూ వస్తున్నాయని, ఈ పరిస్థితుల్లో గ్రీన్‌ ఎనర్జీ స్టోరేజికి తెలంగాణ భౌగోళికంగా అనుకూలమని డిప్యూటీ సీఎం భట్టి విక్రమార్క తెలిపారు. గత పదేళ్లు గా గ్రీన్‌ ఎనర్జీ రంగంలో రాష్ట్రానికి మంచి అవకాశాలు ఉన్నప్పటికీ, గత ప్రభుత్వం సరైన ప్రణాళికతో ముందుకు వెళ్లలేదని విమర్శించారు.

విధాత, హైదరాబాద్ :

సోలార్‌ పవర్‌ రేట్లు నిరంతరం తగ్గుతూ వస్తున్నాయని, ఈ పరిస్థితుల్లో గ్రీన్‌ ఎనర్జీ స్టోరేజికి తెలంగాణ భౌగోళికంగా అనుకూలమని డిప్యూటీ సీఎం భట్టి విక్రమార్క తెలిపారు. గత పదేళ్లు గా గ్రీన్‌ ఎనర్జీ రంగంలో రాష్ట్రానికి మంచి అవకాశాలు ఉన్నప్పటికీ, గత ప్రభుత్వం సరైన ప్రణాళికతో ముందుకు వెళ్లలేదని విమర్శించారు. ఏపీ మాత్రం ఈ దిశలో ముందడుగు వేసిందని, కానీ తెలంగాణలో అటువంటి ప్రయత్నాలు జరగలేదని ఆరోపించారు. శనివారం ప్రజా భవన్‌లో విద్యుత్ శాఖ ఉన్నతాధికారులతో నిర్వహించిన సమావేశంలో భట్టి ప్రజెంటేషన్ ద్వారా విద్యుత్ శాఖకు సంబంధించిన వివరాలను వెల్లడించారు.

తాము అధికారంలోకి వచ్చిన తర్వాత సంబంధిత నివేదికలను తెప్పించి స్టడీ చేసినట్లు డిప్యూటీ సీఎం తెలిపారు. రాష్ట్రంలో గ్రీన్‌ ఎనర్జీ స్టోరేజీ ఏర్పాటుకు కాంగ్రెస్ ప్రభుత్వం వ్యూహాత్మకంగా ముందుకు వెళుతుందని చెప్పారు. మూసీ ప్రక్షాళన, ఫ్యూచర్‌ సిటీ అభివృద్ధి, పెట్టుబడుల ఒప్పందాలు, డేటా సెంటర్ల ఏర్పాటు.. ఇవన్నీ కలిసి హైదరాబాద్‌ను త్వరలో గ్లోబల్‌ హబ్‌గా మార్చనున్నాయని డిప్యూటీ సీఎం భట్టి విక్రమార్క అన్నారు. డేటా సెంటర్లకు భారీగా విద్యుత్‌ అవసరమవుతుందని, అందులో కనీసం 50 శాతం గ్రీన్‌ ఎనర్జీ వినియోగించడం తప్పనిసరి పరిస్థితిగా మారిందన్నారు.

అయితే గతంలో ఎనర్జీ స్టోరేజీ వ్యవస్థలపై ఎలాంటి చర్యలు తీసుకోకపోవడంతో సోలార్‌, థర్మల్‌, విండ్‌ పవర్‌ నిల్వ సామర్థ్యంలో రాష్ట్రం వెనకబడి ఉందని పేర్కొన్నారు. భవిష్యత్తులో విద్యుత్‌ డిమాండ్‌ పెరుగుతుందని, ఉత్పత్తిని పెంచుకోకపోతే ఇబ్బందులు తప్పవని ఆయన హెచ్చరించారు. 2027–28 వరకు థర్మల్‌ పవర్‌లో ఎలాంటి సమస్యలు లేవని, అయితే 2029–30 నాటికి వెయ్యి మెగావాట్ల లోటులోకి వెళ్లే అవకాశం ఉందని స్పష్టం చేశారు. రాష్ట్ర అవసరాలను దృష్టిలో ఉంచుకుని గ్రీన్‌ ఎనర్జీ, విద్యుత్‌ స్టోరేజీ రంగాల్లో ప్రభుత్వం వేగంగా చర్యలు తీసుకుంటుందని భట్టి విక్రమార్క వెల్లడించారు.