KTR Vs Jaggareddy| కేటీఆర్ పై జగ్గారెడ్డి సెటైర్లు

సీఎం రేవంత్ రెడ్డి ప్రభుత్వంపై కేటీఆర్ చేసిన విమర్శలకు జగ్గారెడ్డి కౌంటర్ ఇచ్చారు. రేవంత్ రెడ్డి సీఎం అయి 18 నెలలు అయ్యిందని...కేసీఆర్ కుటుంబం పదేళ్ల అధికారంలో ఉండి సాధించలేని ఎన్నో పనులు చేస్తున్నారన్నారు.

KTR Vs Jaggareddy|

విధాత, హైదరాబాద్ : మాజీ సీఎం కేసీఆర్ పాలనా వైఫల్యాలే ఆయన ఫ్యామిలీని తిట్టడానికి కారణాలని టీపీసీసీ వర్కింగ్ ప్రెసిడెంట్ జగ్గారెడ్డి స్పష్టం చేశారు. పదేళ్లలో వారు ఇచ్చిన హామీలు నెరవేర్చలేనందున అందుకే ప్రజలు వారిని తిట్టుకుని గద్దె దించారన్నారు. సీఎం రేవంత్ రెడ్డి ప్రభుత్వంపై కేటీఆర్ చేసిన విమర్శలకు జగ్గారెడ్డి కౌంటర్ ఇచ్చారు. రేవంత్ రెడ్డి సీఎం అయి 18 నెలలు అయ్యిందని…కేసీఆర్ కుటుంబం పదేళ్ల అధికారంలో ఉండి సాధించలేని ఎన్నో పనులు చేస్తున్నారన్నారు.

మీరు పదేళ్లు అధికారంలో ఉండి లక్ష రుణ మాఫీ చేస్తామని..నాలుగు కిస్తీల్లో వడ్డీతో ముంచారన్నారు. మైనార్టీలకు రిజర్వేషన్ ఇవ్వలేదని.. ఇంటికో ఉద్యోగం చూపించలేదని విమర్శించారు. డబుల్ బెడ్ రూమ్స్ ఇవ్వలేదని అందుకే ప్రజలు, మేం తిట్టామన్నారు. మీ పాలనలో కోమటిరెడ్డి, సంపత్‌ల ఎమ్మెల్యే సభ్యత్వాలను రద్దు చేశారని..ఇలాంటి పాలన చూసిన ప్రజలు తిట్టకపోతే ఎలా? అని ప్రశ్నించారు. మల్లన్నసాగర్ రైతులకు లాఠీ దెబ్బల పాలన చూపించి వీపులు పగిలిపోయేలా కొట్టారని..రైతులను వణికించిన మీ నీచమైన పాలనను ప్రజలు తిట్టుకున్నారన్నారు. సీఎం రేవంత్ రెడ్డి కాంగ్రెస్ అగ్రనేత రాహుల్ గాంధీ నాయకత్వంలో పనిచేస్తున్నారని చెప్పారు.

తాము ఇచ్చిన హామీలను క్రమంగా ఒక్కోటి అమలు చేసుకుంటు వెళ్తున్నారని జగ్గారెడ్డి పేర్కొన్నారు. మేం ఉచిత బస్సు ప్రయాణం మొదలుపెట్టామని.. సిద్ధిపేట, గజ్వేల్, సిరిసిల్ల మహిళలను అడిగితే వారు ఎన్ని సార్లు బస్సులో తిరిగారో చెబుతారన్నారు. సిరిసిల్లలో చర్చ పెడితే ఎవరు ఇచ్చిన హామీలు నెరవేర్చారో తేలుతుందన్నారు. రైతులకు 2లక్షల రుణమాఫీ చేశామని..రైతు భరోసా ఇస్తున్నామని..సబ్సీడీ పథకాలు అందిస్తున్నామని తెలిపారు. ఒకటో తేదీన జీతాలు, పెన్షన్లు టైమ్ కి ఇస్తున్నామని గుర్తు చేశారు.

కేటీఆర్ మాటలు వింటే జాలీ వేస్తుందని..విదేశాల్లో చదివి వచ్చి, నోటికి అదుపు లేకుండా మాట్లాడటం సిగ్గుచేటుగా ఉందన్నారు. స్క్రిప్ట్ రాయిస్తున్న వాడు సరిగ్గా రాయడం లేనట్లుందని ఎద్దేవా చేశారు. కేటీఆర్ నీకు చీము నెత్తురా లేదా? ఈ పద్ధతి ఎక్కడదయ్యా? ప్రజలు వినిపించుకునే మాటలు సీఎం రేవంత్ మాటలు అని..నీ మాటలు కావని స్పష్టం చేశారు. అధికారం పోయి ప్రస్టేషన్ లో ఉండి నీవు చేస్తున్న విమర్శలను మేము అర్థం చేసుకుంటామని..విమర్శలు హుందాగా లేకపోతే అదే తీరులో బదులిస్తామని జగ్గారెడ్డి స్పష్టం చేశారు.