Cyclone Ditvah | దూసుకొస్తున్న ‘దిత్వా’ తుపాను – ఆంధ్రాపై తీవ్ర ప్రభావం

దిత్వా తుఫాన్ శ్రీలంక తీరం దాటి  తమిళనాడు–పుదుచ్చేరి–దక్షిణ ఏపీ వైపు దూసుకొస్తోంది. రేపు ఉదయం తీరం దాటే అవకాశం. 8 ఆంధ్ర జిల్లాలకు భారీ వర్షాలు, తెలంగాణలో మోస్తరు వర్షాలు. ప్రజలకు అత్యవసర హెచ్చరికలు జారీ చేసిన ఐఎండీ

Cyclone Ditvah Intensifies in Bay of Bengal — Storm Impact on AP & Telangana Explained

(విధాత వాతావరణం​ డెస్క్​)

అమరావతి / హైదరాబాద్​:

Cyclone Ditvah | దిత్వా తుఫాను ప్రస్తుతం నైరుతి బంగాళాఖాతంలో  కేంద్రీకృతమై శ్రీలంక తీరం మీదుగా తమిళనాడుపైకి దూసుకొస్తోంది. ఈ తుఫాన్ ఇప్పటికే శ్రీలంకలో బీభత్సాన్ని సృష్టించి 150 మందికి పైగా ప్రజలు ప్రాణాలు కోల్పోవడానికి కారణమైంది.  పదివేలకుపైగా ఇళ్లు నేలమట్టం అయి, లక్షల్లో ప్రజలు అత్యవసర శిబిరాలకు తరలి వెళ్లాల్సిన పరిస్థితి ఏర్పడిన సంగతి తెలిసిందే. తీర ప్రాంతాలు పూర్తిగా మునిగిపోయి, రోడ్లు, రైలు మార్గాలు, విద్యుత్ సేవలు దాదాపు స్థంభించిపోయాయి. ఇదే తుపాను మేఘం ఇప్పుడు భారత వైపు గంట గంటకూ వేగంగా దూసుకొస్తోంది. ప్రస్తుతం ఈ వ్యవస్థ కారైకాల్‌కు 150 కి.మీ, పుదుచ్చేరికి 250 కి.మీ, చెన్నైకి 350 కి.మీ దూరంలో కేంద్రీకృతమై, రేపు తెల్లవారుజామునే భారత తీరం తాకే అవకాశాలు 90% కంటే ఎక్కువగా ఉన్నట్లు భారత వాతావరణ శాఖ(IMD) హెచ్చరించింది.

తుఫాను కదలిక ఉదయం నుంచి స్థిరంగా ఉత్తర–ఉత్తర పశ్చిమ దిశలో సాగుతుండగా, 70–80 కి.మీ వేగంతో గాలులు ఇప్పటికే తమిళనాడు సమీప సముద్రంలో నమోదవుతున్నాయి. గాలుల వేగం 90 కి.మీ వరకు పెరిగే ప్రమాదం ఉన్నందున తీర ప్రాంత ప్రజలు అత్యవసర జాగ్రత్తలు తీసుకోవాలని ప్రభుత్వం హెచ్చరించింది. సముద్రంలో అలలు సుమారు 8 మీటర్ల ఎత్తుకు ఎగిసే అవకాశం ఉండటంతో మత్స్యకారుల వేట పూర్తిగా నిషేధించారు. చెట్ల క్రింద నిలబడటం, తీరం సమీపంలో ప్రయాణం, పిడుగులు పడే పరిస్థితుల్లో బహిరంగప్రాంతాల్లో గుమిగూడటం వంటి చర్యలు ప్రమాదకరమని వాతావరణ శాఖ వరుసగా సూచనలు జారీ చేస్తోంది.

Cyclone Ditwah LIVE tracking: దిత్వా తుపాను కదలికలను లైవ్​గా ఇక్కడ చూడండి

ఆంధ్రప్రదేశ్​లో 8 జిల్లాలకు హెచ్చరిక

ఈ నేపథ్యంలో ఆంధ్రప్రదేశ్ ప్రభుత్వం కూడా  హై అలర్ట్ ప్రకటించింది. ముఖ్యంగా చిత్తూరు, తిరుపతి, అన్నమయ్య, నెల్లూరు, కడప, ప్రకాశం జిల్లాల్లో రాబోయే 24–48 గంటల్లో అత్యంత భారీ వర్షాలు కురిసే అవకాశం ఉన్నందున పరిస్థితి ఆందోళనకరంగా మారేట్టుఉందని అధికారులు అంచనా వేస్తున్నారు. నదుల నీటి మట్టం ఒక్కసారిగా పెరగడం, లోతట్టు ప్రాంతాలు నీటిలో మునిగిపోవడం, రహదారులు కొట్టుకుపోవడం వంటి ఘటనలు ఊహిస్తున్నారు. కృష్ణా, ఎన్టీఆర్, గుంటూరు, బాపట్ల, పల్నాడు, అనంతపురం, నంద్యాల, కర్నూలు, సత్యసాయి జిల్లాల్లో కూడా భారీ ఉరుములు, మెరుపులు, ఈదురుగాలులతో వర్షపాతం నమోదయ్యే అవకాశం ఉంది. రాష్ట్ర విపత్తుల నిర్వహణ సంస్థ ప్రజలను అత్యవసరమైతే తప్ప బయటకు రావొద్దని, విద్యుత్ స్తంభాలు, చెట్లు కూలే ప్రమాదం ఉన్నందున జాగ్రత్తగా ఉండాలని సూచించింది. రైతులు పంట పొలాల్లో పని తగ్గించాలి. ముఖ్యంగా పిడుగులు పడే సమయంలో పొలాల్లో నిలబడటం అత్యంత ప్రమాదకరమని వాతావరణ శాఖ హెచ్చరించింది.

సోమవారం రోజున కూడా తుఫాను ప్రభావం పూర్తిగా తగ్గకపోవచ్చు. నెల్లూరు, ప్రకాశం, కడప జిల్లాల్లో వర్షాలు కొనసాగుతుండగా, గాలులు కూడా వేగంగా వీచే అవకాశం ఉంది. వరద నీరు నిలిచే ప్రాంతాల్లో రాత్రి ప్రయాణాలు మానుకోవాలనే సలహా అధికారులు తరచూ పునరుద్ఘాటిస్తున్నారు. అవసరమైనట్లయితే 1070, 112, 18004250101 హెల్ప్‌లైన్ నంబర్లకు సంప్రదించమని సూచించారు.

తెలంగాణలో తుఫాన్ ప్రభావంతో వర్షాల హెచ్చరిక

అదే సమయంలో తెలంగాణలో దిత్వా తుపాను ప్రభావం తక్కువే అయినప్పటికీ వర్షాల అవకాశాలు స్పష్టంగా కనిపిస్తున్నాయి. తుపాను  ప్రభావంతో ఆదివారం, సోమవారం రెండు రోజుల్లో హైదరాబాద్, వరంగల్, నల్గొండ, ఖమ్మం, సూర్యాపేట, మహబూబ్‌నగర్, నాగర్‌కర్నూల్ ప్రాంతాల్లో ఓ మోస్తరు నుండి భారీ వర్షాలు కురిసే అవకాశం ఉంది. పట్టణాల్లో రోడ్లపై నీరు నిలిచే అవకాశం ఉండటంతో ట్రాఫిక్ మందగించవచ్చు. రాత్రిపూట ప్రయాణం మానుకోవడం, ద్విచక్ర వాహనదారులు వర్షంలో తక్కువ వేగంతో ప్రయాణించాల్సిందిగా అధికారులు సూచిస్తున్నారు.

కాగా, తుపాను ప్రభావంతో తీవ్రంగా దెబ్బతిన్న శ్రీలంకకు భారత ప్రభుత్వం ఇప్పటికే ‘సాగర్ బంధు’ ఆపరేషన్ ద్వారా సహాయక సామగ్రిని పంపిస్తున్నది. C-130J, IL-76 రవాణా విమానాలతో పాటు ఒక నౌక కూడా శ్రీలంకకు బయలుదేరింది. తుఫాను గత 48 గంటలుగా ఏ విధంగా మారుతుందో, సముద్ర ఉష్ణోగ్రతల ప్రభావం ఏ దిశవైపు మళ్లిస్తుందోనని శాస్త్రవేత్తలు క్షణక్షణం పరిశీలిస్తున్నారు. ప్రస్తుతం ఉన్న కదలికల ప్రకారం ఈ తుఫాన్ తీరాన్ని తాకిన తరువాత బలహీనపడే అవకాశమున్నప్పటికీ, మొదటి 24 గంటలలో వర్షపాతం మరియు ఈదురుగాలుల దాడి అత్యంత తీవ్రంగా ఉండనున్నట్లు అంచనా.