Andhra Pradesh : అంతిమ యాత్రలోనూ తప్పని కష్టాలు

విజయనగరం జిల్లా మల్లునాయుడుపేటలో అంత్యక్రియలకు స్మశానానికి రహదారి లేక గ్రామస్తులు ప్రతి ఏడాది వరదలలోనూ మృతదేహాలు మోసుకు వెళ్లే దుస్థితి.

Andhra Pradesh : అంతిమ యాత్రలోనూ తప్పని కష్టాలు

విధాత, హైదరాబాద్ : దేశం చంద్రమండలానికి రాకెట్ పంపే స్థాయికి ఎదిగినా..గ్రామాలు, గూడెలు మాత్రం కన సౌకర్యాలు కరువైన దుస్ధితి మరోవైపు కనిపిస్తుంది. తాజాగా విజయనగరం జిల్లా గజపతినగరం మండలం మల్లునాయుడుపేటలో అంత్యక్రియలకు మృతదేహాన్ని స్మశానానికి తీసుకెళ్ళడానికి గ్రామస్తుల బాధలు వైరల్ గా మారాయి. సాధారణంగా ఇలాంటి పరిస్థితి ఏజెన్సీ ప్రాంతాల్లోని పల్లెల్లో కనిపిస్తుంటుంది. అయితే మల్లు నాయుడు పేటలో ఇలాంటి పరిస్థితి కొనసాగుతుండటం విచారకరం. చనిపోయిన వ్యక్తి కుటుంబ సభ్యులు మృతదేహాన్ని నడుంలోతు నీటిలో మోసుకెళ్లాల్సిన పరిస్థితి సమస్య తీవ్రతకు అద్దం పట్టింది. ఏడాదిలో ఆరునెలల పాటు వరద నీటిలో గ్రామస్తులకు ఇలాంటి సాహసం తప్పడం లేదని వాపోతున్నారు. స్మశానానికి రహదారి సౌకర్యం కల్పించాలని గ్రామస్తులు వేడుకుంటున్నారు.

ఏపీ ప్రభుత్వం గ్రామాల ముఖచిత్రాన్ని సంపూర్ణంగా మార్చివేసే లక్ష్యంతో ‘‘పల్లె పండుగ 2.0’’ కార్యక్రమాన్ని కొనసాగిస్తుంది. ప్రతి పల్లెకు సదుపాయం… ప్రతి కుటుంబానికి సౌభాగ్యం లక్ష్యమని ప్రకటించింది. పల్లె పండుగ కార్యక్రమంలో భాగంగా 4 వేల కిలోమీటర్లు రోడ్లు నిర్మించినట్లే, పల్లె పండుగ 2.0లో రెండింతల అభివృద్ధికి శ్రీకారం చుట్టినట్లు ప్రభుత్వం తెలిపింది. పల్లె పండుగ 2.0 కార్యక్రమం ద్వారా 13,326 గ్రామ పంచాయతీల పరిధిలో రూ. 6,787 కోట్ల వ్యయంతో 53,382 అభివృద్ధి పనులు చేపట్టేలా ప్రణాళికలు సిద్ధం చేశామని పేర్కొంది. పల్లె పండుగ 1.0 కార్యక్రమం ద్వారా రూ. 2,525 కోట్ల విలువైన పనులు టైం బౌండ్ విధానంలో పూర్తి చేశామని.. ఇందులో భాగంగా రాష్ట్ర వ్యాప్తంగా 4 వేల కిలోమీటర్ల సీసీ రోడ్లు నిర్మించామని… పాడి రైతుల కోసం 22,500 మినీ గోకులాలు ఏర్పాటు చేశామని… మూగజీవాల దప్పిక తీర్చడానికి 15 వేల నీటి తొట్టెలు నిర్మించామని.. లక్షకు పైగా నీటి కుంటలు ఏర్పాటు చేశామని ప్రకటించింది.

ఇప్పుడు పల్లె పండుగ 2.0 కార్యక్రమం ద్వారా రూ. 5,838 కోట్ల అంచనా వ్యయంతో 8,571 కిలోమీటర్ల కొత్త రోడ్ల నిర్మాణానికి శ్రీకారం చుట్టారు. పాత రహదారులకు పునర్నిర్మాణం చేయబోతున్నామని… రూ. 375 కోట్ల వ్యయంతో 25 వేల మినీ గోకులాలు, రూ. 16 కోట్ల అంచనాతో 157 కమ్యూనిటీ గోకులాలు ఏర్పాటు చేస్తామని ప్రభుత్వం తెలిపింది. అలాగే రూ. 4 కోట్ల వ్యయంతో 58 కిలోమీటర్ల మ్యాజిక్ డ్రెయిన్ల నిర్మాణానికి ప్రణాళిక సిద్ధం చేశామని పేర్కొంది. పంచాయతీల పరిధిలో రూ. 406 కోట్లతో 15 వేల కొత్త అభివృద్ధి పనులు ప్రారంభిస్తామని, రూ.148 కోట్లతో డీపీఆర్సీ, గ్రామ పంచాయతీ భవనాల నిర్మాణం చేయనున్నామని వెల్లడించింది. ఇదంతా బాగానే ఉన్నా గ్రామాల్లో శ్మశాన వాటికలు, ప్రాథమిక ఆరోగ్య కేంద్రాలు, పాఠశాలల మౌలిక వసతుల కల్పనపై ప్రభుత్వం ప్రాధాన్యతల వారిగా దృష్టి పెట్టాలని ప్రజలు కోరుతున్నారు.