క్రెడిట్ స్కోర్, క్రెడిట్ రిపోర్ట్ వినడానికి ఒకే రకంగా ఉంటాయి. కానీ, ఈ రెండింటి మధ్య తేడా ఏంటి? ఈ రెండింటి వల్ల ఉపయోగం ఏంటి? బ్యాంకుల నుంచి రుణాలు తీసుకొనే విషయంలో ఈ రెండూ ఎంతంటి ప్రాముఖ్యతను కలిగి ఉన్నాయనే విషయాన్ని తెలుసుకుందాం.
క్రెడిట్ స్కోర్ అంటే ఏంటి?
క్రెడిట్ స్కోర్ అనేది క్రెడిట్ రిపోర్టులో ఉన్న సమాచారం ఆధారంగా రూపొందించిన మూడు అంకెల సంఖ్య. ఇది రుణ అర్హతను సూచిస్తుంది. మీ క్రెడిట్ చరిత్రను 300 నుంచి 900 మధ్య సూచించే ఒక మూడు అంకెల సంఖ్యే క్రెడిట్ స్కోర్. క్రెడిట్ స్కోర్ ను 300 నుంచి 900 పాయింట్లుగా లెక్కిస్తారు. మీ ఆర్ధిక క్రమశిక్షణ ఆధారంగా క్రెడిట్ స్కోర్ ను నిర్ణయిస్తారు. మీరు ఆర్ధికంగా క్రమశిక్షణ పాటిస్తే క్రెడిట్ స్కోర్ 700 పాయింట్లకు పైగానే ఉంటుంది. ఆర్ధిక క్రమశిక్షణ పాటించకపోతే 500 పాయింట్ల కంటే తక్కువగా ఉంటుంది. క్రెడిట్ స్కోర్ మీరు ఎంత నమ్మకమైన రుణ గ్రహీత అని అర్ధం చేసుకోవడానికి ఉపయోగపడుతుంది. మీ ఆర్ధిక బాధ్యతను ఒక సంఖ్య రూపంలో క్రెడిట్ స్కోర్ తెలుపుతుంది. లోన్ కార్డు ఆఫర్లు, వడ్డీ రేట్లను నిర్ణయించేందుకు క్రెడిట్ స్కోర్ ను ఉపయోగిస్తారు.
క్రెడిట్ రిపోర్ట్ అంటే ఏంటి?
క్రెడిట్ రిపోర్ట్ అనేది మీ ఆర్ధిక నివేదిక కార్డు లాంటిది. మీ రుణాలు, క్రెడిట్ కార్డులు, అప్పులు, ఆదాయం వంటి పూర్తి సమాచారాన్ని తెలిపేది క్రెడిట్ రిపోర్ట్. మీ ఆర్ధిక అంశాలకు చెందిన సమగ్ర వివరాల నివేదికే ఈ రిపోర్ట్. మీరు తీసుకున్న అప్పులకు చెందిన ఈఎంఐలు ఆలస్యంగా చెల్లించినా…. క్రెడిట్ కార్డు బిల్లులు చెల్లించకున్నా… ఆలస్యంగా చెల్లించినా క్రెడిట్ రిపోర్టులో ఉంటాయి. క్రెడిట్ రిపోర్టు ఆధారంగా మీ క్రెడిట్ స్కోర్ ను నమోదు చేస్తారు. మీ ఆర్ధిక పరిస్థితిని పూర్తిగా అర్ధం చేసుకోవాలంటే క్రెడిట్ రిపోర్ట్ చాలు. మీ వ్యక్తిగత వివరాలతో పాటు మీ పేరున ఉన్న యాక్టివ్, క్లోజ్ చేసిన బ్యాంకు ఖాతాల వివరాలు కూడా నమోదు అవుతాయి. ఎన్ని క్రెడిట్ కార్డులు కలిగి ఉన్నారు… ఎన్ని ఉపయోగిస్తున్నారో కూడా తెలిసిపోతోంది. మీరు అప్పు కోసం ధరఖాస్తు చేసిన సమయంలో బ్యాంకులు లేదా రుణ సంస్థలు చేసిన విచారణకు సంబంధించిన వివరాలు కూడా నమోదౌతాయి. రుణాలు తీసుకోని చెల్లించకపోయినా… సెటిల్ మెంట్ లేదా రద్దు చేసిన ఖాతాల సమాచారం తెలుస్తుంది. క్రెడిట్ రిపోర్టును సిబిల్ (ట్రాన్స్ యూనియన్), ఎక్స్ పీరియన్, ఈక్విఫాక్స్, సీఆర్ఐఎఫ్ హై మార్క్ వంటి క్రెడిట్ బ్యూరోలు నిర్వహిస్తున్నాయి. మీరు ప్రతి క్రెడిట్ బ్యూరో నుంచి ప్రతి ఏటా ఒక ఉచిత క్రెడిట్ నివేదిక పొందేందుకు అర్హులు.
క్రెడిట్ స్కోరు, క్రెడిట్ రిపోర్ట్: ఏది ముఖ్యమైంది?
క్రెడిట్ స్కోరు అనేది మీ క్రెడిట్ ఆరోగ్యానికి ముఖ్యమైన సూచిక . క్రెడిట్ స్కోరు ఆరోగ్యంగా ఉంటే అంతా బాగానే ఉందని సూచిస్తుంది. అయితే క్రెడిట్ స్కోరు పడిపోతే దానికి గల కారణాలను క్రెడిట్ నివేదికలో కనుగొనవచ్చు. ఏదైనా క్రెడిట్ కార్డ్, లోన్ ఈఎంఐ చెల్లింకపోయినా మీ క్రెడిట్ నివేదికలో ఉంటుంది. మీ క్రెడిట్ నివేదిక మీ క్రెడిట్ వినియోగ నిష్పత్తి, సెక్యూర్డ్, అన్‌సెక్యూర్డ్ క్రెడిట్ మిశ్రమం, ప్రతి క్రెడిట్ కోసం చేసిన విచారణల సంఖ్య మొదలైన వివరాలను అందిస్తుంది.క్రెడిట్ స్కోరు, నివేదిక రెండూ ముఖ్యమైనవి.
క్రెడిట్ స్కోర్ ఎంత ఉంటే మంచిది..?
మీ క్రెడిట్ స్కోర్ లేదా సిబిల్ స్కోర్ 800పైన ఉంటే చాలా మెరుగ్గా ఉందని అర్థం. 700 నుంచి 800 మధ్య ఉంటే బాగుందని అర్థం. 600-700 మధ్య ఉంటే ఫర్వాలేదు అని చెప్పవచ్చు. క్రెడిట్ స్కోర్ 600 కన్నా తక్కువగా ఉంటే.. ప్రమాదకర స్థాయిలో మీ ఆర్థిక స్థితి ఉందని అర్థం. 600 కంటే తక్కువ క్రెడిట్ స్కోర్ ఉంటే రుణాలు సులభంగా రావు. క్రెడిట్ స్కోర్ ను ఆన్ లైన్ లో ఉచితంగా చెక్ చేసుకొనే వీలుంది. అయితే ఏడాదికి ఒకటి లేదా రెండుసార్లు మాత్రమే ఆన్ లైన్ లో చెక్ చేసుకోవడానికి అవకాశం కల్పిస్తారు. ఆన్ లైన్ లో క్రెడిట్ స్కోర్ చెక్ చేసుకొనే వెసులుబాటు కల్పిస్తామనే పేరుతో సైబర్ నేరగాళ్లు మీ వ్యక్తిగత వివరాలు సేకరించే అవకాశం ఉంది.