IT Notice | ఐటీ శాఖ నుంచి నోటీసులు వస్తే ఏం చేయాలి?

అసలు ఐటీ శాఖ నుంచి నోటీసులు ఎందుకు వస్తాయి? ఆదాయ పన్ను శాఖ నుంచి నోటీస్ వస్తే ఏం చేయాలి? ఇలా నోటీసులు వస్తే ఇబ్బందులు ఎదుర్కోవాల్సి ఉంటుందా? ఈ నోటీసులకు ఎలా సమాధానం ఇవ్వాలి? నోటీసులకు సమాధానం ఇవ్వకపోతే ఏం జరుగుతోంది? కేసులు నమోదయ్యే ఛాన్స్ ఉంటుందా? ఇలాంటి ప్రశ్నలకు సమాధానాలు తెలుసుకుందాం.

ఆదాయ పన్ను శాఖ నుంచి నోటీసులు ఎందుకు వస్తాయి?

ఐటీ శాఖ నుంచి నోటీసులు ఎందుకు వస్తాయో ముందుగా తెలుసుకుందాం. మీరు ఐటీఆర్ లో మీ ఆదాయాన్ని తక్కువ చేసి చూపితే నోటీసులు వస్తాయి. అంటే మీరు దాఖలు చేసిన ఆదాయ పన్ను రిటర్న్స్ లో ఐటీ శాఖ వద్ద ఉన్న సమాచారంలో తేడా ఉంటే మీకు ఆదాయ పన్ను శాఖ నుంచి నోటీసులు వస్తాయి. దీనిపై వివరణ కోరుతారు. ఈ వివరణకు 15 రోజుల్లో సమాధానం చెప్పాలి. ఐటీఆర్ లో మీరు ఏ విషయాన్నైనా మర్చిపోయినా…ఏదైనా ఆదాయ వివరాలు చూపకపోయినా, తప్పుడు లెక్కలు చూపినా ఆదాయ పన్ను శాఖ నుంచి నోటీసులు వస్తాయి.మీ ఐటీఆర్ ను పున:పరిశీలించాలని సూచిస్తాయి. మీ ఆదాయంపై టీడీఎస్ కట్ అయినప్పుడు ఈ విషయాన్ని ఐటీఆర్ లో చేయకపోయినా లేదా టీడీఎస్ క్లెయిమ్ సరిపోలకపోయినా ఐటీ నోటీసులు వస్తాయి. మీ జీతం లేదా ఫిక్స్‌డ్ డిపాజిట్ వడ్డీపైటీ టీడీఎస్ డీడక్ట్ అయి ఫారమ్ 26ASలో కనిపించి ఐటీఆర్‌లో చూపకపోతే నోటీసులు రావచ్చు. ఐటీ శాఖ చట్టంలోని సెక్షన్ 80సీ, 80డీ, అధిక రీఫండ్ కోసం ఐటీ రిటర్న్స్ దాఖలు చేసినా కూడా నోటీసులు వచ్చే అవకాశం ఉంది.
ఆదాయాన్ని తక్కువగా చూపిస్తే నోటీసులు వస్తాయి. అయితే మీకు వచ్చిన నోటీసుల్లో ఏముందో కూడా ముందుగా చదువుకోవాలి. నోటీసులో ఏ అంశాలకు సంబంధించి ఐటీ శాఖ వివరాలు అడిగింది… ఏ రకమైన డాక్యుమెంట్లు ఇవ్వాలని కోరారు? ఐటీఆర్ ను సవరించాలని కోరారా? మీకు పంపిన నోటీసులో మీ పేరు, మీ పాన్ నెంబర్ ఉందా అనే విషయాలను కూడా పరిశీలించాలి. ఐటీ శాఖ పేరుతో తప్పుడు నోటీసులు ఏమైనా పంపారా అనే విషయాలను కూడా పరిశీలించాలి.

నోటీసులు తీసుకున్నాక ఏం చేయాలి?

సాధారణంగా ఐటీ నోటీసులు ఎస్ఎంఎస్ లేదా ఈ మెయిల్ లేదా రిజిస్టర్డ్ పోస్టులో మీకు నోటీసులు వస్తాయి. నోటీసుల్లో ఉన్న సమాచారం ఆధారంగా ఆదాయపన్ను శాఖకు మీరు సమాధానం చెప్పాలి. సాధారణంగా నోటీసు అందుకున్న 15 రోజుల్లో సమాధానం ఇవ్వాలి. కొన్ని సమయాల్లో ఐటీ శాఖ ఇచ్చిన నోటీసులోనే కాల పరిమితి విధిస్తుంది. ఆ సమయం లోపుగా నోటీసుకు సమాధానం ఇవ్వాలి. ఏ విషయమై నోటీసుకు సమాధానం ఇవ్వాలో నోటీసును క్షుణ్ణంగా చదివి అర్ధం చేసుకోవాలి. ఆ తర్వాత ఐటీశాఖ వెబ్ సైట్లో కూడా ఈ నోటీసుకు సమాధానం చెప్పవచ్చు. ఐటీ శాఖ అడిగిన సమాచారానికి సంబంధించిన డాక్యుమెంట్లను కూడా అప్ లోడ్ చేయవచ్చు.

చార్టెడ్ అకౌంటెంట్ ను సహాయం తీసుకోవాలా?

ఆస్తుల కొనుగోలు లేదా అమ్మకం, స్టాక్ మార్కెట్ ట్రేడింగ్, బ్యాంకు డిపాజిట్లు, మ్యూచువల్ ఫండ్స్, షేర్ల వాటాల బదిలీల వంటి అంశాలు మీరు దాఖలు చేసిన రిటర్న్స్ లో ఆదాయపన్ను శాఖ వద్ద ఉన్న సమాచారంతో సరిపోలకపోతే నోటీసులు వస్తాయి. ఇలాంటి సమయాల్లో వచ్చే నోటీసులకు సమాధానం ఇవ్వడానికి ఆర్ధిక నిపుణులను సంప్రదించడం ఉత్తమం. మీ ఐటీ రిటర్న్స్ దాఖలు చేసే చార్టెడ్ అకౌంటెంట్ లను సంప్రదించి వారి సలహా కోరాలి. అవసరమైన డాక్యుమెంట్లు కూడా అందించాలి.