Bala Krishna | టాలీవుడ్ నటసింహం నందమూరి బాలకృష్ణ, డాషింగ్ డైరెక్టర్ పూరీ జగన్నాథ్ కాంబినేషన్ అంటే మాస్ ప్రేక్షకులకు ప్రత్యేకమైన క్రేజ్. వీరిద్దరి కలయికలో వచ్చిన ‘పైసా వసూల్’ బాక్సాఫీస్ వద్ద ఆశించిన ఫలితాన్ని అందుకోకపోయినా, సినిమాలో బాలయ్య కనిపించిన స్టైల్, బాడీ లాంగ్వేజ్, పూరీ మార్క్ డైలాగ్స్ అభిమానులకు సరికొత్త అనుభూతిని ఇచ్చాయి. ఆ సినిమా తర్వాత కూడా వీరిద్దరి మధ్య మంచి అనుబంధం కొనసాగుతూనే ఉంది.
ఇటీవల పూరీ జగన్నాథ్ గతంలో బాలకృష్ణ గురించి చేసిన వ్యాఖ్యలు మరోసారి సోషల్ మీడియాలో వైరల్ అవుతున్నాయి. బాలయ్య వ్యక్తిత్వం గురించి పూరీ చెప్పిన మాటలు ఇప్పుడు అభిమానుల మధ్య చర్చకు దారితీశాయి.
నేరుగా చెప్పే వ్యక్తి ..
పూరీ జగన్నాథ్ మాట్లాడుతూ.. “బాలయ్య సినిమాల్లో ఎంత పవర్ఫుల్గా కనిపించినా, నిజ జీవితంలో మాత్రం చాలా అమాయకంగా, నిజాయితీగా ఉంటారు” అని అన్నారు. బయట ఎలాంటి నటన, ముసుగు, దాపరికాలు లేకుండా మనసులో ఉన్నదాన్ని నేరుగా చెప్పే వ్యక్తి ఆయనని కొనియాడారు.
అలాగే కోపం వచ్చినా, సంతోషం వచ్చినా ఎలాంటి ఫిల్టర్ లేకుండా వెంటనే బయటపెట్టేస్తారని, ఆ విషయంలో బాలయ్యలో చిన్నపిల్లాడి మనస్తత్వం కనిపిస్తుందని చెప్పారు. తెరపై భారీ డైలాగులతో గర్జించే నటుడు, సెట్స్ బయట మాత్రం చాలా సింపుల్గా ఉంటారని పేర్కొన్నారు.
సినిమాల విషయంలో కొత్త పంథా…
ఇంకా బాలయ్య వర్క్ స్టైల్ గురించి మాట్లాడుతూ.. “ఇంత పెద్ద స్టార్డమ్ ఉన్నప్పటికీ దర్శకుడి విజన్ను పూర్తిగా గౌరవిస్తారు. సెట్స్పై చెప్పిన విషయాన్ని అచ్చంగా ఫాలో అవుతారు. ఆయనలో అహంకారం కనిపించదు” అంటూ పూరీ ప్రశంసలు కురిపించారు.
ఇక ప్రస్తుతం బాలకృష్ణ సినిమా ఎంపికల విషయంలో కూడా కొత్త పంథా అవలంబిస్తున్నట్లు ఇండస్ట్రీ వర్గాలు చెబుతున్నాయి. ఒకప్పుడు తనకు దగ్గరైన వారితో ఎక్కువగా సినిమాలు చేసిన బాలయ్య.. ఇప్పుడు మాత్రం కథలో బలం, పాత్ర కొత్తదనం, దర్శకుడి మేకింగ్ స్టైల్కు ప్రాధాన్యత ఇస్తున్నారని టాక్ వినిపిస్తోంది. అందుకే గోపీచంద్ మలినేని, అనిల్ రావిపూడి, బాబీ వంటి దర్శకులతో వరుస సినిమాలు చేస్తూ విజయాలు అందుకుంటున్నారు.
కొత్త ప్రాజెక్టులతో బిజీ..
మరోవైపు పూరీ జగన్నాథ్ ప్రస్తుతం తన కొత్త ప్రాజెక్టులతో బిజీగా ఉన్నారు. అయితే ఇండస్ట్రీలో వినిపిస్తున్న కథనాల ప్రకారం.. బాలయ్య కోసం ఆయన ఇప్పటికే ఓ మాస్ యాక్షన్ కథను సిద్ధం చేశారనే వార్తలు వినిపిస్తున్నాయి. దీనిపై అధికారిక ప్రకటన లేకపోయినా, వీరిద్దరి మధ్య ఉన్న బలమైన అనుబంధాన్ని బట్టి మరోసారి ఈ క్రేజీ కాంబో సెట్స్పైకి వచ్చే అవకాశాలు ఉన్నాయని అభిమానులు ఆశాభావం వ్యక్తం చేస్తున్నారు.
పూరీ మార్క్ పవర్ఫుల్ క్యారెక్టరైజేషన్కు బాలయ్య ఎనర్జీ తోడైతే.. మరోసారి థియేటర్లు దద్దరిల్లే అవకాశం ఉందని నందమూరి అభిమానులు సోషల్ మీడియాలో కామెంట్లు చేస్తున్నారు.