రామ్ చరణ్ ‘పెద్ది’ షూటింగ్‌.. ఇంకో 6 రోజులు మాత్రమే : జూన్‌లో గ్రాండ్ రిలీజ్!

రామ్ చరణ్ నటిస్తున్న ‘పెద్ది’ సినిమా షూటింగ్ పూర్తికి ఇంకా 6 రోజులు మాత్రమే మిగిలి ఉన్నట్లు మేకర్స్ ప్రకటించారు. బుచ్చిబాబు సానా దర్శకత్వంలో రూపొందుతున్న ఈ చిత్రం జూన్‌లో గ్రాండ్ రిలీజ్‌కు సిద్ధమవుతోంది.

‘పెద్ది’ షూటింగ్‌కు ఇంకా 6 రోజులు.. జూన్ రిలీజ్‌పై ఉత్సాహం పెంచిన అప్‌డేట్

Ram Charan Peddi Shoot Ends in 6 Days, Grand June Release Confirmed

విధాత వినోదం డెస్క్​ | 21 ఏప్రిల్​ 2026 | హైదరాబాద్​:

Peddi Shoot Ends | మెగా పవర్ స్టార్ రామ్ చరణ్ నటిస్తున్న భారీ చిత్రం ‘పెద్ది’పై అభిమానుల్లో రోజురోజుకీ అంచనాలు పెరుగుతున్నాయి. దర్శకుడు బుచ్చిబాబు సానా తెరకెక్కిస్తున్న ఈ స్పోర్ట్స్ యాక్షన్ డ్రామా షూటింగ్ ఇప్పుడు చివరి దశకు చేరుకుంది. తాజా అప్‌డేట్ ప్రకారం, ఈ సినిమా షూటింగ్ పూర్తవ్వడానికి ఇంకా 6 రోజులు మాత్రమే మిగిలి ఉన్నాయి. దీంతో మెగా ఫ్యాన్స్‌లో ఆనందం రెట్టింపైంది.

సెట్స్ నుంచి సెల్ఫీ.. అభిమానుల్లో జోష్

‘పెద్ది’ సెట్స్ నుంచి రామ్ చరణ్ – బుచ్చిబాబు సెల్ఫీ.. షూటింగ్ ముగింపుదశలోకి చేరిన చిత్రం

సోషల్ మీడియాలో చిత్రబృందం రామ్ చరణ్, బుచ్చిబాబు సానాతో కలిసి తీసుకున్న ఓ సెల్ఫీని షేర్ చేసింది. దానితో పాటు, “పెద్ది షూటింగ్ ఇంకో 6 రోజుల్లో పూర్తి అవుతుంది.. జూన్‌లో గ్రాండ్ రిలీజ్” అని ప్రకటించింది. ఈ ఒక్క పోస్టుతోనే సినిమా చుట్టూ ఒక్కసారిగా భారీ హైప్ నెలకొంది.

రామ్ చరణ్ ఈ ఫొటోలో చాలా కూల్‌గా కనిపించగా, దర్శకుడు బుచ్చిబాబు కూడా చిరునవ్వుతో కనిపించారు. సెట్స్‌లో పాజిటివ్ వైబ్స్ ఉన్నాయని ఫ్యాన్స్ కామెంట్స్ చేస్తున్నారు.

ఒక్క పాట మాత్రమే బ్యాలెన్స్.. పోస్ట్ ప్రొడక్షన్ ఫుల్ స్వింగ్‌లో

సినిమా టాకీ పార్ట్ ఇప్పటికే పూర్తయిందని, ఇప్పుడు ఒక ప్రత్యేక పాట మాత్రమే షూట్ చేయాల్సి ఉందని సమాచారం. మరోవైపు ఎడిటింగ్, బ్యాక్‌గ్రౌండ్ స్కోర్, విజువల్ ఎఫెక్ట్స్​ పనులు వేగంగా కొనసాగుతున్నాయి.

నిర్మాతల ప్రకటన ప్రకారం, కంటెంట్ అద్భుతంగా వచ్చిందని, అందుకే ప్రేక్షకులకు బెస్ట్ థియేట్రికల్ ఎక్స్‌పీరియెన్స్ ఇవ్వాలని రిలీజ్‌ను జూన్‌కు మార్చినట్లు తెలుస్తోంది.

గ్రామీణ క్రీడల నేపథ్యంలో కథ?

‘పెద్ది’ కథ గ్రామీణ నేపథ్యంలో జరిగే క్రీడల చుట్టూ తిరుగుతుందని టాలీవుడ్‌లో టాక్ నడుస్తోంది. రామ్ చరణ్ పాత్ర పవర్‌ఫుల్‌గా, ఎమోషనల్‌గా ఉండబోతుందని చెబుతున్నారు. ఇటీవల విడుదలైన గ్లింప్స్‌లో చరణ్, భారీ శరీరాకృతితో పహిల్వాన్ లుక్‌లో గదతో కనిపించి అదరగొట్టాడు.

అదిరే రెజ్లింగ్ ఎపిసోడ్.. ‘పెద్ది’లో నెక్స్ట్ లెవెల్ విజువల్ ట్రీట్

‘పెద్ది’లో పవర్‌ఫుల్ రెజ్లర్ అవతారంలో రామ్ చరణ్.. అభిమానుల్లో భారీ అంచనాలు

ఈ చిత్రానికి విజువల్ ఎఫెక్ట్స్ బాధ్యతలు నిర్వహిస్తున్న ఫ్రేమ్ ఎక్స్ సంస్థ అధినేత నీలేశ్ తెలిపిన వివరాల ప్రకారం,  సినిమాలో వచ్చే మల్లయుద్ధపు సన్నివేశాలు ప్రేక్షకులను మైమరపింపజేస్తాయని విశ్వాసం వ్యక్తం చేశారు.

కేవలం 4 నుంచి 5 నిమిషాల నిడివి ఉన్న ఈ ప్రత్యేక ఎపిసోడ్​ కోసం ఏకంగా మూడు నెలల సమయం వెచ్చించారంటే, ఆ సన్నివేశాన్ని ఎంత ప్రతిష్టాత్మకంగా రూపొందిస్తున్నారో అర్థమవుతోంది.

ప్రతి ఫ్రేమ్‌ను నిశితంగా పరిశీలిస్తూ, అత్యున్నత నాణ్యతతో విజువల్స్ రూపొందిస్తున్నామని నీలేశ్​ తెలిపారు. దీంతో ‘పెద్ది’ సినిమాలో ఈ సన్నివేశం థియేటర్లలో ప్రేక్షకులను ఉర్రూతలూగించే హైలైట్​గా నిలవొచ్చని సినీ వర్గాలు భావిస్తున్నాయి.

సంగీతాన్ని ఏఆర్ రెహమాన్ అందిస్తుండగా, విజువల్స్ కూడా నెక్స్ట్ లెవెల్‌లో ఉంటాయని అభిమానులు ఆశిస్తున్నారు.

భారీ తారాగణం.. రిలీజ్ డేట్ కోసం వెయిటింగ్

ఈ సినిమాలో జాన్వీ కపూర్ హీరోయిన్‌గా నటిస్తుండగా, శివరాజ్‌కుమార్, జగపతిబాబు, దివ్యేందు శర్మ, బోమన్ ఇరానీ కీలక పాత్రల్లో కనిపించనున్నారు.

మార్చి 27, తర్వాత ఏప్రిల్ 30 అంటూ వాయిదా పడిన ఈ చిత్రం ఇప్పుడు జూన్ 2026లో విడుదలకు సిద్ధమైంది. అయితే ఖచ్చితమైన రిలీజ్ డేట్‌ను త్వరలో ప్రకటించే అవకాశం ఉంది.

మొత్తానికి.. ‘గేమ్ చేంజర్’ వైఫల్యం తర్వాత రామ్ చరణ్ నుంచి రాబోతున్న ఈ భారీ చిత్రం ‘పెద్ది’ మెగా ఫ్యాన్స్‌కు పండగే కానుంది.