దేశ రాజధాని ఢిల్లీ ప్రజలకు ఊపిరి ఆడడం లేదు. వాయు కాలుష్యం, మంచు పొగతో ఉక్కిరిబిక్కిరికి గురవుతున్నారు. ఉదయం, సాయంత్రం పూట వాకింగ్ కు వెళ్లలేకపోతున్నారు. విద్యార్థులను పాఠశాలలకు పంపలేని విధంగా వాతావరణం ఉంది. రాష్ట్రపతి, ప్రధాన మంత్రి, సుప్రీంకోర్టు ప్రధాన న్యాయమూర్తి, మంత్రులు, పార్లమెంటు సభ్యులు, ఢిల్లీ ప్రభుత్వం ఉన్నా వాయు కాలుష్యం సమస్యకు మోక్షం లభించడం లేదు. విషపూరిత గాలి, పొగ మంచు కారణంగా ఢిల్లీ ప్రజలు కళ్ల మంటలతో పాటు ఊపిరిని తీసుకోలేకపోతున్నారు. ఈ భూతం కారణంగా నవంబర్ నెలలో రెండు వారాల నుంచి నరకయాతన అనుభవిస్తున్నారు. ఢిల్లీలో శుక్రవారం నాడు సగటు వాయు నాణ్యత సూచిక 369 గా నమోదు అయ్యింది. గత ఇరవై రోజులుగా ఇదే తీరుగా కాస్త అటు ఇటుగా నమోదు అవుతున్నది.
గురువారం నాడు 377, బుధవారం నాడు 327, మంగళవారం నాడు 352 గా నమోదు అయ్యింది. సెంట్రల్ పొల్యుషన్ కంట్రోల్ బోర్డు వివరాలు ప్రకారం ద్వారకా సెక్టార్ 8 లో రికార్డు స్థాయిలో 414 నమోదు కావడం ఆందోళన కలిగించే అంశం. శనివారం ఉదయం నాడు వివరాలు సేకరించగా నగరంలో 341 నమోదు అయినట్లు వెల్లడైంది. వచ్చే వారం కూడా ఇదే రకంగా వివరాలు నమోదు అవుతాయని, ప్రజలు అప్రమత్తంగా ఉండక తప్పని పరిస్థితులు ఉన్నాయి. కేంద్రంలో, ఢిల్లీలో బీజేపీ ప్రభుత్వాలు ఉన్నా వాయు కాలుష్యం సమస్యను పట్టించుకోవడం లేదని కాంగ్రెస్ అగ్ర నాయకుడు రాహుల్ గాంధీ విమర్శించారు. హెల్త్ ఎమర్జెన్సీ విషయంలో ప్రధాన మంత్రి నరేంద్ర మోదీ మౌనం వహిస్తున్నారని ఆయన ఎక్స్ లో ట్వీట్ చేశారు. శీతాకాల పార్లమెంటు సమావేశంలో ఢిల్లీ వాయు కాలుష్యం పై చర్చ పెట్టాలని ఆయన డిమాండ్ చేశారు.
ఢిల్లీలో ఏ ఒక్క మహిళను కలిసినా తమ పిల్లలు విష తుల్యమైన వాయువు పీల్చలేకపోతున్నారని చెబుతున్నారన్నారు. మన కళ్ల ముందే చిన్నారులు ఉక్కిరిబిక్కిరికి గురవుతున్నారన్నారు. సమస్య ఇంత జఠిలంగా ఉంటే మౌనంగా ఎందుకు ఉంటున్నారని ఆయన ప్రశ్నించారు. అత్యవసరంగా ఈ సమస్యపై ఎందుకు చర్యలు తీసుకోవడం లేదని, ప్రణాళిక లేదా, బాధ్యత లేదా అని రాహుల్ ప్రశ్నించారు. ఢిల్లీలో ఒక వేయి వరకు ఉన్న పరిశ్రమలు కాలుష్యానికి కారణమవుతున్నాయని, వారికి రాజకీయ పలుకుబడి ఉండడంతో చర్యలు లేవన్నారు. సాధారణ పౌరుడు ఇలాంటి వాటికి పాల్పడరని, వారికి రాజకీయ పలుకుబడి ఉండదు కనక అని రాహుల్ ఆందోళన వ్యక్తం చేశారు. 6 అధునాతన డిస్ ప్లే బోర్డులు.. ప్రస్తుతం ఉన్న డిస్ ప్లే బోర్డులలో కేవలం వాయు నాణ్యతా వివరాలు మాత్రమే ప్రదర్శిస్తున్నారు. ఎప్పుడో ఏర్పాటు చేసిన ఇవి మారుతున్న పరిస్థితులకు అనుగుణంగా లేవని ఢిల్లీ ప్రభుత్వం గుర్తించింది.
అదనంగా మరో ఆరు అధునాత ఏయిర్ క్వాలిటీ మానిటరింగ్ స్టేషన్లను ఏర్పాటు చేయాలని నిర్ణయించారు. వచ్చే ఏడాది జనవరి 15 నుంచి ఇవి పనిచేయనున్నాయి. జే.ఎన్.యూ, ఇందిరా గాంధీ ఓపెన్ యూనివర్సిటీ, మల్చా మహల్ ఇస్రో ఎర్త్ స్టేషన్, ఢిల్లీ కంటోన్మెంట్ కామన్ వెల్త్ స్పోర్ట్స్ కాంప్లెక్స్ తో పాటు నేతాజీ సుభాష్ యూనివర్సిటీ ఆఫ్ టెక్నాలజీ (వెస్ట్ క్యాంపస్) లో వీటిని అమర్చుతున్నారు. ఈ ప్రాంతాల్లో జనాభా అధికంగా ఉండడం, ప్రముఖ విద్యా సంస్థలు ఉండడంతో మరింత పారదర్శక వివరాల కోసం ఏర్పాటు చేస్తున్నారు. పీఎం2.5, పీఎం10, సల్ఫర్ డై ఆక్సైడ్, ఓజోన్, బిటెక్స్ కాంపౌండ్స్ వివరాలు కొత్తగా ఏర్పాటు చేసే డిస్ ప్లే బోర్డులలో ప్రదర్శిస్తారని ఢిల్లీ పర్యావరణ మంత్రి మంజిందర్ సింగ్ సిర్సా తెలిపారు. వాయువులు ఎటు వీస్తున్నాయి, తీవ్రత ఏ స్థాయిలో ఉంది, ఉష్ణోగ్రతలు, వర్షపాతం, సోలార్ రేడియషన్ వంటి వివరాలు కూడా ఎప్పటికప్పుడు వెల్లడిస్తాయని ఆయన పేర్కొన్నారు. రియల్ టైమ్ డేటా 24 గంటల పాటు ప్రదర్శిస్తారని, ప్రజలు వీక్షించి అంచనా వేయవచ్చన్నారు.