Kodad : సర్పంచ్ పదవి కోసం ఎస్సై ఉద్యోగానికి రాజీనామా!

కోదాడ ఎస్సై పులి వెంకటేశ్వర్లు సర్పంచ్ ఎన్నికల్లో పోటీ చేసేందుకు ఉద్యోగానికి రాజీనామా. పుట్టిన ఊరికి సేవ చేయడమే లక్ష్యం అంటున్న మాజీ ఎస్సై.

విధాత : సర్పంచ్ ఎన్నికల్లో పోటీ చేసేందుకు ఓ ఎస్సై తన ఉద్యోగానికి రాజీనామా చేసిన ఘటన వైరల్ గా మారింది. కోదాడ పట్టణ ఎస్సై పులి వెంకటేశ్వర్లు ఇంకా 5 నెలలు సర్వీస్ ఉండగానే అకస్మాత్తుగా వీఆర్ఎస్ తీసుకుని స్వచ్చంద పదవి విరమణ చేశారు. తన స్వగ్రామం కోదాడ మండలం గుడిబండ నుంచి పోటీకి ఎస్సై వెంకటేశ్వర్లు సిద్ధమయ్యారు. పుట్టిన ఊరికి సేవ చేయడమే నా లక్ష్యం అని..అందుకే సర్పంచ్ ఎన్నికల్లో పోటీకి సిద్దపడి తన ఎస్సై ఉద్యోగానికి రాజీనామా చేశానని వెంకటేశ్వర్లు తెలిపారు. సర్పంచ్ పదవి అంటే అప్పుల పాలవ్వడమేనంటూ ఓ వైపు మాజీ సర్పంచ్ లు వాపోతున్న నేపథ్యంలో చేస్తున్న ఉద్యోగానికి రాజీనామా చేసి గ్రామానికి సేవ చేస్తానంటూ వెంకటేశ్వర్లు ముందుకు రావడం విశేషం.

రాజకీయాల్లో రాణించే లక్ష్యంతో తరుచూ ఐఏఎస్, ఐపీఎస్ నుంచి చిన్న ఉద్యోగుల వరకు తమ ఉద్యోగాలకు రాజీనామా చేసి ఎన్నికల గోదాలోకి దిగడం చూస్తుంటాం. అలా ఎన్నికల బరిలోకి దిగిన అధికారులు, ఉద్యోగులలో కొందరే తాము అనుకున్న రాజకీయలక్ష్యాలను, పదవులను అందుకుంటున్నారు. అయితేనేమి న్యాయ, శాసన, కార్యనిర్వాహక వ్యవస్థలలో కీలకమైన చట్టసభలలో అడుగుపెట్టి..కార్యనిర్వాహక పగ్గాలు అందుకోవాలనుకునే ఉద్యోగులు తరుచూ రాజకీయాల్లోకి వచ్చి తమ అదృష్టాన్ని పరిక్షించుకుంటున్నారు. తెలంగాణలో ఐఏఎస్ వెంకట్రామ్ రెడ్డి, డీటీవో చంద్రశేఖర్(బీఆర్ఎస్), ఆంధ్రలో ఐఏఎస్‌ అధికారి ఏ.ఎండి. ఇంతియాజ్‌(వైసీపీ) రాజకీయాల్లోకి వచ్చారు. సీబీఐ మాజీ జేడీ లక్ష్మినారాయణ సొంత పార్టీనే పెట్టారు. ఇలా చెప్పుకుంటు పోతే ఉద్యోగాలకు రాజీనామాలు చేసి..రాజకియాల్లోకి చేరిన నేతలు చాలమందినే ఉన్నారు. అలాంటి వారి పరంపర కొనసాగుతుండటం విశేషం.