Jurala Project: ప్రమాదంలో జూరాల ప్రాజెక్ట్ గేట్లు

Jurala Project: ప్రమాదంలో జూరాల ప్రాజెక్ట్ గేట్లు

తెగిపోయిన తొమ్మిదో నెంబర్ గేట్ ఐరన్ రోప్

విధాత : కృష్ణమ్మ పరవళ్లతో క్రమంగా జలకళ సంతరించుకున్న జూరాల ప్రాజెక్టుకు అనుకోని ప్రమాదం ఎదురవ్వడం ఆందోళన కల్గిస్తుంది. ప్రాజెక్టు తొమ్మిదో నెంబర్ గేట్ ఐరన్ రోప్ తెగిపోవడం ప్రాజెక్టు భద్రతపై కలవరం రేపింది. అటు 12, 16 , 24, 26వ గేట్ల రోప్ లు లూజ్ కావడం మరో సమస్యగా మారింది. తొమ్మిదో నెంబర్ గేట్ పైకి ఎత్తడానికి వాడే ఐరన్ రోప్ హుక్స్ తెగిపోయాయి. అలాగే ఉంటే గేట్లు కొట్టుకుపోయే ప్రమాదం ఉంది. గేట్లు పైకెత్తాలంటే మరమ్మతులు తప్పనిసరి. ఈ వేసవి కాలంలో జూరాల గేట్ల రిపేర్ సరిగా చేయకపోవడం వలనే ఈ పరిస్థితి తలెత్తిందన్న విమర్శలు వినవస్తున్నాయి. గేట్ ఐరన్ రోప్ తెగిపోవడంతో ప్రాజెక్టుకు వచ్చే ప్రమాదం లేదని అధికారులు చెబుతున్నారు.

సర్కారు నిర్లక్ష్యానికి నిదర్శనం : కేటీఆర్

జూరాల ప్రాజెక్టులోని 9వ నంబర్ గేట్ రోప్ తెగిపోవడం కాంగ్రెస్ సర్కారు నిర్లక్ష్యానికి నిలువెత్తు నిదర్శనమని బీఆర్ఎస్ వర్కింగ్ ప్రెసిడెంట్ కేటీఆర్ ఎక్స్ వేదికగా విమర్శించారు. ఒక్క ఇటుక పేర్చడం కూడా చేతకాని ముఖ్యమంత్రికి కనీసం ఉన్న ప్రాజెక్టు నిర్వహణ కూడా రాకపోవడం వల్లే ఇవాళ జూరాల ప్రాజెక్టు డేంజర్ లో పడిందని విమర్శించారు. ప్రతిఏటా వరద వస్తుందని తెలిసినా స్పిల్ వే వద్ద మెయింటెనెన్స్ పనులు చేయించడంలో రేవంత్ సర్కారు నిర్లిప్తత స్పష్టంగా కనిపిస్తోందన్నారు. జూరాలకు క్రమంగా వరద ఉదృతి పెరుగుతున్న నేపథ్యంలో ముఖ్యమంత్రి, మంత్రులు ఇప్పటికైనా మొద్దునిద్ర వీడాలని డిమాండ్ చేశారు. ఇప్పటికే ఈ ప్రభుత్వ అసమర్థత వల్ల ఎస్.ఎల్.బీ.సీ. టన్నెల్ కుప్పకూలి ఎనిమిది మంది నిండు ప్రాణాలు గాలిలో కలిసిపోయాయన్నారు. పెద్దవాగుకు గండిపడి 16 గ్రామాలు ముంపునకు గురయ్యాయని.. వట్టెం పంప్ హౌజ్ మునిగిపోయిందని.. సుంకిశాల రిటేనింగి వాల్ కుప్పకూలి వందల కోట్ల నష్టం వాటిల్లిందని కేటీఆర్ గుర్తు చేశారు. ఇప్పుడు జూరాల 9వ నంబర్ గేట్ రోప్ తెగిపోవడంతోపాటు ఇతర గేట్ల రోప్ లు బలహీనంగా ఉండటం ప్రాజెక్టును ప్రమాదంలోకి నెట్టిందని కేటీఆర్ విమర్శించారు. ప్రభుత్వం వెంటనే దిగువ ప్రాంతాల ప్రజలను అప్రమత్తం చేయడంతోపాటు, ఎగువ నుంచి పెరుగుతున్న ఇన్ ఫ్లో ను ఎప్పటికప్పుడు అంచనా వేస్తూ పకడ్బందీగా వ్యవహరించాలని సూచించారు. జూరాల ప్రాజెక్టుకు ఎలాంటి నష్టం వాటిల్లకుండా జాగ్రత్త చర్యలు తీసుకోవాలని డిమాండ్ చేశారు.

 

ALSO READ : Allu Aravind: అల్లు అరవింద్.. అవేద‌న అందుకేనా! టాలీవుడ్‌లో చ‌ర్చ‌

ALSO READ : Python: భారీ కొండ చిలువను పట్టుకుని.. మూడు కిలోమీటర్లు (వీడియో వైర‌ల్)