భారత ఆర్థిక వ్యవస్థకు అత్యంత కీలకమైన అంశాల్లో ఒకటిగా ఉద్యోగిత నిలుస్తున్నది. అయితే.. దేశంలో నానాటికీ పెరిగిపోతున్న నిరుద్యోగిత ఆర్థిక వ్యవస్థకు అనేక సవాళ్లను విసురుతున్నది.
2008లో 5.41 శాతంగా నిరుద్యోగిత రేటు
2014 నాటికి 5.44 శాతానికి పెరుగుదల
2019 నాటికి 5.27 శాతానికి, 2024 (జూన్) నాటికి 9.2 శాతానికి
న్యూఢిల్లీ: భారత ఆర్థిక వ్యవస్థకు అత్యంత కీలకమైన అంశాల్లో ఒకటిగా ఉద్యోగిత నిలుస్తున్నది. అయితే.. దేశంలో నానాటికీ పెరిగిపోతున్న నిరుద్యోగిత ఆర్థిక వ్యవస్థకు అనేక సవాళ్లను విసురుతున్నది. అనేక వైరుధ్యాలు కలిగిన అత్యధిక జనాభా ఉన్న భారతదేశం వంటి దేశంలో నిరుద్యోగిత రేటు ఆర్థిక వృద్ధి, అభివృద్ధిపై తీవ్ర పర్యవసానాలు చూపుతున్నది. భారతదేశంలో నిరుద్యోగిత రేటుపై ఫోర్బ్స్ ఇటీవల ఒక అధ్యయనాన్ని వెల్లడించింది. దీనిని ఇన్స్టిట్యూట్ ఫర్ హ్యూమన్ డెవలప్మెంట్, అంతర్జాతీయ కార్మిక సంస్థ (ఐఎల్వో) సంయుక్తగా చేపట్టాయి.
2008లో 5.41 శాతంగా ఉన్న నిరుద్యోగిత రేటు.. 2014 నాటికి 5.44 శాతంగా నమోదైంది. అక్కడి నుంచి 2019 నాటికి 5.27 శాతానికి, 2024 (జూన్) నాటికి 9.2 శాతానికి చేరుకున్నదని ఆ నివేదికలో పేర్కొన్నారు. తాము అధికారంలోకి వచ్చిన తర్వాత నిరుద్యోగం తగ్గిపోయిందని ప్రభుత్వం చెబుతున్న విషయం తెలిసిందే. కానీ.. అధ్యయనాలు మాత్రం అందుకు పూర్తి భిన్న దృశ్యాన్ని చూపుతున్నాయి. ప్రత్యేకించి 2021 నుంచి తీవ్రస్థాయిలో పెరగడం గమనార్హం.
సీఎంఐఈకి చెందిన కన్జ్యూమర్ పిరమిడ్స్ హౌస్హోల్డ్ సర్వే ప్రకారం.. మహిళల్లో నిరుద్యోగిత 2024 జూన్ నాటికి 18.5 శాతానికి చేరుకున్నది. ఇది జాతీయ సగటు కంటే అధికం. గత ఏడాది ఇది 15.1 శాతంగా ఉన్నది. పురుషుల్లో గత ఏడాది జూన్ నాటికి 7.7 శాతం నిరుద్యోగిత ఉండగా.. అది ఈ ఏడాది స్వల్పంగా పెరిగి 7.8 శాతానికి చేరుకున్నది.
లేబర్ పార్టిసిపేషన్ రేట్ (ఎల్పీఆర్) 2023 జూన్లో 39.9శాతంగా ఉండా.. అది 2024 మే నాటికి 40.8 శాతానికి, జూన్ నాటికి 41.4 శాతానికి పెరిగింది. మరోవైపు గ్రామీణ నిరుద్యోగిత ఈ ఏడాది మే నెలలో 6.3 శాతం ఉండగా అది జూన్ నాటికి 9.3 శాతానికి పెరిగింది. ఇక పట్టణ ప్రాంత నిరుద్యోగిత రేటు ఇదే కాలంలో 8.6 శాతం నుంచి 8.9 శాతానికి పెరిగింది. ఇటువంటి సవాళ్లను ఎదుర్కొనేందుకు ఆలోచనాత్మక విధానాలు రూపొందించాల్సి ఉందని నివేదిక తెలిపింది.
సంవత్సరం | నిరుద్యోగిత రేటు |
2024 | 9.2 (జూన్ వరకు) |
2023 | 8.003 |
2022 | 7.33 |
2021 | 5.98 |
2020 | 8.00 |
2019 | 5.27 |
2018 | 5.33 |
2017 | 5.36 |
2016 | 5.42 |
2015 | 5.44 |
2014 | 5.44 |
2013 | 5.42 |
2012 | 5.41 |
2011 | 5.43 |
2010 | 5.55 |
2009 | 5.54 |
2008 | 5.41 |
ఆధారం : సీఎంఐఈ