Summer | AC
తెలుగు రాష్ట్రాల్లో పలు ప్రాంతాల్లో అత్యధిక ఉష్ణోగ్రతలు నమోదవుతున్నాయి. ఫ్యాన్లు, కూలర్లు వేడి నుంచి ఉపశమనం ఇవ్వలేకపోతున్నాయి. దీంతో చాలామంది ఏసీలు కొనుగోలు చేస్తున్నారు. అయితే, ఖరీదైన ఏసీలు కొనకుండా, కేవలం రూ.50 ఖర్చుతో కూలర్‌ను ఏసీలా మార్చే సులభమైన ట్రిక్ సోషల్ మీడియాలో వైరల్ అవుతోంది.వేసవిలో ఏసీల వాడకం పెరగడంతో విద్యుత్ బిల్లు భారంగా మారుతుంది.
ఈ ఖర్చును భరించలేనివారు కూలర్లతో వినూత్న ప్రయోగాలు చేస్తున్నారు. కొందరు కూలర్ నీటిలో మంచు గడ్డలు వేసి చల్లదనాన్ని పొందుతున్నారు. కానీ, మంచు గడ్డలను సిద్ధం చేయడం లేదా కొనుగోలు చేయడం ఖర్చుతో కూడుకున్న పని. అందుకే ఈ రూ.50 ట్రిక్ సులభమైన, ఆర్థికమైన పరిష్కారంగా నిలుస్తుంది.
కావాల్సినవి: కేవలం రూ.50 విలువైన మట్టి కుండ ఒకటి సరిపోతుంది. ఇంట్లో పాత కుండ ఉంటే, దాన్ని బేకింగ్ సోడా ద్రావణంతో శుభ్రం చేసి ఉపయోగించవచ్చు. లేకపోతే, మార్కెట్ నుంచి కొత్త కుండ కొనుగోలు చేయవచ్చు. పగిలిన కుండ ముక్కలు కూడా ఈ ప్రయోగంలో ఉపయోగపడతాయి.
ట్రిక్ ఎలా చేయాలి:
కుండ కింది భాగంలో కూలర్ వాటర్ మోటార్ సైజుకు సరిపోయే గుండ్రని రంధ్రం చేయండి.
కుండను కూలర్ ట్యాంక్ మధ్యలో అమర్చండి.
రంధ్రంలో కూలర్ మోటార్‌ను బిగించండి.
పగిలిన కుండ ముక్కలను కూలర్ ట్యాంక్‌లో వేయండి.
కూలర్‌లో నీళ్లు నింపి ఆన్ చేయండి.
ఫలితం: ఈ ట్రిక్‌తో కూలర్ నుంచి వచ్చే గాలి సాధారణం కంటే చల్లగా ఉంటుంది. మట్టి కుండ, పెంకులు నీటిని చల్లగా మార్చడంతో ఏసీవంటి చల్లదనం లభిస్తుంది.
ఒక్కసారి రూ.50 ఖర్చు చేస్తే, పునరావృత ఖర్చులు లేకుండా కూలర్ ఏసీలా పనిచేస్తుంది. మంచు గడ్డలు వాడే పద్ధతుల కంటే ఇది ఆర్థికమైన, సులభమైన ఆలోచన. సోషల్ మీడియాలో ఈ ట్రిక్ వైరల్ కావడానికి కారణం బడ్జెట్‌కు సరిపడే, అందరూ సులభంగా ప్రయత్నించగల సరళమైన ఐడియా. ఈ వేసవిలో వడదెబ్బ నుంచి రక్షణ పొందడానికి ఇంతకంటే సులభమైన, ఆర్థికమైన పరిష్కారం మరొకటి లేదు.