Chicken Liver | ఆదివారం వ‌చ్చిందంటే చాలు.. మాంసాహారం వైపు మ‌న‌సు లాగేస్తుంటుంది. మేక మాంస‌మో, కోడి కూర‌నో, లేదంటే చేప‌ల పులుసో తినాల‌పిస్తుంటుంది. ఈ మూడింటింలో ఏదో ఒక‌టి మాత్రం మ‌న మెనూలో తప్ప‌కుండా ఉంటుంది. మ‌ధ్య త‌ర‌గ‌తి కుటుంబాలైతే చికెన్ వైపే మొగ్గు చూపుతారు. చికెన్ లివ‌ర్‌ను కూడా ఇష్ట‌ప‌డే వాళ్లు ఉంటారు.
చికెన్ లివ‌ర్‌లో కూడా వివిధ పోష‌కాలు ఉంటాయి. ఇవి శ‌రీరానికి ఎంతో ఉప‌యోగ‌ప‌డుతాయి. మ‌రి ఈ చికెన్ లివ‌ర్‌ను ర‌క‌ర‌కాలుగా వండుతారు. కొందరు క‌ర్రీ చేస్తారు. ఇంకొంద‌రు ఫ్రై చేసుకుంటారు. ఈ విధంగా చికెన్ లివ‌ర్‌ను ఫ్రై చేసుకుంటు.. లొట్టలేసుకుంటూ ఆర‌గిస్తారు. చికెన్ లివర్ వేపుడును త‌యారు చేయ‌డం కూడా చాలా సుల‌భం. కేవ‌లం అర‌గంట‌లోనే త‌యారు చేయొచ్చు.
చికెన్ లివర్ వేపుడు త‌యారీకి కావ‌ల్సిన ప‌దార్థాలు..
చికెన్ లివర్ – అర కిలో, పొడుగ్గా త‌రిగిన ఉల్లిపాయ‌లు – 2, త‌రిగిన ప‌చ్చిమిర్చి – 4, త‌రిగిన క‌రివేపాకు – ఒక రెమ్మ, అల్లం – ఒక ఇంచు ముక్క, ఎండు కొబ్బ‌రి ముక్క- ఒక ఇంచు ముక్క, వెల్లుల్లి రెబ్బ‌లు – 8, ధ‌నియాలు – ఒక టేబుల్ స్పూన్, ల‌వంగాలు – 7, జీల‌క‌ర్ర -అర టీ స్పూన్, దాల్చిన చెక్క – ఒక ఇంచు ముక్క, నూనె – 4 టేబుల్ స్పూన్స్, ఉప్పు – త‌గినంత, ప‌సుపు – అర టీ స్పూన్, కారం – ఒక‌టిన్న‌ర టీ స్పూన్, త‌రిగిన కొత్తిమీర – కొద్దిగా.
చికెన్ లివర్ వేపుడు త‌యారీ విధానం..
ముందుగా చికెన్ లివ‌ర్‌ణు ముక్క‌లు ముక్క‌లుగా క‌ట్ చేసుకోవాలి. అనంత‌రం చికెన్ లివ‌ర్‌ను నీటితో శుభ్రంగా క‌డ‌గాలి. ఇక స్టౌ వెలిగించి ఓ పాత్ర‌లో ధ‌నియాలు, ల‌వంగాలు, జీల‌క‌ర్ర, దాల్చిన చెక్క వేసి దోర‌గా వేయించాలి. దోర‌గా వేయించిన వీటిని ఓ జార్‌లోకి తీసుకొని, ఇందులో వెల్లుల్లి రెబ్బ‌లు, అల్లం, ఎండు కొబ్బ‌రి ముక్క‌లు వేసి మిక్సీ ప‌ట్టాలి.
ఇక క‌ళాయిలో పొయ్యి మీద ఉంచి నూనె వేసి వేడి చేయాలి. నూనె వేడి అయిన త‌ర్వాత ఉల్లిపాయ ముక్క‌లు, ప‌చ్చి మిర్చి వేసి వేయించాలి. రెండు నిమిషాల పాటు వేయించిన త‌ర్వాత క‌రివేపాకు వేయాలి. అనంత‌రం చికెన్ లివర్ ముక్క‌లు, ఉప్పు వేసి కలపాలి. చికెన్ లివ‌ర్‌తో కూడిన పాత్ర‌పై మూత పెట్టి 15 నిమిషాల పాటు మ‌ధ్య మ‌ధ్య‌లో క‌లుపుతూ వేయించాలి.
ఇలా వేయించిన త‌రువాత ప‌సుపు వేసి కలపాలి. ఇప్పుడు మూత పెట్టి మ‌రో 10 నిమిషాల పాటు వేయించాలి. లివర్ ముక్క‌లు వేగిన త‌రువాత కారం, మిక్సీ ప‌ట్టుకున్న పొడి వేసి అంతా క‌లిసేలా క‌లుపుకోవాలి. వీటిని మ‌రో రెండు నిమిషాల పాటు వేయించి కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే చికెన్ లివర్ వేపుడు త‌యార‌వుతుంది. దీనిని సైడ్ డిష్ గా తింటే చాలా రుచిగా ఉంటుంది. ఈ లివర్ వేపుడును అంద‌రూ ఎంతో ఇష్టంగా తింటారు.