Indians: విదేశాలపై.. తగ్గిన భారతీయుల మోజు!

విధాత: విదేశాల పట్ల భారతీయ విద్యార్ధుల మోజు క్రమంగా తగ్గిపోతుందా అంటే అవునంటున్నాయి గణంకాలు. ఐదేళ్లలో తొలిసారిగా విదేశాలకు వెళ్లే భారతీయ విద్యార్థుల సంఖ్య గణనీయంగా తగ్గిపోయింది. ప్రధానంగా కెనడా(Canada), అమెరికా(USA), యూకే(UK) దేశాలకు వెళ్లే సంఖ్య భారీగా పడిపోయింది. 2024లో ఈ మూడు దేశాల నుంచి భారతీయ విద్యార్థులకు లభించే స్టూడెంట్‌ వీసాల్లో 25శాతం తగ్గుముఖం పట్టాయి. ఇందుకు ఆ దేశాల నుంచి ఎదురైన వీసా తిరస్కరణలు కూడా కారణం కావచ్చని విశ్లేషకులు భావిస్తున్నారు.

ఐదేళ్లలో తగ్గిన వలసలు

కెనడాకు వెళ్లేవారి సంఖ్య ఐదేళ్లలో 32శాతం తగ్గింది. ఇది 2.78లక్షల నుంచి 1.89 లక్షలకు పడిపోయింది. ఈ వివరాలను ఇమ్మిగ్రేషన్‌, రెఫ్యూజీస్‌ అండ్‌ సిటిజన్‌షిప్‌ కెనడా సంస్థ వెల్లడించింది. అమెరికాకు వెళ్లే వారి సంఖ్య 34 శాతం పడిపోయింది. దీంతో 2024లో అంతకు ముందు ఏడాదితో పోలిస్తే ఎఫ్‌1 వీసాల్లో 1,31,000 నుంచి 86,000కు తగ్గుదల నమోదైంది. యూకేకు వెళ్లే వారి సంఖ్య 26శాతం తగ్గింది. అంతకు ముందు ఏడాది 1,20,000 విద్యార్థి వీసాలు ఉండగా.. తాజాగా యూకే హోమ్‌ ఆఫీస్‌ లెక్కల ప్రకారం 2024 ఆర్థిక సంవత్సరంలో 88,732కు తగ్గాయి.

కారణాలపై మధనం

కెనడా, యూకే దేశాలు విద్యార్థి వీసాలపై పరిమితులు విధించడం, కెనడా – భారత్‌ మధ్య ఉద్రిక్తతలు నెలకొనడం..ఆ దేశంలో భారతీయ విద్యార్థులపై పలు ఆంక్షలు విధించిండంతో విద్యార్ధుల వలసలు తగ్గాయి. కెనడా తమ దేశంలో తాత్కాలికంగా నివశించే విదేశీయు సంఖ్యను 2026 నాటికి 5 శాతానికి తగ్గించాలన్న నిర్ణయం ప్రభావం కూడా ప్రభావం చూపింది. విదేశీ విద్యార్థుల సంఖ్య భారీగా ఉండటంతో గృహ, ఆరోగ్య, ఇతర ప్రజాసేవలకు కొరత ఏర్పడుతుందంటూ భారతీయ విద్యార్థులకు కేటాయించే స్టడీ పర్మిట్లను 32శాతం తగ్గించింది. అదే సమయంలో చైనీయులకు 3శాతానికి కుదించింది.

యూకే కూడా విదేశీ విద్యార్థులు వారిపై ఆధారపడిన వారిని తీసుకురాకుండా నిబంధనలు విధించింది. ఈ కారణంతో ఆ దేశానికి వీసాకు దరఖాస్తు చేసేవారి సంఖ్య తగ్గింది. వాస్తవానికి కొవిడ్‌ తర్వాత 2023 నుంచే భారతీయులకు విద్యార్థి వీసాలు ఇవ్వడం తగ్గించింది. ఆ ఏడాది 13 శాతం తగ్గుదల కనిపించింది. ఇక 2024లో అది 26శాతానికి పరిమితమైంది. గత పదేళ్లలో ఈ మూడు దేశాల్లో భారతీయ విద్యార్థులు సంఖ్య అత్యంత వేగంగా పెరిగింది. ఒక దశలో చైనా విద్యార్థుల సంఖ్యను దాటేశారు. 2015 నుంచి 23 మధ్య కెనడా వెళ్లే భారత విద్యార్థుల సంఖ్య 31,920 నుంచి 2,78,160కు చేరుకొంది. ఇదే కాలంలో యూకేకు వెళ్లేవారి సంఖ్య 10, 418 నుంచి 1,19,738 చేరుకొంది. అమెరికాకు 2015లో 74,831 మంది ఎఫ్‌1 వీసాపై వెళ్లగా.. 2023లో అది 1,30,730గా ఉంది. అయితే గడిచిన ఐదేళ్ల లెక్కలు చూస్తే విద్యార్ధి వలసలు గణనీయంగా తగ్గిపోయాయి.