ISRO’s Baahubali Rocket | అమెరికా ఉపగ్రహాన్ని విజయవంతంగా కక్ష్యలో ప్రవేశపెట్టిన ఇస్రో LVM3-M6 రాకెట్

భారత అంతరిక్ష పరిశోధన సంస్థ ఇస్రో మరో చారిత్రక విజయాన్ని సాధించింది. డిసెంబర్ 24, 2025న శ్రీహరికోట నుంచి ప్రయోగించిన LVM3-M6 (బాహుబలి) రాకెట్, 6,100 కేజీల బరువున్న బ్లూబర్డ్ బ్లాక్-2 కమ్యూనికేషన్ ఉపగ్రహాన్ని 520 కిలోమీటర్ల ఎత్తులోని దిగువ భూకక్ష్యలో విజయవంతంగా ప్రవేశపెట్టింది.

ISRO’s Baahubali Rocket LVM3-M6 Places Heaviest-Ever Satellite into Low Earth Orbit

(విధాత సైన్స్​ డెస్క్​)

శ్రీహరికోట, డిసెంబర్​ 24: భారత అంతరిక్ష పరిశోధన సంస్థ ఇస్రో మరో చారిత్రక విజయాన్ని తన ఖాతాలో వేసుకుంది. డిసెంబర్ 24, 2025 బుధవారం ఉదయం 8:55 గంటలకు శ్రీహరికోటలోని సతీష్ ధావన్ స్పేస్ సెంటర్ రెండో లాంచ్ ప్యాడ్ నుంచి ప్రయోగించిన LVM3-M6 (బాహుబలి) రాకెట్, అమెరికాకు చెందిన బ్లూబర్డ్ బ్లాక్-2 కమ్యూనికేషన్ ఉపగ్రహాన్ని ఖచ్చితంగా కక్ష్యలో ప్రవేశపెట్టింది. సుమారు 15 నిమిషాల ప్రయాణానంతరం ఈ ఉపగ్రహం భూమి ఉపరితలం నుంచి 520 కిలోమీటర్ల ఎత్తులోని దిగువ భూకక్ష్య(లో ఎర్త్ ఆర్బిట్)లో విజయవంతంగా ప్రవేశించింది.

6,100 కేజీల బరువున్న ఈ ఉపగ్రహం, భారతీయ రాకెట్‌తో భారత భూమి నుంచి ప్రయోగించిన అతి భారీ పేలోడ్‌గా రికార్డు సృష్టించింది. ఇప్పటివరకు ఈ ఘనత 4,400 కేజీల CMS-03 ఉపగ్రహం పేరిట ఉండేది. ఈ మిషన్‌తో ఒకేసారి రెండు కీలక మైలురాళ్లు సాధించామని ఇస్రో స్పష్టం చేసింది. దిగువ భూకక్ష్యలో అతి భారీ ఉపగ్రహాన్ని పంపిన దేశంగా భారత్ నిలవడమే కాకుండా, అతి పెద్ద కమర్షియల్ కమ్యూనికేషన్ ఉపగ్రహాన్ని కూడా విజయవంతంగా మోహరించింది.

ప్రయోగానికి ముందు 24 గంటల కౌంట్‌డౌన్ పూర్తైనప్పటికీ, ప్రయోగ మార్గంలో అంతరిక్ష చెత్త లేదా ఇతర ఉపగ్రహాలతో ఢీకొనే అవకాశం ఉందన్న అంచనాతో ఇస్రో 90 సెకన్ల పాటు లిఫ్టాఫ్‌ను వాయిదా వేసింది. ఇది పూర్తిగా భద్రతా దృష్టితో ముందుజాగ్రత్తగా తీసుకున్న నిర్ణయమని అధికారులు తెలిపారు. అనంతరం అనుకూల పరిస్థితులు ఏర్పడటంతో రాకెట్ నింగికెగిసింది. రెండు S200 సాలిడ్ బూస్టర్లు, L110 లిక్విడ్ కోర్ స్టేజ్, C25 క్రయోజెనిక్ అప్పర్ స్టేజ్‌లు వరుసగా విజయవంతంగా పనిచేసి ఉపగ్రహాన్ని దిగువ భూకక్ష్యలోకి చేర్చాయి.

గ్లోబల్ కమర్షియల్ స్పేస్ రంగంలో భారత్ కీలక అడుగు

బ్లూబర్డ్ బ్లాక్-2 ఉపగ్రహాన్ని అమెరికాకు చెందిన AST SpaceMobile అభివృద్ధి చేసింది. ఇది తదుపరి తరం బ్లూబర్డ్ బ్లాక్-2 శ్రేణిలో భాగం. సాధారణ మొబైల్ ఫోన్‌లకే నేరుగా స్పేస్ నుంచి 4G, 5G వాయిస్, వీడియో కాల్స్, టెక్స్ట్, డేటా, స్ట్రీమింగ్ సేవలు అందించడమే ఈ ఉపగ్రహం ప్రధాన లక్ష్యం. ప్రత్యేక శాటిలైట్ ఫోన్లు లేదా అదనపు పరికరాలు అవసరం లేకుండా, దూరప్రాంతాలు, సముద్రాలు, ఎడారులు వంటి చోట్ల కూడా కనెక్టివిటీ కల్పించనుంది.

223 చదరపు మీటర్ల విస్తీర్ణం కలిగిన ఫేజ్డ్ అర్రే యాంటెన్నాతో ఈ ఉపగ్రహం, దిగువ భూకక్ష్యలో ఇప్పటివరకు ప్రయోగించిన అతి పెద్ద కమర్షియల్ కమ్యూనికేషన్ ఉపగ్రహంగా గుర్తింపు పొందింది. ఈ మిషన్, ఇస్రో వాణిజ్య విభాగమైన న్యూ స్పేస్ ఇండియా లిమిటెడ్ మరియు AST SpaceMobile మధ్య కుదిరిన కమర్షియల్ ఒప్పందం కింద చేపట్టారు.

ఈ ప్రయోగం LVM3 రాకెట్‌కు ఆరో ఆపరేషనల్ ఫ్లైట్ కాగా, మూడో పూర్తిస్థాయి కమర్షియల్ మిషన్. గతంలో చంద్రయాన్-2, చంద్రయాన్-3, OneWeb ఉపగ్రహాల ప్రయోగాలతో తన సామర్థ్యాన్ని నిరూపించిన LVM3, ఈ మిషన్‌తో గ్లోబల్ కమర్షియల్ లాంచ్ మార్కెట్‌లో భారత్ విశ్వసనీయతను మరింత పెంచింది. కేవలం 52 రోజుల వ్యవధిలో వరుసగా రెండు LVM3 ప్రయోగాలు విజయవంతం కావడం ఇస్రో సాంకేతిక సమర్థతకు నిదర్శనంగా నిలిచింది.

ఇస్రో ఛైర్మన్ డా. వి. నారాయణన్ మాట్లాడుతూ, “LVM3-M6 మిషన్ అత్యంత ఖచ్చితత్వంతో బ్లూబర్డ్ బ్లాక్-2ను లక్ష్య దిగువ భూకక్ష్యలో ఉంచింది. ఇది గ్లోబల్ లాంచ్ వెహికల్స్‌లో అత్యుత్తమ ప్రదర్శనల్లో ఒకటి. ఇప్పటివరకు భారత్ 34 దేశాలకు 434 ఉపగ్రహాలను విజయవంతంగా ప్రయోగించింది” అని తెలిపారు.

What a moment! Relive the #LVM3M6 liftoff highlights here:

For More information Visit:https://t.co/PBYwLU4Ogy
#LVM3M6 #BlueBirdBlock2 #ISRO #NSIL pic.twitter.com/hc4SoI5DI5

— ISRO (@isro) December 24, 2025

ప్రధానమంత్రి నరేంద్ర మోదీ ఈ ప్రయోగాన్ని భారత అంతరిక్ష రంగంలో కీలక మైలురాయిగా అభివర్ణించారు. భారీ లిఫ్ట్ సామర్థ్యం మరింత బలపడటంతో గగన్‌యాన్ వంటి భవిష్యత్ మిషన్లకు బలమైన పునాది పడిందని పేర్కొన్నారు. ఈ విజయం, గ్లోబల్ కమర్షియల్ స్పేస్ రంగంలో భారత్ కీలక శక్తిగా ఎదుగుతున్నదనే సంకేతంగా నిపుణులు విశ్లేషిస్తున్నారు.