హైదరాబాద్, నవంబర్ 08(విధాత): కేంద్ర మంత్రి కిషన్ రెడ్డి, సీఎం రేవంత్ రెడ్డి పెద్దమ్మ, చిన్నమ్మ కొడుకుల్లా ఉంటారని మాజీ ఎమ్మెల్యే, బీఆర్ఎస్ నాయకుడు బల్కా సుమన్ అన్నారు. బండి సంజయ్ తెలంగాణలో రేవంత్ రెడ్డికి సహాయ మంత్రిగా పని చేస్తున్నారు. బీజేపీ సీఎంకు దొరకని అపాయింట్మెంట్ రేవంత్ రెడ్డికి దొరుకుతుందని చెప్పారు. బీజేపీ ఎంపీలతో రేవంత్ రెడ్డి దగ్గరగా వుంటారు. బీజేపీ ఎంపీకి రేవంత్ రెడ్డి కాంట్రాక్టు ఇచ్చారు. టీడీపీలో ఉన్నప్పుడు బీజేపీ ఎంపీతో రేవంత్ రెడ్డికి సన్నిహిత సంబంధాలు ఉన్నాయన్నారు. తెలంగాణ బీజేపీ ఎంపీలు రేవంత్ రెడ్డి కోసం పని చేస్తున్నారన్నారు.
తిరుపతి రెడ్డి,కొండల్ రెడ్డి కంటే ఎక్కువగా రేవంత్ రెడ్డిని బీజేపీ ఎంపీలు కాపాడుతున్నారు. బీజేపీ ఎంపీలు మెంబర్ ఆఫ్ రేవంత్ రెడ్డిగా మారారని ఆరోపించారు. రామ్ కో సిమెంట్ కంటే దృఢమైన బంధం కిషన్ రెడ్డికి,రేవంత్ రెడ్డికి ఉందని బల్కా సుమన్ అన్నారు. జూబ్లీహిల్స్ ఉప ఎన్నికల్లో రేవంత్ రెడ్డి ఓటమిని ఒప్పుకున్నారు. గల్లీ, గల్లీ సీఎం తిరుగుతున్నారు అంటేనే.. ఓటర్లను, బిఆర్ఎస్ వాళ్ళను భయపెట్టే విధంగా మాట్లాడుతున్నారు అంటేనే ఓటమి భయం కనపడుతుందన్నారు. ఎన్నడూ లేని విధంగా సీఎం తొమ్మిది రోజులు జూబ్లీహిల్స్ ఉప ఎన్నికల్లో ప్రచారం చేశారని అన్నారు. రేవంత్ రెడ్డి భాష చూస్తుంటే కాంగ్రెస్ పార్టీ ఓటమి ఖాయంగా కనిపిస్తోందని ధీమా వ్యక్తం చేశారు.
నిన్న బరితెగించి ఎమ్మెల్సీ తక్కెళ్లపల్లి రవీందర్ రావు,మాజీ ఎమ్మెల్యే మర్రి జనార్దన్ రెడ్డి ఇంటిపై పోలీసులు రైడ్ చేశారు. జూబ్లీహిల్స్ నియోజకవర్గ పరిధిలోకి వారి ఇళ్ళు రాకపోయినా రైడ్స్ చేశారు. ఎమ్మెల్సీ తక్కెళ్లపల్లి రవీందర్ రావు నివాసంలో సోదాలు చేసి ఏమీ దొరకలేదని పోలీసులు చెప్పారన్నారు.