విధాత, హైదరాబాద్ :
ఆన్‌లైన్ బెట్టింగ్ భూతం ఎవరినీ వదలడం లేదు. చాలా మంది ఈ వ్యసనానికి అలవాటు పడి కోట్లలో నష్టపోతున్నారు. ఈ క్రమంలో పౌరులను ఇలాంటి వాటి నుంచి రక్షించాల్సిన పోలీసులు కూడా ఆన్ లైన్ బెట్టింగ్ కు పాల్పడుతున్నారు. ఇలా బెట్టింగ్‌లో డబ్బులు పోగొట్టుకున్న కొందరు కానిస్టేబుళ్లు కూడా ఆత్మహత్యకు పాల్పడిన ఘటనలు చూశాం. ఈ క్రమంలో తాజాగా ఓ ఎస్ఐ ఆన్‌లైన్ బెట్టింగ్ కు బానిపై కోట్లు పోగొట్టుకున్నాడు. ఏపీ – రాయచోటికి చెందిన భాను ప్రకాష్.. అంబర్‌పేట్ పీఎస్‌లో క్రైమ్ బ్రాంచ్ ఎస్ఐగా విధులు నిర్వహిస్తున్నాడు. ఈ నేపథ్యంలో తాజాగా ఏపీలో ఎలక్ట్రిక్ ఏఈ ఉద్యోగం వచ్చిందని రిలీవ్ యాలని ఎస్ఐ ఉన్నతాధికారులను కోరారు. దీంతో వెపన్ డిపాజిట్ చేయాలని కోరడంతో కీలక ఉదంతం బయటపడింది.
పోలీసులు తెలిపిన వివరాల ప్రకారం.. ఆన్‌లైన్ బెట్టింగ్ కు బానిసైన ఎస్ఐ భాను ప్రకాశ్ డబ్బులు పోగొట్టుకుని ఓ దొంగతనం కేసులో స్వాధీనం చేసుకున్న బంగారాన్ని కుదువ పెట్టాడు. లోక్ అదాలత్‌లో కేసు పరిష్కారమై, యజమాని బంగారం తిరిగి అడగగా, కనిపించడం లేదని ఎస్ఐ భాను ప్రకాశ్ చెప్పాడు. దీంతో విచారణ ప్రారంభించిన పోలీసులకు భాను ప్రకాశ్ కు సంబంధించి కీలక విషయాలు వెలుగులోకి వచ్చాయి. పోలీస్ ఉద్యోగానికి ఎంతో విలువైన సర్వీస్ రివాల్వర్ ను కూడా కుదువపెట్టినట్లు పోలీసులు తెలిపారు.
ఎస్ఐ ఆన్‌లైన్ బెట్టింగ్ అలవాటు పడిన భాను ప్రకాష్ రూ.కోటిన్నర పోగొట్టుకున్నాడు. అలాగే, ఓ దొంగతనం కేసులో స్వాధీనం చేసుకున్న 4.3 తులాల బంగారాన్ని ఓ దుకాణంలో కుదువ పెట్టినట్లు గుర్తించారు. అలాగే, 2018 నుండి ఆన్‌లైన్ బెట్టింగ్‌లకు బానిసై సర్వీస్ రివాల్వర్‌ను కుదువ పెట్టినట్లు తేలింది. దీంతో విచారించి ఆ దుకాణం నుండి బంగారాన్ని రికవరీ చేసి, భాను ప్రకాష్‌ను అదుపులోకి తీసుకొని పోలీసులు విచారించగా ఈ విషయాలు బయటపడ్డాయి. అయితే, రివాల్వర్ కు సంబంధించి ఇంకా విచారణ కొనసాగుతోంది.