February 2026 ‘Miracle Month’ Viral Claim: Fact Check and Reality Explained
ఫిబ్రవరి 2026 ‘మిరాకిల్ మంత్’ అంటూ సోషల్ మీడియాలో ప్రచారం జరుగుతోంది. అయితే ఇది పూర్తిగా తప్పు. 2026 లీప్ ఇయర్ కాదు కాబట్టి ఫిబ్రవరిలో 28 రోజులు మాత్రమే ఉంటాయి. నాలుగు వారాలున్న నెలలో ప్రతి రోజు నాలుగు సార్లు రావడం సహజం. ఇందులో ఎలాంటి అద్భుతం లేదు. 823 ఏళ్ల కథకు శాస్త్రీయ ఆధారం లేదు.
విధాత వైరల్ డెస్క్ | హైదరాబాద్:
Fact Check : Miracle Month | సోషల్ మీడియాలో ఇటీవల ఓ పుకారు వేగంగా షికారు చేస్తోంది. ఫిబ్రవరి 2026 నెల ‘మిరాకిల్ మంత్’ అని, ఇలాంటి నెల మళ్లీ రావాలంటే 823 సంవత్సరాలు వేచి చూడాల్సి ఉంటుందని ఆ మెసేజ్లో పేర్కొంటున్నారు. ప్రతి వారంలో వచ్చే అన్ని రోజులు నాలుగు సార్లు మాత్రమే వస్తాయని చెబుతూ, దీనిని ఓ అద్భుతమైన సంఘటనగా ప్రచారం చేస్తున్నారు.
కానీ వాస్తవానికి ఈ ప్రచారం పూర్తిగా తప్పు. క్యాలెండర్ సూత్రాలను సరిగ్గా అర్థం చేసుకోకపోవడం వల్ల ఇలాంటి అపోహలు ఏర్పడుతున్నాయని నిపుణులు చెబుతున్నారు. మరి ఫిబ్రవరి 2026 నిజంగా అరుదైన నెలేనా? లేక ఇది సాధారణ ప్రక్రియేనా? పూర్తి వివరాలు ఇప్పుడు తెలుసుకుందాం.
ఫిబ్రవరి 2026లో ఏదైనా ప్రత్యేకత ఉందా?
2026 సంవత్సరం లీప్ ఇయర్ (ఫిబ్రవరిలో 29 రోజులుండే ఏడాది) కాదు. అందువల్ల ఫిబ్రవరి నెలలో 28 రోజులు మాత్రమే ఉంటాయి. 28 రోజులు అంటే నాలుగు పూర్తి వారాలు. ఒక వారం అంటే ఏడు రోజులు. నాలుగు వారాలుంటే ప్రతి రోజు నాలుగు సార్లు రావడం మామూలే కదా.
అంటే—
- 4 ఆదివారాలు
- 4 సోమవారాలు
- 4 మంగళవారాలు
- 4 బుధవారాలు
- 4 గురువారాలు
- 4 శుక్రవారాలు
- 4 శనివారాలు
ఇందులో ఎలాంటి అద్భుతం లేదు. ప్రతి నాన్-లీప్ ఇయర్ ఫిబ్రవరిలో ఉండే సాధారణ క్యాలెండర్ వ్యవహారం మాత్రమే. అయితే ఈ ఫిబ్రవరి ఆదివారం నాడు ప్రారంభం కావడం వల్ల అన్ని వారాలు సమంగా కనబడుతున్నాయి..అంతే.
823 ఏళ్లకోసారి వస్తుందన్న ప్రచారం ఎంతవరకు నిజం?
వైరల్ మెసేజ్లలో చెప్పే 823 సంవత్సరాల లెక్కకు ఎలాంటి శాస్త్రీయ ఆధారం లేదు. క్యాలెండర్ నిపుణుల ప్రకారం, ఆదివారంతో ప్రారంభమయ్యే 28 రోజుల ఫిబ్రవరి నెలలు తరచూ వస్తూనే ఉంటాయి.
ఉదాహరణకు:
- 2015
- 2026
- 2037
సుమారు 5 నుంచి 11 ఏళ్ల వ్యవధిలో ఇదే పద్ధతి మళ్లీ మళ్లీ కనిపిస్తుంది.
ఇక ‘MiracleIn’ అనే పదానికి గణితం, ఖగోళశాస్త్రం లేదా క్యాలెండర్ విజ్ఞానంలో ఎలాంటి గుర్తింపు లేదు. అలాగే 25 గంటల రోజు వస్తుందన్న ప్రచారం కూడా పూర్తిగా అవాస్తవమే.
క్యాలెండర్ విశ్లేషకులు చెబుతున్నదేమిటంటే…
“ఇది సాధారణ నాలుగు వారాల ఫిబ్రవరి మాత్రమే. ఇందులో ప్రత్యేక గణితపరమైన లేదా ఖగోళపరమైన విశేషం ఏమీ లేదు. ప్రతి కొన్నేళ్లకోసారి ఇలాంటి నెలలు వస్తూనేఉంటాయి.”
ఫిబ్రవరి 2026 నెల అద్భుతమేమీ కాదు. ఇది అరుదైన సంఘటన కూడా కాదు. సోషల్ మీడియాలో ప్రచారంలో ఉన్న 823 ఏళ్ల కథ పూర్తిగా తప్పుడు అవాస్తవం. ఇది కేవలం 28 రోజులున్న సాధారణ ఫిబ్రవరి మాత్రమే.