Whats App | సిమ్ లేకుండా వాట్సాప్ వాడుతున్నారా? ఈ కొత్తరూల్ తెలుసుకోండి

By: chinna | business | Published on : Nov 30, 2025 8:20 PM IST

ఇండియాలో వాట్సాప్ వినియోగంపై పెద్ద మార్పులు రాబోతున్నాయి. ఇకపై సిమ్ లేకుండానే వాట్సాప్ ఉపయోగించడం సాధ్యం కాకపోవచ్చనే సూచనలు కనిపిస్తున్నాయి. దేశంలో సైబర్‌ సెక్యూరిటీని బలోపేతం చేసేందుకు కేంద్ర టెలికమ్యూనికేషన్ సైబర్‌ సెక్యూరిటీ సవరణ నియమాలు–2025ను విడుదల చేసింది. ఈ కొత్త నిబంధనల ప్రకారం, వాట్సాప్‌తో పాటు ఇతర మెసేజింగ్ యాప్‌లు కూడా వినియోగదారుల ఖాతాలను తప్పనిసరిగా యాక్టివ్ సిమ్‌కార్డ్‌తో అనుసంధానంగా ఉంచాలి. ఆన్‌లైన్‌ మోసాలు, నకిలీ మోసాలు, స్పామ్‌ కార్యకలాపాలు పెరుగుతున్న నేపథ్యంలో ఈ నిర్ణయం తీసుకున్నట్లు కేంద్రం వెల్లడించింది.

వాట్సాప్‌ను టెలికమ్యూనికేషన్ ఐడెంటిఫయర్ యూజర్ ఎంటీటీ (TIUE)గా వర్గీకరించిన కేంద్రం.. మొబైల్‌ ఆపరేటర్ల మాదిరిగానే కఠిన నిబంధనలు పాటించాల్సి ఉంటుందని స్పష్టం చేసింది. యాప్‌లో రిజిస్టర్‌ చేసిన సిమ్‌ నెంబర్ యాక్టివ్‌గా ఉందో లేదో పర్యవేక్షించే విధంగా వ్యవస్థను మార్చాలని సూచించింది. సిమ్‌ తీసేసినా, మార్చినా లేదా డీయాక్టివేట్‌ అయినా వాట్సాప్ పనిచేయదు. ఈ మార్పులను అమలు చేసేందుకు 90 రోజుల గడువు విధించింది. అలాగే, వాట్సాప్ వెబ్ వెర్షన్ విషయంలో కూడా కీలక మార్పులు రాబోతున్నాయి. భద్రతా కారణాల దృష్ట్యా ప్రతి ఆరు గంటలకు ఆటోమేటిక్‌గా లాగ్‌ అవుట్‌ అయ్యేలా మారుస్తారు. తిరిగి యాక్సెస్ పొందేందుకు వినియోగదారులు మరోసారి క్యుఆర్ కోడ్ స్కాన్ చేయాల్సి ఉంటుంది.

యాప్‌ ఆధారిత కమ్యూనికేషన్ సర్వీస్‌ మరియు వారి సిమ్ కార్డ్ మధ్య ‘ఇన్‌స్టాలేషన్ సమయంలో ఒక్కసారి మాత్రమే జరిగే అనుసంధానం చేయడం కారణంగా అనేక దుర్వినియోగం జరుగుతోందని సెల్యులార్ ఆపరేటర్స్ అసోసియేషన్ ఆఫ్ ఇండియా (COAI) ఈ నిర్ణయానికి మద్దతు తెలిపింది. ఎప్పటికప్పుడు సిమ్ వెరిఫికేషన్ ఉండడం వల్ల ఈ లోపం తగ్గుతుందని అభిప్రాయపడింది. ముఖ్యంగా విదేశాల నుంచి నడుస్తున్న సైబర్ మోసాలను అరికట్టడంలో ఇది ఉపయోగపడుతుందని ప్రభుత్వం భావిస్తోంది. భారతదేశంలో 500 మిలియన్లకు పైగా ఉన్న వాట్సాప్ వినియోగదారులకు ఈ మార్పులు కొంత అసౌకర్యం కలిగించే అవకాశం ఉన్నప్పటికీ భద్రతా పరంగా లాభకరమవుతాయని అధికారులు చెబుతున్నారు. వైఫై ఆధారిత టాబ్లెట్లు ఉపయోగించే వారు, తరచుగా మొబైల్ మార్చుకునే వారు ఇబ్బందులు ఎదుర్కొనవచ్చు. సిమ్ కార్డ్ ఫిజికల్‌గా ఫోన్‌లో ఉంచకపోతే వాట్సాప్ పనిచేయదు.

అయితే సైబర్ నిపుణులు మాత్రం ఈ నిర్ణయంపై విభిన్న అభిప్రాయాలు వ్యక్తం చేస్తున్నారు. సిమ్ బైండింగ్‌ ఒక్కదానితోనే మోసాలు ఆగిపోవని, నకిలీ లేదా అద్దె ఐడీలతో కొత్త సిమ్‌లు తీసుకోవడం ఇప్పటికీ జరుగుతుందని విమర్శిస్తున్నారు. 2023లో వీడియో KYC, ఫేషియల్ రికగ్నిషన్ విధానాలు అమలు చేసినా, నకిలీ ఐడీల కేసుల్లో పెద్దగా తగ్గుదల కనిపించలేదని నిపుణులు సూచిస్తున్నారు. ఈ విమర్శలపై COAI స్పందిస్తూ, మొబైల్ నెంబర్ ఇప్పటికీ దేశంలో అత్యంత అప్‌డేటెడ్, పర్యవేక్షణలో ఉన్న గుర్తింపు సాధనమని, సైబర్ భద్రతను మరింత బలోపేతం చేసేందుకే ఈ చర్యలు అవసరమని వెల్లడించింది. ఇంకా 90 రోజుల్లో వాట్సాప్ ఈ మార్పులను అమలు చేయాల్సి ఉంటుంది. ఒకవేళ ఇవి అమల్లోకి వస్తే ఇకపై మీ వాట్సాప్ ఖాతా సిమ్ యాక్టివ్‌గా ఉన్నంత వరకే పనిచేస్తుంది. అదనంగా, వెబ్ వెర్షన్‌లో తరచూ లాగిన్ కావాల్సిన అవసరం రావచ్చు.