CORE, PURE, RARE రీజియన్లుగా తెలంగాణ అభివృద్ధి : సీఎం రేవంత్ రెడ్డి

తెలంగాణ రైజింగ్ -2047 పాలసీని ఆవిష్కరించేందుకు.. డాక్యుమెంట్ రూపకల్పన, సమ్మిట్ నిర్వహణపై డాక్టర్ బీఆర్‌ అంబేద్కర్ సచివాలయంలో మంత్రులు, ఉన్నతాధికారులతో ముఖ్యమంత్రి రేవంత్ రెడ్డి సమీక్షా సమావేశం నిర్వహించారు.

విధాత, హైదరాబాద్ :
రాష్ట్ర ప్రభుత్వం తెలంగాణ రైజింగ్ -2047 పాలసీని ఆవిష్కరించేందుకు ప్రతిష్ఠాత్మకంగా ఏర్పాట్లు చేస్తోంది. ఇందుకోసం వచ్చే నెల 8,9 తేదీల్లో రంగారెడ్డి జిల్లా కందుకూరు మండలం మీర్ ఖాన్ పేటలోని ఫ్యూచర్ సిటీలో తెలంగాణ రైజింగ్ సమ్మిట్ ను నిర్వహించనుంది. ఈ సందర్భంగా డాక్యుమెంట్ రూపకల్పన, సమ్మిట్ నిర్వహణపై డాక్టర్ బీఆర్‌ అంబేద్కర్ సచివాలయంలో మంత్రులు, ఉన్నతాధికారులతో ముఖ్యమంత్రి రేవంత్ రెడ్డి సమీక్షా సమావేశం నిర్వహించారు. అనంతరం ఆయన మీడియాతో మాట్లాడుతూ ప్రజలకు అభివృద్ధి చెందిన తెలంగాణను అందించడమే తమ ప్రభుత్వ లక్ష్యమని స్పష్టం చేశారు. రాష్ట్ర భవిష్యత్తును దృష్టిలో పెట్టుకుని పారదర్శక పాలసీలు రూపొందిస్తున్నామని, ఇచ్చిన ప్రతి హామీని నెరవేర్చేందుకు కట్టుబడి ఉన్నామని పేర్కొన్నారు.

విజన్ డాక్యుమెంట్‌లో రెండు ప్రధాన అంశాలు ఉన్నాయని అందులో ఒకటి విజన్, మరొకటి స్ట్రాటజీ అని వివరించారు. ఈ రూపకల్పనలో ప్రముఖులు, నిపుణుల సూచనలు తీసుకున్నట్లు చెప్పారు. హైదరాబాద్‌ ORR లోపల అనేక విభాగాల పరిపాలన ఉండటంతో ఆ ప్రాంతాన్ని కోర్ అర్బన్ రీజియన్‌గా, ORR–RRR మధ్య ప్రాంతాన్ని పెరి అర్బన్ రీజియన్‌గా గుర్తించినట్లు వెల్లడించారు. ఈ ప్రాంతాన్ని మ్యానుఫాక్చరింగ్‌ జోన్‌గా మార్చే లక్ష్యంతో ప్రభుత్వం ముందుకు సాగుతోందని చెప్పారు. కాలుష్య రహిత నగరంగా హైదరాబాద్‌ను అభివృద్ధి చేయాలన్న సంకల్పంతో కాలుష్యకారక పరిశ్రమలను నగరం నుంచి బయటకు తరలిస్తామని తెలిపారు. రాష్ట్ర కనెక్టివిటీ విస్తరణ కోసం గ్రీన్‌ఫీల్డ్‌ హైవేలు, బుల్లెట్‌ రైళ్లు, మరిన్ని ఎయిర్‌పోర్టులు అవసరమని, ఈ ప్రాజెక్టులకు కేంద్రాన్ని ఒప్పిస్తున్నామని పేర్కొన్నారు.

స్ట్రాటజీ ప్రకారం తెలంగాణను CORE, PURE, RARE అనే మూడు రీజియన్లుగా విభజించి సమగ్ర అభివృద్ధి చేపడతామని ప్రకటించారు. 2047 నాటికి తెలంగాణను మూడు ట్రిలియన్‌ డాలర్ల ఎకానమీగా మార్చడమే ప్రభుత్వ లక్ష్యమని సీఎం రేవంత్ర రెడ్డి పునరుద్ఘాటించారు. ఔటర్‌ రింగ్ రోడ్ వెలుపల కొత్తగా నిర్మించబోయే రీజినల్ రింగ్ రోడ్ (RRR) ద్వారా 360 కిలోమీటర్ల కొత్త రింగ్ హైదరాబాద్‌కు సిద్ధమవుతుందన్నారు. గ్రీన్‌ఫీల్డ్ హైవేలు, బుల్లెట్‌ ట్రైన్ ప్రాజెక్టులకు అనుమతులు ఇప్పటికే వచ్చినట్లు చెప్పారు. హైదరాబాదు–బెంగళూరు కనెక్టివిటీని మరింత పెంచే ప్రణాళికలు సిద్ధమవుతున్నాయని, వరంగల్, ఆదిలాబాద్, కొత్తగూడెం, రామగుండం ప్రాంతాల్లో కొత్త విమానాశ్రయాల కోసం ప్రభుత్వం వేగంగా పనిచేస్తోందని ముఖ్యమంత్రి రేవంత్ రెడ్డి తెలిపారు. అనంతరం గ్లోబల్ సమ్మిట్ కు సంబంధించి ఆహ్వానపత్రాన్ని సీఎం ఆవిష్కరించారు.