I Bomma Ravi | డొమైన్ పేర్ల వెనుక నిజాలు బయటకు .. ఐ బొమ్మ‌, బ‌ప్పం పేర్లు పెట్ట‌డానికి కార‌ణాలు చెప్పిన ర‌వి

I Bomma Ravi | పైరేటెడ్ సినిమా వెబ్‌సైట్ల కేసులో కీలక నిందితుడు ‘ఐ బొమ్మ’ రవి రెండో దఫా పోలీస్ కస్టడీ విచారణలో పలు ముఖ్యమైన వివరాలు వెలుగులోకి వచ్చాయి. ఐదు రోజుల కస్టడీ ముగియడంతో పోలీసులు మరో మూడు రోజుల అదనపు కస్టడీ కోరగా, ఈ కాలంలో ఇప్పటివరకు స్పష్టత లేని అంశాలపై రవితో వివరణ తీసుకున్నారు.

I Bomma Ravi | పైరేటెడ్ సినిమా వెబ్‌సైట్ల కేసులో కీలక నిందితుడు ‘ఐ బొమ్మ’ రవి రెండో దఫా పోలీస్ కస్టడీ విచారణలో పలు ముఖ్యమైన వివరాలు వెలుగులోకి వచ్చాయి. ఐదు రోజుల కస్టడీ ముగియడంతో పోలీసులు మరో మూడు రోజుల అదనపు కస్టడీ కోరగా, ఈ కాలంలో ఇప్పటివరకు స్పష్టత లేని అంశాలపై రవితో వివరణ తీసుకున్నారు. డొమైన్ పేర్లు, వెబ్‌సైట్ నిర్వహణ, సినిమాల అప్‌లోడ్ విధానం వంటి కీలక విషయాలు ఈ దశలో బహిర్గతమయ్యాయి.

‘ఐ బొమ్మ’ – ‘బప్పం’ పేర్లకు రవి ఇచ్చిన వివరణ

విశాఖపట్నం చెందిన రవి, తన వెబ్‌సైట్లకు ఈ పేర్లు ఎందుకు పెట్టాడన్న ప్రశ్నకు ఆసక్తికరమైన సమాధానం ఇచ్చాడు. విశాఖలో సినిమా థియేటర్‌లో సినిమా మొదలైనప్పుడు బొమ్మ పడుతుంది అని చెబుతారు. అందుకే నా డొమైన్‌కు ‘ఐ బొమ్మ’ అనే పేరు పెట్టాను. అంటే నా బొమ్మ, నా సినిమా అని అర్థం,” అన్నాడు.“బప్పం అంటే సుప్రీం అనే అర్థం. నా వెబ్‌సైట్లకు నేనే సుప్రీమ్‌ అనిపించుకోవాలన్న ఉద్దేశంతో ఆ పేరు పెట్టాను” అని తెలిపాడు.

వెబ్‌సైట్ల నిర్వహణ విదేశాల్లో?

కస్టడీ విచారణలో మరో కీలక విషయం బయటపడింది. ర‌వి ప్రకారం .. డొమైన్ ఆపరేషన్స్, డిజైన్, అప్‌డేట్స్ పనులను యూకేలో ఉన్న ఔట్‌సోర్సింగ్ ఉద్యోగులకు అప్పగించాడట. అదనంగా కరేబియన్ దీవుల్లో నివసించే వ్యక్తులు కూడా ఈ కార్యకలాపాల్లో భాగమని వెల్లడించాడు. అనధికారిక సమాచారం ప్రకారం రవి కస్టడీలో క్రింది విషయాలను ఒప్పుకున్నట్లు తెలుస్తోంది:

కొత్త సినిమాలను టెలిగ్రామ్ ద్వారా కొనుగోలు చేసి డొమైన్లలో అప్‌లోడ్ చేశాడు. అలాగే, ఓటీటీ ప్లాట్‌ఫారమ్‌లలో విడుదలైన సినిమాలను రికార్డ్ చేసి, ప్రత్యేక సాఫ్ట్‌వేర్‌లతో HD క్వాలిటీగా మార్చి వెబ్‌సైట్లలో పెట్టేవాడు. ఇవి పైర‌సీ నెట్‌వర్క్ ఎంత ప్రొఫెషనల్ స్థాయిలో పని చేసిందో స్పష్టంగా చూపిస్తున్నాయి. రవి కస్టడీ ముగిసిన నేపథ్యంలో తదుపరి చర్యలు ఆసక్తికరంగా మారాయి. న్యాయవర్గాల ప్రకారం రవి కొంతకాలం జైలు‌లో ఉండాల్సి వచ్చే అవకాశం ఉంది.

కొత్త సంవత్సరానికి దగ్గర్లో బెయిల్ రావచ్చని చెబుతున్నప్పటికీ, పోలీసులు దీనికి కఠినంగా వ్యతిరేకించవచ్చు. కస్టడీలో సాంకేతిక సమాచారాన్ని సేకరించినప్పటికీ, వాటికి సంబంధించిన ధృవీకరణ ఆధారాలు సేకరించడం కష్టతరం. రవికి బెయిల్ లభిస్తే, విచారణకు అంతరాయం కలిగించవచ్చు, ఆధారాలను నాశనం చేసే అవకాశం ఉంది. అందువల్ల రవిని ఇంకా కొంతకాలం జైలులోనే ఉంచాలని కోర్టును కోరే అవకాశం ఉందని పోలీసులు భావిస్తున్నారు. దేశీయ, అంతర్జాతీయ లింకులు కూడా ఉన్నట్లు అనిపిస్తుండ‌డంతో దర్యాప్తు మరింత విస్తృతం అవుతోంది. ఐ బొమ్మ కేసు తెలుగు సినిమా పరిశ్రమతో పాటు డిజిటల్ కంటెంట్ రంగంలో కూడా సంచలనం సృష్టించిన కేసుగా నిలుస్తోంది.