Janhvi Kapoor | టాలీవుడ్ టాప్ స్టార్లపై జాన్వీ కపూర్ దృష్టి.. విజయ్ దేవరకొండతో నటించాలనే కోరిక!

Janhvi Kapoor |అతిలోక సుందరి శ్రీదేవి వారసురాలిగా సినీ పరిశ్రమలోకి అడుగుపెట్టిన జాన్వీ క‌పూర్ ఇప్పుడు తెలుగు చిత్రసీమలో కూడా తనదైన ముద్ర వేయాలని ప్రయత్నిస్తోంది. బాలీవుడ్‌లో ఇప్పటికే మంచి గుర్తింపు సంపాదించిన ఆమె, ప్రస్తుతం టాలీవుడ్‌లో టాప్ స్టార్ హీరోలతో సినిమాలు చేస్తూ ముందుకు సాగుతోంది.

Janhvi Kapoor |అతిలోక సుందరి శ్రీదేవి వారసురాలిగా సినీ పరిశ్రమలోకి అడుగుపెట్టిన జాన్వీ క‌పూర్ ఇప్పుడు తెలుగు చిత్రసీమలో కూడా తనదైన ముద్ర వేయాలని ప్రయత్నిస్తోంది. బాలీవుడ్‌లో ఇప్పటికే మంచి గుర్తింపు సంపాదించిన ఆమె, ప్రస్తుతం టాలీవుడ్‌లో టాప్ స్టార్ హీరోలతో సినిమాలు చేస్తూ ముందుకు సాగుతోంది. జాన్వీ కపూర్ తెలుగు ప్రేక్షకులకు మొదటిసారి పరిచయం అవుతున్న చిత్రం దేవ‌ర‌. ఈ సినిమాలో యంగ్ టైగర్ ఎన్టీఆర్ సరసన ఆమె కథానాయికగా నటిస్తోంది. ఈ సినిమా షూటింగ్ జరుగుతున్న సమయంలోనే మరో పెద్ద అవకాశాన్ని ఆమె అందుకుంది. మెగా పవర్ స్టార్ రామ్ చ‌ర‌ణ్‌ హీరోగా తెరకెక్కుతున్న పెద్ది సినిమాలో కూడా జాన్వీ హీరోయిన్‌గా ఎంపికైంది. దీంతో టాలీవుడ్‌లో రెండు భారీ ప్రాజెక్టుల్లో వరుసగా నటించే అవకాశాన్ని ఆమె దక్కించుకుంది.

అంతేకాదు, భవిష్యత్తులో తెరకెక్కనున్న దేవ‌ర‌2 లో కూడా ఎన్టీఆర్ సరసన జాన్వీ కపూర్ కనిపించనుందని సమాచారం. ఈ ప్రాజెక్ట్ కూడా పూర్తయితే ఎన్టీఆర్‌తో రెండు సినిమాల్లో కలిసి నటించిన హీరోయిన్‌గా ఆమె నిలుస్తుంది. ఇలా తక్కువ సమయంలోనే టాలీవుడ్‌లో ఇద్దరు పెద్ద స్టార్ హీరోలతో స్క్రీన్ షేర్ చేసుకునే అవకాశం ఆమెకు దక్కడం విశేషంగా మారింది. ఇక జాన్వీ తదుపరి లక్ష్యం టాలీవుడ్‌లో మిగిలిన పాన్ ఇండియా స్టార్ హీరోలతో సినిమాలు చేయడమేనని సినీ వర్గాల్లో చర్చ జరుగుతోంది. ముఖ్యంగా ఐకాన్ స్టార్ అల్లు అర్జున్, డార్లింగ్ ప్ర‌భాస్ వంటి స్టార్ హీరోలతో కూడా ఆమె నటించాలని భావిస్తున్నట్లు తెలుస్తోంది. అల్లు అర్జున్‌కు జాన్వీ మంచి జోడీగా సెట్ అవుతుందని అభిమానులు కూడా అభిప్రాయపడుతున్నారు. అయితే ప్రభాస్ వంటి భారీ కటౌట్ ఉన్న హీరోతో స్క్రీన్‌పై ఎలా కనిపిస్తుందన్నది సినిమాటోగ్రఫీపై ఆధారపడి ఉంటుందని సినీ విశ్లేషకులు అంటున్నారు.

మరోవైపు సూపర్ స్టార్ మ‌హేష్ బాబు కూడా పాన్ ఇండియా మార్కెట్‌లోకి అడుగుపెడుతున్న నేపథ్యంలో, భవిష్యత్తులో ఆయనతో కూడా జాన్వీ సినిమా చేసే అవకాశాలు ఉన్నాయని టాక్ వినిపిస్తోంది. దీంతో టాలీవుడ్‌లోని ప్రధాన పాన్ ఇండియా స్టార్ హీరోల జాబితాలో ఆమెకు అవకాశాలు దక్కే అవకాశముందని భావిస్తున్నారు. అయితే ఈ టాప్ స్టార్‌లతో పాటు జాన్వీ కపూర్ ప్రత్యేకంగా కలిసి నటించాలని కోరుకుంటున్న హీరో ఒకరు ఉన్నారు. అతడే రౌడీ స్టార్ విజ‌య్ దేవ‌ర‌కొండ‌. ఆయన నటించిన అర్జున్ రెడ్డి సినిమా చూసిన తర్వాత నుంచే విజయ్ దేవరకొండకు జాన్వీ అభిమానిగా మారిపోయిందని గతంలోనే చెప్పింది. అప్పటి నుంచే ఆయనతో కలిసి ఒక సినిమా చేయాలని ఆమె ఆసక్తి వ్యక్తం చేసింది. అయితే ఇప్పటివరకు ఆ అవకాశం మాత్రం రాలేదు.

ఇక తరువాతి తరం పాన్ ఇండియా హీరోలుగా ఎదుగుతున్న నాగ చైత‌న్య‌, అఖిల్‌, నిఖిల్‌, తేజ స‌జ్జా వంటి హీరోలతో కూడా భవిష్యత్తులో జాన్వీ కపూర్ నటించే అవకాశాలు ఉన్నాయని సినీ వర్గాలు భావిస్తున్నాయి. అయితే సీనియర్ స్టార్ హీరోలైన చిరంజీవి, నాగార్జున‌, నంద‌మూరి బాల‌కృష్ణ వంటి వారి సినిమాల్లో ఆమె ప్రధాన హీరోయిన్‌గా కాకుండా కీలక పాత్రలకే పరిమితం అయ్యే అవకాశం ఉందని టాక్ వినిపిస్తోంది. మరోవైపు జాన్వీ కపూర్ ఇప్పటివరకు తమిళ చిత్రసీమలో మాత్రం ఇంకా ఎంట్రీ ఇవ్వలేదు. సరైన కథ, సరైన సమయం కోసం ఆమె ఎదురు చూస్తోందని తెలుస్తోంది. ఇదిలా ఉంటే, ఆమె సోదరి ఖుషీ క‌పూర్ తమిళంలో ఎంట్రీ ఇవ్వబోతుందనే ప్రచారం గతంలో వినిపించినప్పటికీ ఇప్పటివరకు ఎలాంటి అధికారిక సమాచారం బయటకు రాలేదు. ప్రస్తుతం ఖుషీ కపూర్ బాలీవుడ్ సినిమాలపైనే దృష్టి పెట్టి ముందుకు సాగుతోంది.