Manchu Lakshmi | 1997 నవంబర్ 19… హైదరాబాద్లోని జూబ్లీహిల్స్ ప్రాంతం ఒక్కసారిగా పేలుడు శబ్దాలతో వణికిపోయింది. రామానాయుడు స్టూడియోస్ సమీపంలో జరిగిన ఘోర కారుబాంబు దాడి ఉమ్మడి ఆంధ్రప్రదేశ్ను ఉలిక్కిపడేలా చేసింది. ఈ దాడిలో దాదాపు 32 మంది ప్రాణాలు కోల్పోగా, పలువురు తీవ్రంగా గాయపడ్డారు. ఈ ఘటన అప్పట్లో చిత్రసీమనే కాకుండా రాజకీయ వర్గాల్లోనూ తీవ్ర ప్రకంపనలు రేపింది.
లక్ష్యం పరిటాల రవి… దాడి వెనుక రాజకీయ వైరం
ఈ దాడి లక్ష్యం అప్పటి పెనుగొండ ఎమ్మెల్యే పరిటాల రవి అని విచారణల్లో వెల్లడైంది. అతన్ని హతమార్చేందుకు ప్రత్యర్థి మద్దెలచెరువు సూరి పన్నిన పథకమే ఈ కారుబాంబు దాడిగా పోలీసులు గుర్తించారు. రాజకీయ విభేదాలు ఎంత దారుణంగా మారవచ్చో ఈ ఘటన స్పష్టంగా చూపించింది.
‘శ్రీరాములయ్య’ పూజా కార్యక్రమం తర్వాత విషాదం
ఆ రోజు ఉదయం రామానాయుడు స్టూడియోస్లో ‘శ్రీరాములయ్య’ సినిమా పూజా కార్యక్రమాలు ఘనంగా జరిగాయి. ఈ చిత్రంలో హీరోగా మోహన్ బాబు నటించగా, ప్రముఖ దర్శకుడు దాసరి నారాయణరావు కూడా ఈ కార్యక్రమానికి హాజరయ్యారు. సినీ, రాజకీయ ప్రముఖుల సమక్షంలో కార్యక్రమం ముగిసిన తర్వాత, పరిటాల రవి తన అనుచరులతో బయలుదేరారు.
ఈటీవీ వాహనం కవచంగా ..
పరిటాల రవి వాహనాన్ని టార్గెట్ చేస్తూ బాంబు అమర్చారు. అయితే పేలుడు జరగబోయే సమయానికి ముందుగా వెళ్లిన ఈటీవీ బృందం వాహనం అనుకోకుండా మధ్యలోకి వచ్చింది. ఆ క్షణంలో జరిగిన పేలుడుతో ఈటీవీ వాహనంలో ఉన్నవారు అక్కడికక్కడే ప్రాణాలు కోల్పోయారు. వారి శరీరాలు ఛిద్రమయ్యాయి. ఈ విషాదం అందరినీ కలచివేసింది.
ఆ వాహనం వెనుక ఉన్న పరిటాల రవి, ఆయన అనుచరులు గాయాలతో బయటపడగా, అదే వరుసలో ఉన్న మోహన్ బాబు కూడా తృటిలో ప్రాణాపాయం నుంచి బయటపడ్డారు. ఈటీవీ వాహనం అడ్డుగా రాకపోయి ఉంటే మరింత భారీ ప్రాణనష్టం జరిగేదని అప్పట్లోనే అంచనా వేశారు.
“దేవుడే కాపాడాడు” – మంచు లక్ష్మి భావోద్వేగం
తాజాగా నటుడు రాజా రవీంద్ర నిర్వహిస్తున్న ఇంటర్వ్యూలో పాల్గొన్న మంచు లక్ష్మి, ఆ దుర్ఘటనను గుర్తు చేసుకుంటూ భావోద్వేగానికి గురయ్యారు. డాడీకి బాంబ్ బ్లాస్ట్ అయ్యింది, హాస్పిటల్లో అడ్మిట్ అయ్యారు అన్న ఫోన్ కాల్ వచ్చాక షాక్లోకి వెళ్లిపోయానని చెప్పారు. అంత పెద్ద పేలుడులో ముందు, వెనుక కార్లలో ఉన్నవాళ్లంతా చనిపోతే… మా నాన్న ఎలా బతికారో అర్థం కాలేదు. దేవుడు కవచంలా కాపాడాడు అంటూ ఆమె భావోద్వేగంగా స్పందించారు.
చరిత్రలో మిగిలిపోయిన భయానక ఘటన
ఈ కారుబాంబు దాడి తెలుగు రాష్ట్రాల చరిత్రలోనే అత్యంత భయానక ఘటనల్లో ఒకటిగా నిలిచింది. రాజకీయ వైరం, ఫ్యాక్షన్ కల్చర్ ఎంత ప్రమాదకరమో గుర్తు చేసే ఉదంతంగా ఇప్పటికీ ఈ ఘటనను ప్రస్తావిస్తారు. 29 ఏళ్లు గడిచినా, ఆ రోజు జరిగిన ఘటన జ్ఞాపకాలు ఇంకా చాలామందిని వెంటాడుతూనే ఉన్నాయి.