Sushmita Konidela | మెగా డాట‌ర్ సుస్మిత కొణిదెల ప్రస్థానం ఏంటి .. ఆమె భ‌ర్త బ్యాక్‌గ్రౌండ్ ఇది..!

Sushmita Konidela | తెలుగు సినీ పరిశ్రమలో ఎలాంటి సినీ బ్యాక్‌గ్రౌండ్ లేకుండానే అడుగుపెట్టి స్వయంకృషితో అగ్రస్థాయికి ఎదిగిన నటుడు మెగాస్టార్ చిరంజీవి జీవితం ఎంతోమందికి స్ఫూర్తిగా నిలిచింది. కష్టపడి, పట్టుదలతో టాలీవుడ్‌లో తిరుగులేని హీరోగా ఎదిగి దశాబ్దాల పాటు నెంబర్ వన్ స్థానాన్ని నిలబెట్టుకున్న ఆయన, తెలుగు సినిమా చరిత్రలో చెరగని ముద్ర వేశారు.

Sushmita Konidela | తెలుగు సినీ పరిశ్రమలో ఎలాంటి సినీ బ్యాక్‌గ్రౌండ్ లేకుండానే అడుగుపెట్టి స్వయంకృషితో అగ్రస్థాయికి ఎదిగిన నటుడు మెగాస్టార్ చిరంజీవి జీవితం ఎంతోమందికి స్ఫూర్తిగా నిలిచింది. కష్టపడి, పట్టుదలతో టాలీవుడ్‌లో తిరుగులేని హీరోగా ఎదిగి దశాబ్దాల పాటు నెంబర్ వన్ స్థానాన్ని నిలబెట్టుకున్న ఆయన, తెలుగు సినిమా చరిత్రలో చెరగని ముద్ర వేశారు. దేశంలోనే అత్యధిక రెమ్యునరేషన్ తీసుకున్న హీరోలలో ఒకరిగా గుర్తింపు పొందిన చిరంజీవి వేసిన మార్గంలోనే మెగా ఫ్యామిలీ హీరోలు కూడా సినీ రంగంలో ముందుకు సాగుతున్నారు. ఇదే సమయంలో మెగాస్టార్ పెద్ద కుమార్తె సుస్మిత కొణిదెల కూడా తనకంటూ ప్రత్యేక గుర్తింపు తెచ్చుకుంటూ నిర్మాతగా ఎదుగుతున్నారు.

ఇటీవల తండ్రి చిరంజీవితో ‘మన శంకర వరప్రసాద్ గారు’ చిత్రాన్ని నిర్మించి మంచి ప్రశంసలు అందుకున్నారు. గతంలో కూడా ఒక సినిమాను నిర్మించిన అనుభవం ఉన్న సుస్మిత, ఇప్పుడు ప్రొడ్యూసర్‌గా తన సత్తాను చాటుతున్నారు. అయితే మెగా ఫ్యామిలీలో అందరి గురించి తెలిసినప్పటికీ సుస్మిత కుటుంబ నేపథ్యం, ఆమె భర్త గురించి చాలా మందికి తెలియదు. ఒకప్పుడు హీరో ఉదయ్ కిరణ్‌తో జరిగిన నిశ్చితార్థం రద్దైన తర్వాత సుస్మిత చెన్నైలో స్థిరపడిన విష్ణు ప్రసాద్‌ను వివాహం చేసుకున్నారు. విష్ణు ప్రసాద్ కుటుంబం రాయలసీమ నుంచి తమిళనాడుకు వెళ్లి అక్కడే స్థిరపడినట్టు సమాచారం. ఆయన తాత ఎల్వీ రామారావు చెన్నైలో పేరొందిన వ్యాపారవేత్తగా గుర్తింపు పొందారు. జపాన్, సింగపూర్, అమెరికా వంటి దేశాలతో వ్యాపార లావాదేవీలు నిర్వహిస్తూ విస్తృత వ్యాపారాన్ని నడిపిన కుటుంబ వారసత్వం విష్ణు ప్రసాద్‌కు దక్కింది.

ఎల్వీ ప్రసాద్, చంద్రిక దంపతులకు ఏకైక కుమారుడైన విష్ణు ప్రసాద్ బిజినెస్ అడ్మినిస్ట్రేషన్‌లో మాస్టర్స్ పూర్తి చేసి కుటుంబ వ్యాపారంలో అడుగుపెట్టారు. తాత స్థాపించిన పామాయిల్ వ్యాపారాన్ని తండ్రి ఆధ్వర్యంలో అభివృద్ధి చేయడమే కాకుండా, ప్రస్తుతం మరింత విస్తరించినట్టు తెలుస్తోంది. విష్ణు ప్రసాద్ – సుస్మిత దంపతులకు ఇద్దరు కూతుళ్లు ఉన్నారు. ఇక సుస్మిత విద్యాభ్యాసం విషయానికి వస్తే, నేషనల్ ఇన్స్టిట్యూట్ ఆఫ్ ఫ్యాషన్ టెక్నాలజీలో ఫ్యాషన్ డిజైనింగ్ చదివిన ఆమె తన విద్యను సినీ రంగంలో వినియోగించారు. చిరంజీవి రీ-ఎంట్రీ చిత్రం ‘ఖైదీ నెంబర్ 150’కు కాస్ట్యూమ్ డిజైనర్‌గా పనిచేసి మంచి ప్రశంసలు అందుకున్నారు. సినిమాలపై ఆసక్తి ఉన్న సుస్మితను ఆమె భర్త విష్ణు ప్రసాద్ ఇండస్ట్రీలోకి అడుగుపెట్టేలా ప్రోత్సహించినట్టు తెలిసింది.

ఈ విధంగా ఫ్యాషన్ డిజైనర్‌గా మొదలైన ఆమె ప్రయాణం ఇప్పుడు నిర్మాతగా మారి సక్సెస్ వైపు దూసుకెళ్తోంది. అన్ని విభాగాలపై పట్టు సాధిస్తూ మెగా కుటుంబంలో ప్రత్యేక గుర్తింపును తెచ్చుకున్న సుస్మిత, త్వరలో రామ్ చరణ్‌తో కూడా ఒక సినిమా నిర్మించనున్నట్టు ఇండస్ట్రీలో టాక్ వినిపిస్తోంది. మొత్తంగా చూస్తే మెగాస్టార్ వారసురాలిగా మాత్రమే కాకుండా స్వంత ప్రతిభతో సినీ రంగంలో తనకంటూ ప్రత్యేక స్థానం ఏర్పరుచుకుంటూ ముందుకు సాగుతున్న సుస్మిత కొణిదెల ప్రయాణం ఇప్పుడు అందరి దృష్టిని ఆకర్షిస్తోంది.