JD Vance | యూఎస్‌ ఉపాధ్యక్షుడి ఇంట్లో సంబరాలు.. నాలుగో బిడ్డకు జన్మనివ్వబోతున్న ఉషా వాన్స్‌

అమెరికా ఉపాధ్యక్షుడు జేడీ వాన్స్ ఇంట సంబరాలు! నాలుగో బిడ్డకు జన్మనివ్వబోతున్న తెలుగమ్మాయి ఉషా వాన్స్. జూలైలో మగబిడ్డ రాకపై దంపతుల అధికారిక ప్రకటన.

అమెరికా ఉపాధ్యక్షుడు జేడీ వాన్స్‌ (JD Vance) ఇంట సందడి నెలకొంది. ఆయన భార్య, అమెరికా సెకండ్‌ లేడీ ఉషా వాన్స్‌ (Usha Vance) త్వరలో మరో బిడ్డకు జన్మనివ్వబోతోంది. త్వరలోనే నాలుగో బిడ్డకు (Fourth Child) జన్మనివ్వబోతున్నట్లు జేడీ-ఉషా ప్రకటించారు. ఈ ఏడాది జులై చివరిలో పండంటి మగబిడ్డకు జన్మనివ్వబోతున్నట్లు ఉషా వాన్స్‌ సోషల్‌ మీడియా ద్వారా ప్రకటన చేశారు. ఈ విషయం తెలుసుకున్న జేడీ వాన్స్‌ మద్దతుదారులు శుభాకాంక్షలు చెబుతున్నారు.

జేడీ వాన్స్‌ మన తెలుగింటి అల్లుడే..

ఉపాధ్యక్షుడు జేడీ వాన్స్‌ మన తెలుగింటి అల్లుడే. వాన్స్‌ సతీమణి ఉషా చిలుకూరి తెలుగమ్మాయి. ఉషా చిలుకూరి తల్లిదండ్రులు రాధాకృష్ణ, లక్ష్మి. వీరి బాల్యం ఆంధ్రప్రదేశ్‌లోని తూర్పు గోదావరి జిల్లాలోని వడ్లూరుతో పాటు కృష్ణ జిల్లా పామర్రులో సాగింది. దాదాపు 50 ఏండ్ల క్రితం వీరు ఉన్నత చదువుల కోసం ఆమెరికా వెళ్లి అక్కడే స్థిరపడ్డారు. ఉష తండ్రి రాధాకృష్ణ (క్రిష్‌ చిలుకూరి) ఏరోస్పేస్‌ ఇంజినీర్‌. తల్లి లక్ష్మి శాన్‌డియాగో యూనివర్సిటీలో ప్రొఫెసర్‌. వీరికి 1986లో అమెరికాలోని శాన్‌డియాగోలో ఉష జన్మించారు. కేంబ్రిడ్జ్‌ యూనివర్సిటీ నుంచి ఫిలాసఫీలో మాస్టర్స్‌ పూర్తి చేసిన తర్వాత ఆమె న్యాయవాద వృత్తిని చేపట్టారు.

అక్కడి సుప్రీంకోర్టు న్యాయమూర్తులు జాన్‌ రాబర్ట్స్‌, బ్రెట్‌ కవనాగ్‌కు క్లర్క్‌గా, యేల్‌ జర్నల్‌ ఆఫ్‌ లా అండ్‌ టెక్నాలజీకి మేనేజింగ్‌ ఎడిటర్‌గా, యేల్‌ లా జర్నల్‌కు ఎగ్జిక్యూటివ్‌ డెవెలప్‌మెంట్‌ ఎడిటర్‌గా ఆమె పని చేశారు. యేల్‌ లా స్కూల్‌లో ఆమెకు జేడీ వాన్స్‌తో పరిచయం ఏర్పడింది. ఆ పరిచం కాస్తా ప్రేమకు దారి తీయడంతో 2014లో వీరు వివాహం చేసుకున్నారు. వీరికి ఇప్పటికే ముగ్గురు సంతానం ఉంది. వారి పేర్లు ఎవాన్‌, వివేక్‌, మీరాబెల్‌. ఇప్పుడు నాలుగో బిడ్డకు ఉష జన్మనివ్వబోతోంది. ఇక రచయిత అయిన వాన్స్‌ ఓహియో సెనేటర్‌గా పనిచేశారు. 2024 చివర్లో జరిగిన అమెరికా ఎన్నికల్లో రిపబ్లికన్‌ పార్టీ తరఫున ఉపాధ్యక్షుడిగా జేడీ వాన్స్‌ ఎన్నికైన విషయం తెలిసిందే. దీంతో అమెరికా సెకండ్‌ లేడీ అయిన మొదటి భారత సంతతికి చెందిన వ్యక్తిగా ఉష నిలిచారు.

ఇవి కూడా చదవండి :

Revanth -Chiru | దావోస్‌లో క‌లుసుకున్న రేవంత్, చిరు.. మీ మూవీ చూసి ఆస్వాదించానంటూ కామెంట్
Biscuits | బిస్కెట్లపై రంధ్రాలు ఎందుకు ఉంటాయో తెలుసా? వాటి వెనుక ఉన్న సీక్రెట్ ఇదే!