Gaddar Film Awards: గద్దర్ సినీ అవార్డులకు ఎంట్రీలకు ఆహ్వానం

తెలంగాణ ప్రభుత్వం గద్దర్ చలనచిత్ర అవార్డుల పంపిణీకి సంబంధించి విధివిధానాలను ఖరారు చేసింది. ఈనెల 13నుంచి గద్దర్ అవార్డులకు దరఖాస్తులు స్వీకరించనున్నారు.

Gaddar Film Awards: తెలంగాణ ప్రభుత్వం గద్దర్ చలనచిత్ర అవార్డుల పంపిణీకి సంబంధించి విధివిధానాలను ఖరారు చేసింది. దీంతో గద్దర్ సినీ అవార్డులకు తెలంగాణ చలన చిత్ర అభివృద్ధి సంస్థ ఎంట్రీలను ఆహ్వానించింది. ఈనెల 13నుంచి గద్దర్ అవార్డులకు దరఖాస్తులు స్వీకరించనున్నారు. రాష్ట్ర ముఖ్యమంత్రి రేవంత్ రెడ్డి గతంలో చేసిన ప్రకటన మేరకు గద్దర్ అవార్డులకు గాను విధి విధానాలకు సంబంధించిన జీ.ఓ ఎం.ఎస్ నెంబర్ 25 జీ,ఓ. (ఐ అండ్ పీఆర్) తేదీ.11.3.2025 ను మంగళవారం ప్రభుత్వం విడుదల చేసింది.

2014 నుండి 2023 వరకు అప్పటి తెలంగాణా ప్రభుత్వం చలన చిత్ర అవార్డులను జారీ చేయక పోవడంతో, ఆ సంవత్సరాలకు కూడా ఒక్కో సంవత్సరానికి ఒక ఉత్తమ చలన చిత్రానికి అవార్డు ఇవ్వాలని నిర్ణయించారు. ఫీచర్ ఫిలిం కాటగిరిలో మొట్టమొదటి సారిగా ఉర్దూ భాషా చిత్రాలకు కూడా అవార్డులు ఇవ్వాలని ప్రభుత్వం నిర్ణ యించింది.

గద్దర్ చలన చిత్ర అవార్డులకు సంబంధించిన దరఖాస్తులు ఏ.సీ గార్డ్స్ లోని తెలంగాణా చలన చిత్ర పరిశ్రమాభివృద్ది సంస్థ కార్యాలయంలో తేదీ.13 .3 .2025 నుండి అందుబాటులో ఉంటాయని ప్రభుత్వం పేర్కొంది. ఈ గద్దర్ అవార్డులను ఈ క్రింది కేటగిరీలలో ఇవ్వడం జరుగుతుందని ఒక అధికారిక ప్రకటనలో తెలిపారు.

నటీనటులు, సాంకేతిక నిపుణులతో పాటు, ఫీచర్ ఫిల్మ్, జాతీయ సమైక్యత చిత్రం, బాలల చలనచిత్రం విభాగం, పర్యావరణం, హెరిటేజ్, చరిత్రపై తీసే చిత్రాలకు పురస్కారాలు అందజేయనున్నారు. తొలి ఫీచర్ ఫిల్మ్, యానిమేషన్ ఫిల్మ్, సోషల్ ఎఫెక్ట్ పిల్మ్, డాక్యుమెంటరీ ఫిల్మ్, షార్ట్ ఫిల్మ్ విభాగాల్లోనూ ఈ అవార్డును ప్రదానం చేయనున్నారు. తెలుగు సినిమాపై పుస్తకాలు, విశ్లేషణాత్మక వ్యాసాలు, నటీనటులు, సాంకేతిక నిపుణులకూ ఈ అవార్డును ఇవ్వనున్నట్లు ప్రభుత్వం పేర్కొంది. పైడి జయరాజ్, కాంతారావు, ఎం.ప్రభాకర్ రెడ్డి పేర్లతో అవార్డులు కొనసాగించాలని నిర్ణయించింది.