Telanagna Group 2 Results: తెలంగాణ పబ్లిక్ సర్వీస్ కమిషన్ (TGPSC) గ్రూప్ 2పరీక్ష ఫలితాలను విడుదల చేసింది. టీజీపీఎస్సీ చైర్మన్‌ బుర్రా వెంకటేశం ఫలితాలను విడుదల చేశారు. గతేడాది డిసెంబర్ 15,16 వ తేదీల్లో 783 గ్రూప్ 2 పోస్టుల భర్తీకోసం నిర్వహించిన పరీక్షా ఫలితాలు అధికారిక వెబ్‌సైట్‌లో అందుబాటులో ఉన్నాయి.
గ్రూప్-2 టాపరు అత్యధికంగా 447.088 మార్కులు వచ్చినట్లు కమిషన్ వెల్లడించింది. టాప్‌- 31 ర్యాంకుల్లో అందరూ అబ్బాయిలే ఉండటం గమనార్హం. ఈ పరీక్ష కోసం 5.51 లక్షల మంది దరఖాస్తు చేసుకోగా దాదాపు సగం మంది మాత్రమే హాజరు అయ్యారు. గ్రూప్ 2 పరీక్ష 2లక్షల 49,963 మంది అభ్యర్థులు రాశారు. ఇందులో 2 లక్షల 36,649 మంది అభ్యర్థుల ర్యాకింగ్ లిస్టు విడుదల చేశారు.
గ్రూప్ 2 అభ్యర్ధుల జనరల్ ర్యాంకింగ్స్ లిస్ట్‌ను అధికారిక వెబ్‌సైట్‌లో విడుదల చేశారు. మార్కులతోపాటు అభ్యర్థుల ఓఎంఆర్ షీట్స్‌ను కూడా వెబ్‌సైట్ లో కమిషన్ అందుబాటులో ఉంచింది. ఇక గ్రూప్ 2 ఫైనల్ ఆన్సర్‌ కీతో పాటు టాపర్స్ లిస్ట్‌ను కూడా టీజీపీఎస్సీ అధికారులు విడుదల చేశారు.
అభ్యర్థులు తుది కీ, ఓఎంఆర్, మాస్టర్ క్వశ్చన్ పేపర్లతో పాటు జనరల్ ర్యాంకింగ్‌ను కింద ఇచ్చిన లింక్‌ని www.tspsc.gov.in ఉపయోగించి జాబితాలో తనిఖీ చేసుకోవచ్చు.