Stored Dough | దాచిన రొట్టెల పిండిని వాడటం మంచిదేనా?

రోజూ వంటలో మిగిలే రోటీ పిండి ఫ్రిజ్‌లో ఉంచి మళ్లీ వాడడం సాధారణం.  ఫ్రిజ్‌లో నిల్వ చేసిన రోటీ పిండి ఎంతవరకు సురక్షితం,  ఎప్పుడు చెడిపోతుంది? నిల్వ విధానం, ఆరోగ్య భద్రత, soft chapati tips — పూర్తి వివరాలు ఇక్కడ.

Should You Use Yesterday’s Dough? Here’s What Food Experts Say

(విధాత ఆహారం డెస్క్​), హైదరాబాద్​:

మన ఇంట్లో ఫ్రిజ్ తెరిస్తే కనబడే మొదటి వస్తువు—మిగిలిపోయిన రొట్టెల పిండి ఉన్న స్టీల్ డబ్బా. ఒక్కోసారి సాయంత్రం మిగిలిపోయిన పిండిని ఉదయం ఉపయోగిస్తాం, ఉదయం చేసిన పిండిని రాత్రి వాడేస్తాం. ఇది చాలా సహజం, టైమ్ సేవ్ అవుతుంది కాబట్టి మనకు అలవాటు అయిపోయింది. కానీ… ఈ పిండి ఎప్పుడూ సురక్షితం, ఎప్పుడు కాదు అన్న విషయం మనం తెలుసుకోవాలి కదా.

కలిపిన పిండి అంటే కేవలం గోధుమపిండి + నీరు మాత్రమే కాదు. అది తడి, పిండిపదార్థాలు అధికంగా ఉన్న పదార్థం. అంటే సరిగ్గా నిల్వ చేయకపోతే సూక్ష్మజీవులు పెరిగే అవకాశముంది. అందువల్లనే కొన్నిసార్లు ఫ్రిజ్‌లో పెట్టిన పిండి ఉదయం తీసుకుని వత్తితే చేతికి అంటుతుంటుంది, వాసన కొంచెం పాతగా అనిపిస్తుంది. చాలాసార్లు మనం దీనిని పెద్దగా పట్టించుకోము—కాని ఆహార నిపుణులు మాత్రం ఇది ప్రమాదకరమని చెబుతున్నారు.

ఫ్రిజ్‌లో పెట్టిన పిండి వాడటం మంచిదే, కానీ..

అన్నింటికన్నా ముందుగా— ఫ్రిజ్‌లో ఉంచిన పిండిని 12 నుండి 24 గంటల లోపు వాడితేనే సురక్షితం.
ఎందుకంటే ఫ్రిజ్ బ్యాక్టీరియాను పూర్తిగా చంపదు. కేవలం దాని పెరుగుదలని మందగింపచేస్తుంది..అంతే. అంటే పిండి చెడిపోవడం మెల్లగా జరుగుతుంది కానీ ఆగిపోదు. ముఖ్యంగా వేసవిలో పిండి ఫ్రిజ్‌లో ఉంచినా 24 గంటలు దాటితే వాసన, రంగు, రూపంలో మార్పులు మొదలవుతాయి.

గదితాపము(Room Temperature)లో 8 నుండి 10 గంటలు మించి ఉంచితే పిండి ప్రమాదకరమైన బ్యాక్టీరియా (E.coli, Salmonella) పెరిగే అవకాశం ఎక్కువ. పైగా డబ్బా శుభ్రం కాకపోవడం, చేతులు సరిగ్గా కడగకుండా పిండిని కలపడం, ఇవి కూడా ప్రమాదాన్ని రెట్టింపు చేస్తాయి.

కాబట్టి పిండి నిల్వ అంటే కేవలం ఫ్రిజ్‌లో పెట్టడమే కాదు—ఎలా పెట్టాం అన్నదే అసలు విషయం.

ఫ్రిజ్‌లో ఉంచిన పిండిలో ఏం జరుగుతుంది?

పిండి చల్లగా ఉన్నప్పుడు లోపల గ్లూటెన్ మెల్లగా గట్టిపడుతుంది. అందుకే నిల్వ పిండి కొంచెం సాగుతున్నట్లుగా, కఠినంగా, దాల్చడానికి కాస్త ఇబ్బందిగా కూడా అనిపిస్తుంది. పై పొర ఎండిపోవడం, వెచ్చదనానికి ఉంచినప్పుడు కొంచెం పులుపు వాసన రావడం కూడా సహజం.

దీనికి కారణం, పిండి పులవడం(Fermentation).. అది మందగించినప్పటికీ జరుగుతూనే ఉంటుంది. కొందరికి ఇది కడుపుకు భారంగా, ఎసిడిటీ లేదా ఉబ్బరంగా అనిపిస్తుంది. కాగా, తాజా పిండితో చేసిన రొట్టెలు మాత్రం ఎప్పటికీ మృదువుగా, సులభంగా జీర్ణమయ్యేలా ఉంటూ రుచి మాత్రమే కాదు శరీరానికి కూడా మంచి చేస్తాయి.

కలిపిన పిండి ఎన్ని రోజులు నిల్వ ఉండగలదు?

గదితాపం వద్ద :  2–3 గంటలు మాత్రమే
ఫ్రిజ్ లో : 12–24 గంటలు బెస్ట్
ఫ్రీజర్ లో : 2 నెలలు వరకు సరే

ఫ్రీజర్​లో పెట్టి వాడాలంటే మాత్రం ముందుగా దాన్ని ఫ్రిజ్​లో పెట్టి నెమ్మదిగా కరగనివ్వాలి. ఒకేసారి రూమ్ టెంపరేచర్‌లోకి తెస్తే పిండిలోని నీరు ఆవిరయ్యే అవకాశం ఉంటుంది. రూపం మారొచ్చు, చపాతీలు కూడా పొడిగా వస్తాయి.

కానీ మంచి వార్త ఏంటంటే — సరైన విధంగా నిల్వచేస్తే పిండి ఎక్కువసేపు తాజాగా ఉంచుకోవచ్చు. అంటే రోజులో రెండుసార్లు పిండి కొత్తగా కలపాల్సిన అవసరం తగ్గుతుంది. దీనికి కొన్ని సులభమైన ఇంటి చిట్కాలు చాలా బాగా పని చేస్తాయి.

కలిపి ఉన్న పిండిని ఫ్రిజ్‌లో పెట్టేముందు, ముందుగా దాన్ని పూర్తిగా పాలిథిన్​ షీట్​ లేదా అల్యూమినియం ఫాయిల్​‌తో చుట్టేయాలి. లోపల గాలి చొరబడే అవకాశం లేకుండా టైట్​గా సీల్​ చేస్తే రంగు మారడం, పొర ఎండిపోవడం తగ్గుతుంది. ఎవరికైనా కవరింగ్​ ఇష్టం లేకపోతే zip pouch లేదా airtight container కూడా ఓ మంచి ప్రత్యామ్నాయం. డబ్బాలోకి గాలి చొరబడకపోతే పులియబడటమనే ప్రక్రియ మందగించి, తద్వారా పిండి ఎక్కువకాలం నిల్వ ఉంటుంది.

ఇంకో ముఖ్య విషయం — నీరు ఎక్కువైతే పిండికి జీవితం తగ్గుతుంది.
మనం పిండి కలుపుతున్నప్పుడు కొద్దికొద్దిగా మాత్రమే నీళ్లు పోస్తే పిండిముద్ద ఎక్కువసేపు ఫ్రెష్‌గా ఉంటుంది. పిండి ఎక్కువ మృదువుగా అయిపోయిందనిపిస్తే చిటికెడు పొడి పిండిని కలిపి సరిచేసుకోవచ్చు. రోటీ రోల్ అవ్వడం కూడా బాగా సులభమవుతుంది.

అలాగే పిండిని డబ్బాలో పెట్టేముందు పైన పలుచగా నెయ్యి లేదా నూనె రాసి ఉంచితే పిండి నల్లబడకుండా, ఎండిపోకుండా బాగా సాఫ్ట్‌గా ఉంటుంది. అది మళ్లీ వాడేటప్పుడు ఆ తాజాదనం తిరిగి వచ్చినట్టు అనిపిస్తుంది. ఇది చాలామందికి తెలియని చిన్న సీక్రెట్.

నిల్వపిండిని వాడేముందు మృదువుగా ఎలా చేయాలి?

ఫ్రిజ్ నుండి తీసిన పిండికి కొంచెం వేడినీరు కలిపి మెత్తగా చేయాలి. మీద కొద్దగా నెయ్యి లేదా నూనె రాస్తే వత్తడానికి చాలా సులభమవుతుంది. అలా 10–15 నిమిషాలు రూమ్ టెంపరేచర్​లో ఉంచితే రోటీ సూపర్‌గా రోలవుతుంది. కొద్దిగా పులిసిన వాసన ఉంటే చిటికెడు జీలకర్ర వేసి బాగా కలిపితే చేస్తే వాసన మామూలుగా అవుతుంది, కానీ పాడైపోతే మాత్రం వాడకూడదు.

పిండి చెడిపోయిందో లేదో ఎలా గుర్తించాలి?

వాసన ఎక్కువగా పులిసినట్లుగా, బూడిద రంగులో, జిగటగా, పైన తెల్లటి లేదా పచ్చరంగు చుక్కలు కనిపించినా.. పిండి గోవిందా అని అర్థం. వెంటనే పడేయాలి. ఎంత జాగ్రత్తగా నిల్వ చేసినా పిండిని బయట బల్లమీద, ప్రత్యేకంగా వేసవిలో, ఎక్కువసేపు వదిలేస్తే ప్రమాదమే.
నిల్వ పిండికంటే తాజా పిండికే మన ఓటు..

ఫ్రిజ్‌లో ఉంచిన పిండి కొన్నిసార్లు పరాటాలు, స్టఫ్డ్​ రోటీల కోసం చాలా బావుంటుంది—ఎందుకంటే కొంచెం రఫ్​గా ఉన్న పిండి దాల్చడాన్ని సులభం చేస్తుంది. కానీ మన సాధారణ రొట్టెలే అయితే తాజా పిండి రుచి, మృదుత్వం, పొరలుపొరలుగా ఉండి..అబ్బో.. దానికి సాటి లేదు. అంతే కాదు, తిన్న తర్వాత బరువుగా అనిపించదు, జీర్ణంగానూ సులభం.

అందుకే చాలా మంది ఇల్లాండ్లు ODI format కంటే—T20 స్టైల్ తాజాపిండినే ఎంచుకుంటారు. 😂
కొంచెం టైమ్ కేటాయిస్తే రుచి, ఆరోగ్యం రెండూ మనవే. కాకపోతే, మన మగ మహారాజుల హెల్ప్​ తీసుకుంటే సరి.! రొట్టెలు ఇట్టే రెడీ..

రోజూ పనులతో బిజీగా ఉన్నాం… కిచెన్‌లో చిన్న షార్ట్‌కట్ అవసరం కూడా ఉంటుంది. అప్పుడప్పుడు మిగిలిన పిండిని వాడడంలో తప్పు లేదు. కానీ వీలైతే ప్రతి సారి తాజా పిండి వాడటం వల్ల వంటిల్లు ఘుమఘుమలతో, ఇల్లంతా పకపకలతో ఆరోగ్యంగా ఉంటుంది.