- తండ్రికి కొన్న బైక్‌తో భీమవరానికి
- ఆకుపాముల సమీపంలో ప్రమాదం
- అక్కడికక్కడే చనిపోయిన యశశ్విని
సూర్యాపేట: తండ్రికి బైక్ గిఫ్ట్ ఇచ్చేందుకు వెళ్లే క్రమంలో అదే బైక్ ప్రమాదంలో ప్రాణాలు కోల్పోయిన సాఫ్ట్ వేర్ ఉద్యోగిని విషాదకర ఘటన కుటుంబ సభ్యులకు తీరని శోకం మిగిల్చింది. తండ్రికి బుల్లెట్ బండిని గిఫ్టుగా ఇచ్చి ఆయన కళ్లలో ఆనందం చూడాలనుకున్న కూతురి కల కలగానే మిగిలిపోయింది. ఆంధ్రప్రదేశ్‌లోని పశ్చిమగోదావరి జిల్లా భీమవరం మండలం తందూరుకు చెందిన చేడె జనార్దన్‌కు కూతురు, కుమారుడు ఉన్నారు. వ్యవసాయం చేసుకుంటూ తన ఇద్దరు పిల్లలను జనార్ధన్ చదివించాడు. బాగా చదువుకున్న పిల్లలు ఇప్పుడు ప్రయోజకులయ్యారు. కూతురు యశస్విని హైదరాబాద్ గచ్చిబౌలిలోని పీడబ్ల్యూసీ కంపెనీలో మూడు సంవత్సరాల నుంచి సాఫ్ట్వేర్ ఉద్యోగం చేస్తోంది. తనను ఎంతో కష్టపడి చదివించి ప్రయోజకురాలిగా చేసిన తన తండ్రికి ఏదైనా మంచి గిఫ్ట్ ఇవ్వాలని భావించింది. గ్రామంలో ఉండే తన తండ్రి బుల్లెట్ పై తిరుగుతుంటే చూడానుకుంది.
ఇందుకోసం హైదరాబాద్‌లోని ఓ షోరూంలో బుల్లెట్ బైక్ ను కొనుగోలు చేసింది. బుల్లెట్ ను తండ్రికి ఇచ్చేందుకు తన సహా ఉద్యోగి బడ్డుకొండ అచ్యుత్ కుమార్ తో కలిసి అదే బుల్లెట్ బైక్ పై తమ స్వగ్రామమైన తందూరుకు బయలుదేరింది. ఈ క్రమంలో సూర్యాపేట జిల్లా మునగాల మండలం ఆకుపాముల శివారులోకి రాగానే హైవేపై పడి ఉన్న గేదె కళేబరాన్ని ఢీకొట్టి వాళ్లు ప్రయానిస్తున్న బైక్ కిందపడిపోయింది. దీంతో బైక్ పై ఉన్న యశస్విని ఎగిరి రోడ్డుపై పడింది. అదే సమయంలో హైదరాబాద్ నుంచి విజయవాడ వైపు వెళ్లే ఓలారీ అతివేగంగా వచ్చి రహదారిపై పడిఉన్న యశస్విని మీదుగా వెళ్లింది. దీంతో యశస్విని తల, మెడభాగం ఛిద్రమై అక్కడికక్కడే ప్రాణాలు కోల్పోయింది. బైక్ నడుపుతున్న అచ్యుత్ కుమార్ స్వల్ప గాయాలతో బయట పడ్డాడు.
ఈ ప్రమాదం జరిగిన తర్వాత డ్రైవర్‌ లారీని వదిలి పరారయ్యాడు. మృతురాలి కుటుంబసభ్యులకు సమాచారం ఇవ్వడంతో.. ఘటనా స్థలానికి చేరుకున్న యశస్విని బాబాయ్ చేడె సురేష్ మృతదేహాన్ని హాస్పిటల్‌కు తరలించారు. ఆతర్వాత పీఎస్‌లో ఫిర్యాదు చేశారు. సురేష్ ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేస్తున్నారు. చేతికందిన కుమార్తె ఇలా రోడ్డు ప్రమాదంలో మృతి చెందడంతో.. ఆమె కుటుంబ సభ్యులు కన్నీరుమున్నీరుగా విలపించారు. తనకోసం బహుమతి తీసుకొస్తానన్న కూతురును విగతజీవిగా చూసి.. ఆ తండ్రి గుండె తల్లడిల్లిపోయింది. ఈ ప్రమాదం జరిగిన తర్వాత డ్రైవర్‌ లారీని వదిలి పరారయ్యాడు.