Hyderabad | ముగ్గురు పిల్లలతో కలిసి ఓ తండ్రి ఆత్మహత్యా యత్నం

ముగ్గురు పిల్లలతో కలిసి ఓ తండ్రి ఆత్మహత్యాయత్నం చేశాడు. మార్నింగ్‌ వాక్‌కు వెళ్దామని చెప్పి పిల్లలను కారులో ఎక్కించుకున్న తండ్రి.. కారును వేగంగా చెరువులోకి పోనిచ్చాడు.

కారుతో చెరువులోకి..రక్షించిన స్థానికులు

విధాత, హైదరాబాద్ : ముగ్గురు పిల్లలతో కలిసి ఓ తండ్రి ఆత్మహత్యాయత్నం చేశాడు. మార్నింగ్‌ వాక్‌కు వెళ్దామని చెప్పి పిల్లలను కారులో ఎక్కించుకున్న తండ్రి.. కారును వేగంగా చెరువులోకి పోనిచ్చాడు. హైదరాబాద్‌లోని అబ్దుల్లాపూర్‌మెట్‌ పరిధిలోగల ఇనాంగూడ చెరువు దగ్గర బుధవారం తెల్లవారుజామున ఈ ఘటన చోటుచేసుకుంది. బీఎన్‌రెడ్డి నగర్‌ వాసి అయిన అశోక్‌ కాంట్రాక్టర్‌గా పనిచేస్తున్నాడు. బుధవారం తెల్లవారుజామున మార్నింగ్‌ వాక్‌కు అని చెప్పి పిల్లలు ముగ్గురిని కారులో ఎక్కించుకున్న ఆయన ఇనాంగూడ చెరువువైపు తీసుకెళ్లాడు.

చెరువు పక్కన మార్గంలో వెళ్తూనే ఒక్కసారిగా కారును చెరువులోకి మళ్లించాడు. అది చూసిన స్థానికులు వెంటనే స్పందించారు. తాళ్లు, టైర్లతో వెంటనే చెరువులోకి దూకి తండ్రి సహా నలుగురిని కాపాడారు. అశోక్‌ ముగ్గురు పిల్లల్లో ఇద్దరు అమ్మాయిలు, ఒక అబ్బాయి ఉన్నారు. అయితే కాంట్రాక్టర్‌ అశోక్‌ పిల్లలతో సహా ఆత్మహత్యాయత్నం చేయడానికిగల కారణాలు తెలియరాలేదు. ఘటనపై పోలీసులు దర్యాప్తు చేస్తున్నారు. ఆర్థిక ఇబ్బందులే ఆత్మహత్యకు కారణాలను అనుమానిస్తున్నారు.