Lok Sabha Elections : తెలంగాణలోనూ భారీగా ఓట్ల తేడా?

ఈవీఎంలను ట్యాంపర్‌ చేయడానికి అవకాశాల్లేకపోలేదని, వాటిని వాడకపోవడమే ఉత్తమమని సామాజిక మాధ్యమం ఎక్స్‌ అధినేత ఎలాన్‌మస్క్‌ చేసిన ట్వీట్‌పై దేశంలో రగడ జరుగుతున్నది.

పోలైన ఓట్లకు, లెక్కించిన ఓట్ల మధ్య వ్యత్యాసాలు
కనిష్ఠంగా నల్లగొండలో ఒక ఓటు.. 
గరిష్ఠంగా మల్కాజిగిరిలో 3,946
అన్ని నియోజకవర్గాల్లో తప్పిన లెక్కలు

హైదరాబాద్‌: ఈవీఎంలను ట్యాంపర్‌ చేయడానికి అవకాశాల్లేకపోలేదని, వాటిని వాడకపోవడమే ఉత్తమమని సామాజిక మాధ్యమం ఎక్స్‌ అధినేత ఎలాన్‌మస్క్‌ చేసిన ట్వీట్‌పై దేశంలో రగడ జరుగుతున్నది. దీనిపై కాంగ్రెస్‌ నేత రాహుల్‌గాంధీ తదితరులు స్పందించారు. అందుకు పోటీగా బీజేపీ నేత పురందేశ్వరి భారత్‌కు వచ్చి ఈవీఎంలను ట్యాంపర్‌ చేసి చూపాలని మస్క్‌కు సవాలు కూడా విసిరారు.

ఈ సవాళ్లు, ప్రతిసవాళ్లు ఎలా ఉన్నప్పటికీ.. ఇప్పటికే దేశంలోని 140 పోలింగ్‌ కేంద్రాల్లోని ఈవీఎంలలో పోలైన ఓట్లకు, లెక్కించిన ఓట్లకు మధ్య తీవ్ర వ్యత్యాసాలు ఉన్న విషయాన్ని ఇటీవలే వైర్‌ వెబ్‌సైట్‌ ప్రస్తావించింది. అదే తరహాలో రాష్ట్రంలో అన్ని నియోజకవర్గాల్లోనూ పోలైన ఓట్లకు, లెక్కించిన ఓట్లకు మధ్య తేడాలు ఉన్నాయని తెలుస్తున్నది.

మే 25న తొలి ఐదు దశల్లో ఈవీఎంలలో పోలైన ఓట్ల సంఖ్యను కేంద్ర ఎన్నికల సంఘం ప్రకటించింది. ఈ సంఖ్యలో ఎలాంటి మార్పులైనా అసాధ్యమని కుండబద్దలు కొట్టింది. కానీ.. వాస్తవాలు మాత్రం అందుకు భిన్నంగా ఉన్నాయి. పోలైన ఓట్లకు, లెక్కించిన ఓట్లకు తేడాలు కనిపిస్తున్నాయి.

తెలంగాణ విషయానికి వస్తే.. మొత్తం 17 లోక్‌సభ నియోజకవర్గాల్లోనూ వ్యత్యాసాలు ఉండటం గమనార్హం. వీటిలో మెదక్‌, నిజామాబాద్‌లలో పోల్‌ అయిన ఓట్లకంటే లెక్కించిన ఓట్లు ఎక్కువగా ఉన్నాయి. మిగిలినవాటిలో పోలైన ఓట్లకంటే లెక్కించిన ఓట్లు తక్కువగా ఉన్నాయి. ఈవీఎంల ట్యాంపరింగ్‌ అంశాల సంగతి సరే.. ముందు ఈ ఓట్ల తేడా ఎందుకు ఉన్నదో ఎన్నికల సంఘం వివరించాలన్న డిమాండ్లు వినిపిస్తున్నాయి.