Deeksha Divas : ‘స్థానికం’ వేళ..మళ్లీ బీఆర్ఎస్ ‘సెంటిమెంట్’ రాగం!

స్థానిక సంస్థల ఎన్నికల వేళ బీఆర్ఎస్ మళ్లీ తెలంగాణ సెంటిమెంట్‌ను ఎత్తుకుంటూ దీక్షా దీవస్‌తో కేడర్‌ను చైతన్యం చేసే ప్రయత్నంలో ఉంది. కాంగ్రెస్ తీవ్ర విమర్శలు.

విధాత, హైదరాబాద్: అధికారంలో ఉన్ననాళ్లు తెలంగాణ ఉద్యమ సోయిని విస్మరించి..ఉద్యమకారులను వదిలేసి..వలసవాదులకు పెద్దపీట వేశారన్న విమర్శల పాలైన బీఆర్ఎస్ పార్టీకి.. అధికారం పోయాక ఎదురవుతున్న ఎన్నికల సమరంలో తెలంగాణ సెంటిమెంట్ ను ఎత్తుకోవడం అనివార్యంగా మారిపోయింది. అసెంబ్లీ ఎన్నికలలో అధికార మత్తు తొలగిపోయాక..తదుపరి వచ్చిన పార్లమెంట్ ఎన్నికల్లో ఇంటి పార్టీ నినాదం ఎత్తుకుని సెంటిమెంట్ రాజేసినా జనం వ్యతిరేకతను తప్పించుకోలేకపోయింది. పార్లమెంటు ఎన్నికల్లో సున్న స్థానాలకే పరిమితమై..మూడో స్థానంలో నిలిచి పార్టీ అవిర్భావం నుంచి లేని ఘోర రికార్డును మూటగట్టుకుంది. ఇంకోవైపు 10మంది పార్టీ ఎమ్మెల్యేల ఫిరాయింపులు, కాళేశ్వరం, ఈ ఫార్ములా కారు రేస్, ఫోన్ ట్యాపింగ్, గొర్రెల స్కామ్, థర్మల్ ప్లాంట్ల నిర్మాణాలు, విద్యుత్తు కొనుగోలు ఒప్పందాలు వంటి వరుస కేసులు, విచారణ కమిషన్లు బీఆర్ఎస్ పాలకులను ప్రజాబోనులో నిలబెట్టాయి. మధ్యలో ఎదురైన పలు ఎమ్మెల్సీ ఎన్నికలలో పోటీకి సైతం వెనుకడుగు వేయాల్సిన పరిస్థితిని బీఆర్ఎస్ ఎదుర్కొంది. కంటోన్మెంట్, జూబ్లీహిల్స్ ఉప ఎన్నికల్లో సానుభూతి పవనాలతో గట్టేక్కాలన్న ఎత్తగడలు సైతం ఫలించలేదు. ఇంతలో కవిత తిరుగుబాటు ఇంటిపోరు రచ్చ కెక్కిస్తూ..బీఆర్ఎస్ ను మరింత ఇరకాటంలో పడేస్తుంది. ఈ క్రమంలో వచ్చిపడిన స్థానిక సంస్థల ఎన్నికలు బీఆర్ఎస్ పార్టీ మనుగడకు కీలకంగా మారాయి. కేసీఆర్ ఫామ్ హౌస్ కే పరిమితమవుతుండగా..కారు పార్టీ స్టీరింగ్ ను చేపట్టిన బావ బామ్మర్దులు కేటీఆర్, హరీష్ రావుల నాయకత్వానికి సైతం ఈ ఎన్నికలు పరీక్ష కాబోతున్నాయి.

‘స్థానికం’ వేళ దీక్షా దీవస్ తో సెంటిమెంట్ జపం

అసెంబ్లీ ఎన్నికల్లో ప్రధాన ప్రతిపక్షం బీఆర్ఎస్ ను గద్దె దించి అధికారంలోకి వచ్చిన కాంగ్రెస్ ప్రభుత్వం ఆ తర్వాతా జరిగిన అన్ని ఎన్నికల్లో తన ఆధిపత్యాన్ని కొనసాగించింది. కాంగ్రెస్ రెండెళ్ల పాలనకు రెఫరెండమ్ గా నిలిచిన జూబ్లీహిల్స్ ఉప ఎన్నిక విజయం జోష్..కేంద్రం నిధుల సాధన క్రమంలో ప్రభుత్వం రాష్ట్రంలో స్థానిక సంస్థల ఎన్నికలకు సిద్దమైంది. ముందుగా గ్రామ పంచాయతీల ఎన్నికలు నిర్వహిస్తుంది. దీంతో స్థానిక పోరులో మరోసారి అధికార కాంగ్రెస్ ను ఢీకొని తన ఉనికిని నిలబెట్టుకోవాల్సిన పరిస్థితి బీఆర్ఎస్ కు అనివార్యంగా మారింది. పై స్థాయి నాయకులు వలసలు పోయినా…గ్రామాల్లో కేడర్ మాత్రం బలంగా ఉందని నమ్ముతున్న బీఆర్ఎస్ పార్టీ స్థానిక ఎన్నికల్లో సైతం దెబ్బతింటే..కేడర్ కూడా వలస బాట పట్టే ప్రమాదం లేకపోలేదు. ఈ నేపథ్యంలో స్థానిక ఎన్నికల్లో తిరిగి పుంజుకోవాలని భావిస్తున్న బీఆర్ఎస్ నాయకత్వం కాంగ్రెస్ ప్రభుత్వం ఎన్నికల హామీల వైఫల్యాలను, అవినీతిని ఎండగడుతునే..అంతకు మించి మరోసారి తెలంగాణ సెంటిమెంట్ ను రాజేసే ప్రయత్నాలు చేస్తుంది. ఇందులో భాగంగా తాజాగా డిసెంబర్ 29 దీక్షా దీవస్ నిర్వహణపై హడావుడి చేస్తుంది. గ్రామాల వారిగా దీక్షా దీవస్ నిర్వహించాలంటూ కేడర్ ను పురమాయిస్తుంది. తద్వారా మరోసారి తెలంగాణ సెంటిమెంట్ ను గుర్తు చేసి..తెలంగాణ ఉద్యమ పార్టీగా ఎంతోకొంత స్థానిక ఎన్నికల్లో రాజకీయంగా బలపడాలని తలపోస్తుంది.

11రోజుల పాటు దీక్షా దీవస్ కు బీఆర్ఎస్ పిలుపు

దీక్షా దీవస్ సందర్బంగా నవంబర్ 29 నుంచి డిసెంబర్ 09 వరకు తెలంగాణ ఉద్యమంలోని నాటి జ్ఞాపకాలు, అనుభూతులు, పోరాట సన్నివేశాలను గుర్తు చేసుకుందాం అని బీఆర్ఎస్ నాయకత్వం కేడర్ కు పిలుపునిచ్చింది. “తెలంగాణ ఉద్యమంలో నేను” అనే ట్యాగ్ లైన్ తో #TelanganaUdyamamloNenu హ్యాష్‌ట్యాగ్ వాడుతూ… నాటి మీ ఫోటోలను, అనుభవాలను ఈ 11 రోజుల పాటు మీ సోషల్ మీడియా హ్యాండిల్స్‌లో పంచుకోవాలని పిలుపునిస్తున్నట్లుగా పేర్కొంది. రాష్ట్రసాధన ఉద్యమాన్ని మలుపుతిప్పి, గెలుపు వైపు నడిపించిన అరుదైన ఘట్టం.. దీక్షా దివస్‌! అది కేసీఆర్‌ సంకల్ప బలానికి, దీక్షాదక్షతకు సాక్ష్యం! అది అరవై ఏండ్ల పోరాటానికి క్లైమాక్స్‌ ఎపిసోడ్‌! అంటూ బీఆర్ఎస్ సెంటిమెంట్ ను రాజేస్తుంది. ‘ప్రత్యేక రాష్ట్రం వచ్చుడో.. కేసీఆర్‌ సచ్చుడో!’ ‘కేసీఆర్‌ శవయాత్రో.. తెలంగాణ జైత్రయాత్రో!’ అని గర్జించిన దీక్షా దీవస్ కార్యక్రమాలను విజయవంతం చేయాలని బీఆర్ఎస్ పిలుపునిచ్చింది.

కేసీఆర్ బూటకపు దీక్షాదీవస్ ను నమ్మెద్దు : కాంగ్రెస్

స్థానిక సంస్థల ఎన్నికల సమయంలో బీఆర్ఎస్ పార్టీ దీక్షా దీవస్ పేరుతో చేస్తున్న హడావుడిని కాంగ్రెస్ పార్టీ ఎద్దేవా చేస్తుంది. ప్రజా సెంటిమెంట్‌ను రాజకీయ లాభం కోసం వాడుకుని కేసీఆర్ కుటుంబమే లబ్ధి పొందిందని, అమరుల శవాలపై కేసీఆర్ అధికారం అనుభవించారని, 2009లో కేసీఆర్ చేసిన దీక్ష పూర్తిగా నాటకం అని కాంగ్రెస్ విమర్శలు ఎక్కుపెడుతుంది. అసలు కేసీఆర్ దీక్ష వల్ల తెలంగాణ రాలేదు అని, సోనియా గాంధీ వల్ల తెలంగాణ వచ్చిందని గుర్తు చేస్తుంది. ‘రాష్ట్రం కోసం దీక్ష చేస్తున్నా’ అని చెప్పి నిమ్స్‌లో కేసీఆర్ ఆనాడు ఫ్లూయిడ్స్ తీసుకున్నారని, దీనికి సంబంధించిన ఆధారాలు ఉన్నాయని, కేటీఆర్ ఒక్కసారి చదవాలని సూచించారు. కేసీఆర్ బూటకపు దీక్షా దీవస్ ను నమ్మవద్దంటూ టీపీసీసీ తెలంగాణ ప్రజలకు విజ్ఞప్తి చేసింది.