Harish Rao | కాళోజీ వర్సిటీలో అవినీతి బాగోతం.. గవర్నర్‌కు హరీశ్‌రావు లేఖ

కాళోజీ హెల్త్ యూనివర్సిటీలో కేంద్రంగా జరుగుతున్న అవినీతి బాగోతంపై వెంటనే చర్యలు తీసుకోవాలని కోరుతూ రాష్ట్ర గవర్నర్ కు, నేషనల్ మెడికల్ కౌన్సిల్ (NMC) చైర్మన్ కు మాజీ మంత్రి, ఎమ్మెల్యే టి.హరీశ్ రావు లేఖ రాశారు.

విధాత, వరంగల్ ప్రతినిధి:

కాళోజీ హెల్త్ యూనివర్సిటీలో కేంద్రంగా జరుగుతున్న అవినీతి బాగోతంపై వెంటనే చర్యలు తీసుకోవాలని కోరుతూ రాష్ట్ర గవర్నర్ కు, నేషనల్ మెడికల్ కౌన్సిల్ (NMC) చైర్మన్ కు మాజీ మంత్రి, ఎమ్మెల్యే టి.హరీశ్ రావు లేఖ రాశారు. యూనివర్సిటీ కాంగ్రెస్ పాలనలో అవినీతి, అక్రమాలు, వివాదాలకు నిలయంగా మారడం అత్యంత శోచనీయమన్నారు. వైద్య విద్య మార్కుల రీ-వాల్యుయేషన్ ప్రక్రియపై కొద్ది రోజులుగా తీవ్రమైన ఆరోపణలు వెల్లువెత్తుతున్నప్పటికీ, ప్రభుత్వం ఎందుకు మౌనంగా ఉన్నట్లు? అంటూ హరీశ్ రావు ప్రశ్నించారు.

పీజీ వైద్య పరీక్షల్లో ఫెయిల్ అయిన ఐదుగురు విద్యార్థులు, కొద్ది రోజులకే ఎలా పాస్ అవుతారు? ఈ అక్రమాల వెనుక విశ్వవిద్యాలయ వైస్ ఛాన్సలర్ డా. నందకుమార్ రెడ్డి సూత్రధారి అని ఆరోపణలు బలంగా వినిపిస్తున్నప్పటికీ, కాంగ్రెస్ ప్రభుత్వం ఎందుకు చర్యలు తీసుకోవడం లేదు? అని నిలదీశారు. ఫెయిల్ అయిన విద్యార్థులంతా ప్రైవేట్ మెడికల్ కాలేజీలకు చెందినవారే కావడం, వైస్ ఛాన్సలర్ ఆ కాలేజీలతో ఎన్ని కోట్ల రూపాయల డీల్ చేసుకున్నారనే ప్రశ్నలు లేవనెత్తుతున్నాయి. ఈ స్కాం విషయంలో వీసీ వెనుక ఉన్న ప్రభుత్వ పెద్దలు ఎవరు? ప్రభుత్వం చర్యలు తీసుకోవడంలో ఎందుకు మీనమేషాలు లెక్కిస్తున్నదంటూ హరీశ్ రావు ఈ లేఖలో ప్రశ్నించారు.