HYDRAA | హైడ్రాకు ఇక నుండి హై పవర్స్.. ఆమోదం తెలిపిన గవర్నర్

హైద‌రాబాద్ : విపత్తు నిర్వహణ, ప్రభుత్వ ఆస్తుల రక్షణ కోసం ఏర్పాటైన హైదరాబాద్‌ డిజాస్టర్‌ రెస్పాన్స్‌ అండ్‌ అస్సెట్‌ ప్రొటెక్షన్‌ ఏజెన్సీ (హైడ్రా)( HYDRAA ) పనితీరు రోజురోజుకూ వివాదాస్పదమవుతున్న నేప‌థ్యంలో మ‌రో ముంద‌డుగు ప‌డింది.

HYDRAA | హైద‌రాబాద్ : విపత్తు నిర్వహణ, ప్రభుత్వ ఆస్తుల రక్షణ కోసం ఏర్పాటైన హైదరాబాద్‌ డిజాస్టర్‌ రెస్పాన్స్‌ అండ్‌ అస్సెట్‌ ప్రొటెక్షన్‌ ఏజెన్సీ (హైడ్రా)( HYDRAA ) పనితీరు రోజురోజుకూ వివాదాస్పదమవుతున్న నేప‌థ్యంలో మ‌రో ముంద‌డుగు ప‌డింది. హైడ్రాకు ఇక నుంచి హై ప‌వ‌ర్స్ ఇస్తూ తెలంగాణ గ‌వ‌ర్న‌ర్ జిష్ణుదేవ్ వ‌ర్మ( jishnu dev varma ) ఆమోదం తెలిపారు. హైడ్రాకు ప్ర‌త్యేక అధికారాలు ఇవ్వ‌డంతో.. ఇక నుంచి ఆక్ర‌మ‌ణ‌ల‌ను కూల్చివేత‌ల‌ను వేగ‌వంతం చేయ‌నున్నారు.

జీహెచ్ఎంసీ( GHMC ) చట్టం-1955లోని సెక్షన్ 374బీ ప్రకారం ఆక్రమణలను పరిశీలించడం, నోటీసులివ్వడం, ప్రభుత్వ స్థలాల్లోని ఆక్రమణల తొలగింపు అధికారం హైడ్రాకు వ‌చ్చింది. తెలంగాణ పురపాలక చట్టం-2019 ప్రకారం సంబంధిత కార్పొరేషన్, మున్సిపాలిటీ కమిషనర్‌కు ఉన్న అధికారాలు కూడా హైడ్రాకు వ‌ర్తించ‌నున్నాయి. తెలంగాణ బీపాస్ చట్టం( Telangana B PASS Act )-2020 ప్రకారం జోనల్ కమిషనర్ నేతృత్వంలోని జోనల్ టాస్క్ ఫోర్స్, జిల్లా కలెక్టర్ నేతృత్వంలోని జిల్లా టాస్క్ ఫోర్స్‌కు ఉన్న అధికారాలు కూడా వ‌ర్తించ‌నున్నాయి.

హెచ్ఎండీఏ( HMDA ) చట్టం-2008లోని పలు సెక్షన్ల కింద కమిషనర్‌కు ఉన్న అధికారం, తెలంగాణ భూ ఆదాయ చట్టంలోని సెక్షన్ 1317ఎఫ్ ప్రకారం ఆక్రమణల తొలగింపు, ఆస్తుల పరిరక్షణకు సంబంధించి ఆర్డీవో, జిల్లా కలెక్టర్‌కు ఉన్న అధికారాలు, తెలంగాణ నీటిపారుదల చట్టంలోని అధికారాలు, జీవో ఎం.ఎస్-67 ద్వారా 2002లో యూడీఏ/ఎగ్జిక్యూటివ్ అధికారికి ఇచ్చిన అధికారాలు, తెలంగాణ భూ ఆక్రమణ చట్టం-1905లోని పలు సెక్షన్ల కింద జిల్లా కలెక్టర్, తహసీల్దార్, డీటీకి ఉన్న అధికారాలు, వాల్టా చట్టం-2002, తెలంగాణ బిల్డింగ్ రూల్స్, తెలంగాణ ఫైర్ సర్వీసెస్ చట్టంలోని పలు అధికారాలు హైడ్రాకు వ‌ర్తించ‌నున్నాయి. హైడ్రా ఈ కొత్త అధికారాలతో స్వయంగా అవసరమైన చర్యలను ఆలస్యం అవ్వకుండా తీసుకోగలుగుతుంది.