Panchayat Elections | సర్పంచ్ అభ్యర్థి‌ బంపర్ ఆఫర్.. గెలిపిస్తే పెళ్లిళ్లకు డీజే ఫ్రీ

పంచాయతీ ఎన్నికల పుణ్యమా అంటూ ఓ సర్పంచ్ అభ్యర్థి గ్రామ ప్రజలకు బంపర్ ఆఫర్ ఇచ్చారు. పార్టీలకు అతీతంగా సర్పంచ్ గా తనకు అవకాశం కల్పించాలని కోరుతున్నారు. ఈ మేరకు గ్రామాభివృద్ధి కోసం తాను చేపట్టే కార్యక్రమాలను వివరిస్తూ మేనిఫెస్టో విడుదల చేశారు.

విధాత, ప్రత్యేక ప్రతినిధి:

పంచాయతీ ఎన్నికల పుణ్యమా అంటూ ఓ సర్పంచ్ అభ్యర్థి గ్రామ ప్రజలకు బంపర్ ఆఫర్ ఇచ్చారు. పార్టీలకు అతీతంగా సర్పంచ్ గా తనకు అవకాశం కల్పించాలని కోరుతున్నారు. ఈ మేరకు గ్రామాభివృద్ధి కోసం తాను చేపట్టే కార్యక్రమాలను వివరిస్తూ మేనిఫెస్టో విడుదల చేశారు. ఈ మేనిఫెస్టో అమలుకు తన స్వంత నిధులు కేటాయిస్తానని స్పష్టం చేయడం ఇప్పుడు సర్వత్రా చర్చనీయాంశంగా మారింది. ఖమ్మం జిల్లా నేలకొండపల్లి మండలంలోని ముఠాపురం గ్రామంలో సర్పంచ్ అభ్యర్థి ఈ మేరకు గ్రామ ప్రజలకు బంపర్ ఆఫర్ ప్రకటించారు.

21 హామీలతో మేనిఫెస్టో..

సర్పంచ్ అభ్యర్ధిగా తన మేనిఫెస్టో అంటూ 21 అంశాలపై స్పష్టమైన హామీ ఇస్తూ తనను గెలిపించాలని కోరారు. వివరాలిలా ఉన్నాయి. 1. గ్రామంలోని వీరన్న స్వామి ఆలయం కోసం ఒక ఎకరం భూమి విరాళంగా ఇస్తాను. 2. నేను అధికారం లో ఉన్న ఐదు సంవత్సరాలు ఇంటి పన్ను నేనే చెల్లిస్తాను. 3. ఐదు సంవత్సరాలు నల్లా బిల్లులు నేనే కడతా. 4. ప్రతి నెల ఉచిత వైద్య శిబిరాలు నిర్వహించి పేదలకు ఉచిత మందులు పంపిణీ. 5. గ్రామంలోని ప్రతి దేవాలయానికి ప్రతి సంవత్సరం ₹50,000 ఉత్సవాల కోసం. 6. వినాయక చవితి సందర్భంగా అన్ని ఉత్సవ కమిటీలకు విగ్రహాలు ఉచితం. 7. గ్రామంలోని మసీదు, చర్చి లకు ప్రతి సంవత్సరం ₹50,000 ప్రార్థనల కోసం. 8. ప్రభుత్వ పాఠశాలల్లో ఆగస్టు 15, జనవరి 26 కార్యక్రమాలకు పోటీల బహుమతులు నేను అందిస్తాను. 9. బాగా చదివే విద్యార్థులకు ప్రతి తరగతి నుండి ఇద్దరికి ప్రతి సంవత్సరం ₹2,000 స్కాలర్‌షిప్. 10. ప్రతి సంవత్సరం ఇతర గ్రామాల్లో చదివే 10 మంది విద్యార్థులకు సైకిళ్లు ఉచితం. 11. సంక్రాంతి పండుగకు ముగ్గుల పోటీ బహుమతులకు ₹5,000. 12. అయ్యప్ప మాలధారులకు నిత్య అన్నదానం. 13. దసరా సందర్భంగా 100 మంది పేదలకు బట్టల పంపిణీ. 14. ఎంపిక చేసిన 10 మంది పేద మహిళలకు కుట్టు మిషన్లు పంపిణీ. 15. గ్రామంలో స్వంత ఖర్చులతో గ్రంథాలయం నిర్వహణ. 16. స్వంత ఖర్చులతో వాటర్ ప్లాంట్ ఏర్పాటు చేసి ఇంటింటికి ఉచిత మినరల్ వాటర్ సరఫరా. 17. పెళ్లిళ్లు, జాతరలకు డీజే, మైక్ ఉచితం. 18. మరణించిన వారికి శవ భద్రపరిచేందుకు ఫ్రీజర్ ఉచితం. 19. స్మశానానికి వైకుంఠ రథం ఏర్పాటు. 20. పేద కుటుంబాల్లో ఆడపిల్ల వివాహానికి చీర–సారే కానుక. 21. వికలాంగులకు ఉచిత ట్రైసైకిళ్లు. ఈ మేనిఫెస్టో కు గ్రామ ప్రజలు అందరూ అంగీకరిస్తారని భావిస్తున్నాను. ఏకగ్రీవ ఎన్నికకు మీ ఆశీస్సులు ఉండాలని ఆకాంక్షిస్తూ గ్రామ అభివృద్ధిలో నన్ను భాగస్వాములు చేయాలని సర్పంచ్ అభ్యర్థి విన్నవించారు.