విధాత, హైదరాబాద్:
తెలంగాణలో గ్రామ పంచాయతీ ఎన్నికల పర్వం ప్రారంభమైంది. రాష్ట్ర ఎన్నికల కమిషన్ మూడు దశల్లో పోలింగ్ నిర్వహించనున్నట్లు అధికారికంగా ప్రకటించిన విషయం తెలిసిందే. డిసెంబర్ 11, 14, 17 తేదీల్లో రాష్ట్రవ్యాప్తంగా గ్రామ పంచాయతీ ఎన్నికలు జరగనున్నాయి. మొత్తం 12,760 గ్రామ పంచాయతీలకు 1,13,534 వార్డులు ఉండగా, ఈసారి 1.66 కోట్ల మంది ఓటర్లు తమ ఓటు హక్కును వినియోగించుకోనున్నారు. ఉదయం 7 గంటల నుంచి మధ్యాహ్నం 1 గంట వరకు ఓటింగ్ ప్రక్రియ జరుగుతుంది. పోలింగ్ ముగిసిన వెంటనే రెండు గంటలకు కౌంటింగ్ పూర్తిచేసి ఫలితాల ప్రకటన కూడా వెలువడుతుంది. మొదటి దశ నోటిఫికేషన్ నవంబర్ 27న విడుదల కాగా రెండో దశ డిసెంబర్ 1, మూడో దశకు డిసెంబర్ 3వ తేదీన రానుంది.
ఈ క్రమంలో సర్పంచ్ ఎన్నికలపై అన్ని పార్టీలు సీరియస్ గా ఉన్నాయి. అధికారంలో ఉన్న కాంగ్రెస్ పార్టీ పెద్దమొత్తంలో తమ పార్టీ మద్ధతు దారులను గెలిపించుకోవాలని ప్రణాళికలు సిద్ధం చేస్తోంది. సీఎం రేవంత్ రెడ్డి ఇప్పటికే పార్టీ సీనియర్ నేతలు, జిల్లా ఇన్‌ఛార్జులతో చర్చలు జరిపి సర్పంచ్ ఎన్నికల ప్రచార ప్రణాళికను సిద్ధం చేశారు. స్వయంగా ముఖ్యమంత్రే జిల్లాల వారీగా పర్యటిస్తూ ప్రచార సభల్లో పాల్గొంటారని కాంగ్రెస్ వర్గాలు వెల్లడించాయి. ముఖ్యమంత్రి రేవంత్ రెడ్డి జిల్లా పర్యటనకు సంబంధించి వివరాలు ఇలా ఉన్నాయి. డిసెంబర్ 1న మహబూబ్ నగర్ జిల్లా మక్తల్ తో సీఎం జిల్లాల పర్యటన ప్రారంభం కానుంది. డిసెంబర్ 2న ఖమ్మం జిల్లా కొత్తగూడెంలో, 3న కరీంనగర్ జిల్లా హుస్నాబాద్ లో, 4న ఆదిలాబాద్ లో, 5న నర్సంపేటలో, 6వ తేదీన నల్గొండ జిల్లా దేవరకొండలో సమావేశాలు నిర్వహిస్తారు. ఈ పర్యటనలో సీఎం రేవంత్ రెడ్డి పార్టీ కార్యకర్తలు, అభ్యర్థులతో ప్రత్యేకంగా సమావేశం అయి దిశా నిర్దేశం చేయనున్నారు.
Also Read –Minister Sitakka | స్థానిక ఎన్నికల్లో సత్తా చాటాలి : మంత్రి సీతక్క
Harish Rao | ‘చిల్లర మాటలు.. చీప్ పాలిటిక్స్’.. సీఎం రేవంత్ పై హరీశ్ ఫైర్
Silent Volcanoes | ఎప్పుడైనా బద్దలయ్యేందుకు సిద్ధంగా మరిన్ని అగ్నిపర్వతాలు!