Silent Volcanoes | ఎప్పుడైనా బద్దలయ్యేందుకు సిద్ధంగా మరిన్ని అగ్నిపర్వతాలు!

ఇథియోపియాలోని అగ్నిపర్వతం 12000 ఏళ్లపాటు నిశ్శబ్దంగా ఉండి.. ఒక్కసారిగా విస్ఫోటం చెందిన విషయం తెలిసిందే. అయితే.. ఇలాంటి అనేక అగ్నిపర్వతాలు ఎప్పుడైనా బద్దలయ్యేందుకు సిద్దంగా ఉన్నాయని నిపుణులు చెబుతున్నారు. వాటిలో కొన్ని ఇథియోపియా విస్ఫోటానికంటే పెద్దగా ఉంటాయని హెచ్చరిస్తున్నారు. నిజానికి నిపుణులు చురుకుగా ఉండి.. రేపో మాపో పేలుతాయన్న అగ్నిపర్వతాలను మాత్రమే గమనిస్తూ ఉన్నారు. కానీ.. ఎవరూ చూడని నిశ్శబ్ద అగ్నిపర్వతం ప్రపంచ విపత్తుకు దారి తీస్తుందని చెబుతున్నారు.

Silent Volcanoes | ఇథియోపియా అగ్నిపర్వతం 12వేల ఏళ్ల తర్వాత బద్దలైంది. ఇటువంటి ఆకస్మిక ప్రకృతి విపత్తులను ఎదుర్కొనేందుకు ప్రపంచం సిద్ధంగా లేదన్న సంకేతాలను ఈ అగ్నిపర్వతం పంపిందన్న అభిప్రాయాలు శాస్త్రజ్ఞుల్లో వ్యక్తమవుతున్నాయి. శాస్త్రవేత్తలు, ప్రభుత్వాల దృష్టి సిసిలీ లోని మౌంట్‌ ఎట్నా లేదా అమెరికాలోని యెల్లోస్టోన్‌ వంటి వాటిపైనే కేంద్రీకృతమై ఉంది. కానీ.. దీర్ఘకాలికంగా నిశ్శబ్దంగా ఉన్న ఒక అగ్నిపర్వతం ప్రపంచ స్థాయి అగ్నిపర్వత విపత్తుకు దారి తీస్తుందని ది కన్జర్వేషన్‌ పబ్లిష్‌ చేసిన ఒక పత్రంలో మైక్‌ కాసిడీ పేర్కొన్నారు. చాలా మందికి అర్థమయ్యేలోపే ఇవి విస్ఫోటం చెందుతాయని ఆయన పేర్కొన్నారు.

ఇథియోపియాలోని ఉత్తర ప్రాంతమైన అఫార్‌లోని హేలి గుబ్బి అగ్నిపర్వతం విస్ఫోటం ఇందుకు ఉదాహరణగా శాస్త్రవేత్తలు చూపుతున్నారు. 2025 నవంబర్‌ 23వ తేదీన ఇది బద్దలైంది. నిజానికి చివరిసారిగా ఈ అగ్నిపర్వతం బద్దలైంది 11,700 సంవత్సరాల క్రితం. అంతేకాదు.. హోలోసీన్‌ యుగంలో అంటే మంచుయుగం ముగిసిన తర్వాత మొదటిసారి పేలింది. దీని విస్ఫోటం తీవ్రతకు బూడిద మేఘం 45వేల అడుగుల ఎత్తునకు ఎగిసింది. దాని ప్రభావం ఉత్తర భారతదేశంలోని కొన్ని ప్రాంతాలపై పడింది.

కొన్ని శతాబ్దాలుగా నిద్రాణంగా ఉన్న మెక్సికోలోని ఎల్‌ చిచోన్‌ అగ్నిపర్వతం విస్ఫోటాన్ని మైక్‌ కాసిడీ మరో ఉదాహరణగా చెబుతున్నారు. ఈ అగ్నిపర్వతం కొన్ని శతాబ్దాలపాటు నిశ్శబ్దంగా ఉంది.. 1982లో బద్దలైంది. నిజానికి ఇది అంత సుప్రసిద్ధ అగ్నిపర్వతం కూడా కాదు. దాంతో అధికారులు, నిపుణులు కూడా దానిపై శ్రద్ధ పెట్టలేదు. కానీ.. ఈ అగ్నిపర్వత విస్ఫోటం కారణంగా వేడి రాళ్లు, వేడి వాయువులు ఎగసిపడ్డాయి. నదులన్నీ బూడిదతో నిండిపోయాయి. అనేక భవనాలు ధ్వంసం అయ్యాయి. సుమారు రెండు వేల మంది ఈ అగ్నిపర్వత విస్ఫోటం కారణంగా మరణించారని అంచనా. 20వేల మందికిపైగా నిర్వాసితులయ్యారు. అంతేకాదు.. అగ్నిపర్వత విస్ఫోటం కారణంగా భారీ స్థాయిలో వెలువడిన సల్ఫర్‌.. ఉపరితల వాతావరణంలో తీవ్ర స్థాయి మార్పులకు కారణమైంది. ఉత్తరార్ధ గోళం చల్లబడింది. ఆఫ్రికన్‌ రుతుపవనాలు దక్షిణం వైపు మారాయి. దీని వల్ల కరువు ఏర్పడిందని కూడా కాసిడీ పేర్కొన్నారు.

ప్రస్తుతానికి చాలా కొద్ది సంఖ్యలోని ప్రముఖ అగ్నిపర్వతాలనే నిత్యం పర్యవేక్షిస్తున్నారు. దీంతో తీవ్ర అగాథం ఏర్పడిందని కాసిడీ అంటున్నారు. ‘యాక్టివ్‌గా ఉన్న అగ్నిపర్వతాల్లో సగానికంటే తక్కువ పర్వతాలను మాత్రమే పర్యవేక్షిస్తున్నారు. అందులోనూ బాగా తెలిసిన కొన్నింటిపైనే శాస్త్రీయ పరిశోధనలు అసమాన స్థాయిల్లో కేంద్రీకృతమయ్యాయి’ అని ఆయన పేర్కొన్నారు.

భూకంపాలు విస్ఫోటం చెందడం ఒక ప్రకృతి పరిణామంగా చూడకూడదని నిపుణులు చెబుతున్నారు. ఇది పెద్ద ఎత్తున కరువుకాటకాలకు, రోగాల వ్యాప్తికి, అంతిమంగా సామాజిక తిరుగుబాట్లకు కారణమవుతాయని అంటున్నారు. అయితే.. ఇటువంటి కీలకమైన అగ్నిపర్వతాలను నిత్యం పర్యవేక్షించే వ్యవస్థలు అవసరమైన స్థాయిలో లేకపోవడం ఒక లోపంగా చెబుతున్నారు.

Read Also |

Kokapet Lands | బంగారు భూములు.. కోకాపేటలో ఎకరం రూ.151 కోట్లు
IRCTC Best Package|| టెంపుల్స్ ఆఫ్ తమిళనాడు
హైదరాబాద్‌కు కొత్త క్రికెట్‌ స్టేడియం అడియాసేనా? కొత్త స్టేడియాల్లో తెలంగాణకేదీ చోటు?
AI Teacher Robot : ఇంటర్ విద్యార్థి క్రియేషన్..రూ.25వేలతోనే ఏఐ రోబో!