Parthiban | ప్రముఖ నటుడు, దర్శకుడు ఆర్ పార్తీబన్ రీసెంట్గా తమిళనాడు ముఖ్యమంత్రి విజయ్ను మర్యాదపూర్వకంగా కలిశారు. ఈ సందర్భంగా విజయ్కు స్వహస్తాలతో రాసిన ప్రత్యేక లేఖతో పాటు, ఆయన కోసం ప్రత్యేకంగా రూపొందించిన ఒక పెయింటింగ్ను బహూకరించారు. ఈ భేటీకి సంబంధించిన ఫొటోలు ప్రస్తుతం సోషల్ మీడియాలో వైరల్ అవుతూ సినీ, రాజకీయ వర్గాల్లో చర్చనీయాంశంగా మారాయి.
సినీ నటుడిగా కోట్లాది అభిమానులను సంపాదించిన విజయ్, రాజకీయాల్లోకి ప్రవేశించి ప్రజల మద్దతుతో ముఖ్యమంత్రి స్థాయికి చేరుకోవడం అభినందనీయమని పార్తిబన్ తన లేఖలో పేర్కొన్నట్లు తెలుస్తోంది. విజయ్ రాజకీయ ప్రస్థానం ఎంతో మందికి స్ఫూర్తిదాయకంగా నిలుస్తోందని ఆయన ప్రశంసించారు. అంతేకాకుండా ఈ సందర్భంగా విజయ్ను ‘చక్రవర్తి’ అని సంబోధించడం కూడా ప్రత్యేక ఆకర్షణగా మారింది.
రాజసం ఉట్టిపడే పెయింటింగ్
పార్తిబన్ బహూకరించిన పెయింటింగ్లో విజయ్ను రాజసంగా చిత్రీకరించారు. సింహాసనం పక్కన నిలబడి ఉన్న విజయ్ చిత్రాన్ని ప్రత్యేక శైలిలో రూపొందించినట్లు తెలుస్తోంది. ఆ పెయింటింగ్లో విజయ్ నాయకత్వం, వ్యక్తిత్వాన్ని ప్రతిబింబించేలా కళాత్మకంగా రూపకల్పన చేసినట్లు అభిమానులు వ్యాఖ్యానిస్తున్నారు.
భేటీ సందర్భంగా విజయ్, పార్తిబన్ మధ్య పలు అంశాలపై చర్చ జరిగినట్లు సమాచారం. అయితే ఆ సమావేశానికి సంబంధించిన పూర్తి వివరాలు మాత్రం బయటకు రాలేదు.
త్రిష వివాదం తర్వాత ప్రాధాన్యం సంతరించుకున్న భేటీ
ఈ భేటీకి మరో కారణంతో కూడా ప్రాధాన్యం ఏర్పడింది. కొన్ని నెలల క్రితం నటి త్రిష గురించి పార్తిబన్ చేసిన వ్యాఖ్యలు తీవ్ర వివాదానికి దారితీశాయి. గత మార్చిలో జరిగిన ఒక కార్యక్రమంలో త్రిష ఫొటోను ఉద్దేశిస్తూ ఆయన చేసిన వ్యాఖ్యలు సోషల్ మీడియాలో పెద్ద చర్చకు కారణమయ్యాయి.
ఆ వ్యాఖ్యలపై విమర్శలు వెల్లువెత్తడంతో పార్తిబన్ అనంతరం సోషల్ మీడియా వేదికగా క్షమాపణలు కోరారు. తన వ్యాఖ్యల వల్ల ఎవరైనా బాధపడి ఉంటే విచారం వ్యక్తం చేస్తున్నట్లు తెలిపారు.
త్రిష ఘాటు స్పందన
పార్తిబన్ వ్యాఖ్యలపై త్రిష కూడా అప్పట్లో బహిరంగంగా స్పందించారు. సోషల్ మీడియా వేదికగా ఆమె చేసిన పోస్ట్ వైరల్ అయింది. “మైక్ చేతిలో ఉందని మాట్లాడే ప్రతి మాట తెలివైనదిగా ఉండదు. కొన్ని సందర్భాల్లో అవే మన అవగాహన లోపాన్ని బయటపెడతాయి” అంటూ ఆమె పరోక్షంగా స్పందించారు. ఈ వ్యాఖ్యలు అప్పట్లో సోషల్ మీడియాలో విస్తృత చర్చకు దారితీశాయి.
సినీ, రాజకీయ వర్గాల్లో ఆసక్తి
ఇప్పుడు విజయ్ను పార్తిబన్ కలవడం, ప్రత్యేకంగా లేఖ, పెయింటింగ్ అందించడం రాజకీయ, సినీ వర్గాల్లో ఆసక్తికరంగా మారింది. విజయ్ రాజకీయాల్లో కీలక పాత్ర పోషిస్తున్న ప్రస్తుత పరిస్థితుల్లో ప్రముఖ సినీ వ్యక్తులు ఆయనను కలవడం చర్చనీయాంశంగా మారుతోంది.
మరోవైపు, ఈ భేటీ పూర్తిగా మర్యాదపూర్వక సమావేశమేనా? లేక భవిష్యత్తులో ఏదైనా రాజకీయ లేదా సామాజిక కార్యక్రమాలకు సంబంధించి చర్చలు జరిగాయా? అనే అంశాలపై కూడా ఊహాగానాలు వినిపిస్తున్నాయి. అయితే దీనిపై అధికారికంగా ఎలాంటి సమాచారం విడుదల కాలేదు.
ఏదేమైనా, పార్తిబన్–విజయ్ భేటీ ప్రస్తుతం తమిళనాడు రాజకీయాలతో పాటు కోలీవుడ్ వర్గాల్లో కూడా హాట్ టాపిక్గా మారింది. ముఖ్యంగా ‘చక్రవర్తి’ అంటూ విజయ్ను ప్రశంసిస్తూ పార్తిబన్ చేసిన వ్యాఖ్యలు అభిమానుల దృష్టిని ఆకర్షిస్తున్నాయి.
