Malla Raji Reddy : మావోయిస్టు అగ్రనేత మల్లా రాజిరెడ్డి ఎన్ కౌంటర్ !?

మావోయిస్టు అగ్రనేత మల్లా రాజిరెడ్డి ఎన్‌కౌంటర్‌లో హతమైనట్లు వార్తలు. అయితే పోలీసులగానీ, మావోయిస్టులుగానీ అధికారిక ప్రకటన వెలువరించకపోవడంతో గందరగోళం.

విధాత : మావోయిస్టు అగ్రనేత, ఆ పార్టీ కేంద్ర కమిటీ సభ్యుడు మల్లా రాజిరెడ్డి(72) అలియాస్‌ సాయన్న అలియాస్‌ మీసాల సత్తెన్న ఎన్ కౌంటర్ లో హతమైనట్లుగా వార్తలు వెలువడటం కలకలం రేపింది. ఏపీలో ఇటీవల జరిగిన హిడ్మా ఎన్ కౌంటర్ సందర్బంగా మావోయిస్టు పార్టీ కార్యదర్శి తిప్పిరి తిరుపతి అలియాస్ దేవ్ జీ సహా రాజిరెడ్డి కూడా ఏపీ పోలీసుల అదుపులో ఉన్నారని, వారిని కోర్టులో హాజరుపరుచాలని ఏపీ హైకోర్టులో పిటిషన్ సైతం దాఖలైన సంగతి తెలిసిందే. ఈ నెల 18న వారిని పోలీసులు అదుపులోకి తీసుకున్నారని..వారిని ఎన్ కౌంటర్ చేసే ప్రమాదముందని పిటిషన్ లో ఆరోపించారు. తెలంగాణకు చెందిన గంగాధర్ అనే వ్యక్తి పిటిషన్ దాఖలు చేశారు. అయితే ఏపీ పోలీసులు మాత్రం వారు మా అదుపులో లేరని హైకోర్టుకు స్పష్టం చేశారు. ఇంతలోనే రాజిరెడ్డి ఎన్ కౌంటర్ అయినట్లుగా వార్తలు వెలువడటం సంచలనంగా మారింది. అయితే ఎన్ కౌంటర్ పై అటు పోలీసులుగాని..ఇటు మావోయిస్టు పార్టీగాని ఎలాంటి అధికారిక ప్రకటన వెలువరించలేదు. మల్లా రాజిరెడ్డి సతీమణి కూడా కొంతకాలం క్రితం జరిగిన ఎన్ కౌంటర్ లో మృతి చెందారు. రాజిరెడ్డి మరణవార్త అధికారిక ధృవీకరణ లేక కుటుంబ సభ్యులు, గ్రామస్తులు గందరగోళంతో కూడిన విషాదంలో ఉన్నారు.2023ఆగస్టు 18న కూడా రాజిరెడ్డి అనారోగ్యంతో మృతి చెందినట్లుగా వార్తలు వెలువడటం గమనార్హం.

అర్థ దశాబ్దంగా మావోయిస్టు పార్టీలోనే..

ఉమ్మడి కరీంనగర్ జిల్లా మంథని మండలం ఎక్లాసపూర్ పంచాయతీ పరిధిలోని శాస్త్రుల పల్లికి చెందిన మల్లా రాజిరెడ్డి మావోయిస్టు పార్టీ(పీపుల్స్ వార్) తొలితరం నాయకులైన కొండపల్లి సీతారామయ్య, గణపతి, సత్యమూర్తి, మల్లోజుల కోటేశ్వర్‌రావు తదితరుల సమకాలికుడు. మల్ల రాధమ్మ, వెంకట్‌రెడ్డి దంపతుల పెద్దకొడుకు రాజిరెడ్డి మంథనిలోనే ఇంటర్‌ వరకు చదువుకున్నాడు. విద్యార్థి దశలోనే ఆర్‌ఎస్ యూలో చేరారు. అప్పుడే రత్నమ్మతో ఆయనకు వివాహం జరిగింది. వారికి ఒక కుమార్తె.. శ్రీలత అలియాస్‌ స్నేహలత ఉన్నారు. కూతురు పుట్టిన కొద్దిరోజులకే 1977 ప్రాంతంలో అప్పటి పీపుల్స్‌వార్‌ పార్టీలో చేరారు. ఐదేళ్ల తర్వాత ఆయన భార్య రత్నమ్మ కూడా అడవిబాట పట్టారు. అప్పటినుంచి వారి కుమార్తె.. రాజిరెడ్డి తమ్ముడైన భీమారెడ్డి వద్ద పెరిగింది.

అంచలంచలుగా రాష్ట్ర స్థాయికి…

మావోయిస్టు పార్టీలో వివిధ రాష్ట్రాల్లో పలు హోదాల్లో పనిచేసిన మల్లా రాజిరెడ్డిని 1996-97లో కేంద్ర కమిటీలోకి తీసుకున్నారు. సంగ్రామ్‌, సాయన్న, మీసాల సత్తన్న, అలోక్‌, దేశ్‌పాండే వంటి పేర్లతో గుర్తింపు పొందారు. కేరళ, కర్ణాటక, మహారాష్ట్ర, తమిళనాడు, గుజరాత్‌తో కూడిన మావోయిస్టుల నైరుతి ప్రాంతీయ బ్యూరోలో విప్లవోద్యమానికి ఇన్‌చార్జిగా వ్యవహరించారు. 1986లో ఉమ్మడి ఆదిలాబాద్‌ జిల్లా సిర్పూర్‌ కాగజ్‌నగర్‌ పోలీస్‌ స్టేషన్‌పై దాడి, ఖమ్మం జిల్లా కరకగూడెం స్టేషన్‌పై దాడి, ఆదిలాబాద్‌ జిల్లా తపాలాపూర్‌లో నలుగురి హత్య వంటి అనేక కేసుల్లో ఆయన నిందితుడు. మాజీ స్పీకర్‌ శ్రీపాదరావు హత్య కేసులోనూ ఆయన నిందితుడుగా ఉన్నారు. ఉమ్మడి ఏపీలో పీపుల్స్‌వార్‌ చేసిన తొలి హత్య తపాల్‌పూర్‌ ఘటనలో కొండపల్లి సీతారామయ్యను ఏ1గా, రాజిరెడ్డిని ఏ2గా పేర్కొంటూ పోలీసులు కేసు నమోదు చేశారు. ఆయనపై కోటి రూపాయల రివార్డు ఉంది.

అరెస్టు.. విడుదల…మళ్లీ అడవి బాటలోకే

రాజిరెడ్డి 2007లో కేరళలోని ఎర్నాకుళం జిల్లా అంగన్‌మలైలో పోలీసులకు చిక్కడంతో.. వారు ఆయనను కరీంనగర్‌ జిల్లాకు తీసుకువచ్చారు. పోలీసులు ఆయన్ను 2007 డిసెంబరు 18న మెట్‌పల్లి కోర్టులో, 22న మంథని కోర్టులో హాజరుపరిచారు. ఈ క్రమంలో దాదాపు 30 సంవత్సరాల అజ్ఞాత తర్వాత తల్లిని కలిశారు. 14 రోజుల కస్టడీ అనంతరం ఆయనను హైదరాబాద్‌లోని చంచల్‌గూడ జైలుకు తరలించారు. దాదాపు 22 నెలల తర్వాత 2009 అక్టోబరు 9న బెయిల్‌పై విడుదలైన రాజిరెడ్డి.. మళ్లీ అజ్ఞాతంలోకి వెళ్లిపోయారు. రాజిరెడ్డి భార్య రత్నమ్మ సైతం ఆయన దారిలోనే నడిచారు. ఐదేళ్ల కూతురు శ్రీలతను వదిలేసి భర్తతో కలిసి విప్లవోద్యమ బాట పట్టిన ఆమె..దాదాపు 15 ఏళ్లపాటు పనిచేశాక ఓ ఎన్‌కౌంటర్‌లోప్రాణాలు కోల్పోయారు. రాజిరెడ్డి కూతురు శ్రీలత (స్నేహలత) తెలంగాణ స్టూడెంట్‌ ఫ్రంట్‌లో పనిచేస్తూ.. ఉద్యమ సహచరుడు, ఓయూ ప్రొఫెసర్‌ అయిన కాశీంను పెళ్లి చేసుకున్నారు.

ఇవి కూడా చదవండి :

TPCC Mahesh Goud | బీఆర్ఎస్ మరో కొత్త డ్రామాకు తెరతీసింది : పీసీసీ చీఫ్ మహేశ్ గౌడ్
Rising Telangana Global Summit : తెలంగాణ రైజింగ్ గ్లోబల్ సమ్మిట్ లోగో