విధాత, హైదరాబాద్ : నర్సాపూర్ ఎక్స్ ప్రెస్ రైలులో దొంగలు చోరీకి యత్నించిన ఘటన కలకలం రేపింది. పల్నాడు జిల్లా మాచర్ల రోడ్డు ఓవర్ బ్రిడ్జి వద్ద శనివారం అర్థరాత్రి కొంతమంది దుండగులు చైన్ లాగీ రైలును ఆపారు. బీ-5, ఎస్-10, ఎస్-13 బోగీల్లోని ప్రయాణికుల వద్ద ఆభరణాలు చోరీ చేసేందుకు ప్రయత్నించారు. దొంగలను అడ్డుకునే క్రమంలో ఓ మహిళ గట్టిగా కేకలు వేసింది.
వెంటనే ఆర్పీఎఫ్ సిబ్బంది అప్రమత్తం కావడంతో దొంగలు పరారయ్యారు. ఆర్పీఎఫ్ పోలీసులను చూసిన దొంగలు రైలు దిగి పారిపోతూ ప్రయాణికులపైన, ఆర్పీఎఫ్ పోలీసులపైన రాళ్లు రువ్వారు. ఈ ఘటనలో ఎవరికీ ఎలాంటి గాయాలు కాలేదు. రైలు నర్సాపూర్ నుంచి లింగంపల్లి వెళ్తుండగా ఈ ఘటన చోటు చేసుకుంది. అయితే దోపిడి యత్నం కారణంగా నర్సాపూర్ ఎక్స్ ప్రెస్ రైలు 30 నిమిషాలపాటు నడికుడి-పొందుగుల రైల్వేస్టేషన్ల మధ్య నిలిచిపోయింది.
