పదేళ్ల కూతురిపై కిరాతక తండ్రి అఘాయిత్యం

నారాయణపేట జిల్లా మరికల్ మండలంలో హృదయ విదారక ఘటన. పదేళ్ల బాలికపై తన తండ్రే లైంగిక దాడికి పాల్పడ్డ దుర్మార్గం ఆలస్యంగా వెలుగులోకి వచ్చింది. బాలిక ఆసుపత్రిలో చికిత్స పొందుతోంది.

విధాత, హైదరాబాద్ : నాన్నా నీ కాళ్ళు మొక్కుతా నన్నేమీ చేయకన్న కూడా కన్న ప్రేమను మరిచి కనికరం లేకుండా పదేళ్ల కూతురిపై ఓ కిరాతక తండ్రి లైంగిక దాడికి పాల్పడిన దుర్మార్గ ఘటన ఆలస్యంగా వెలుగులోకి వచ్చింది.
నారాయణపేట జిల్లా మరికల్ మండలంలోని ఓ గ్రామానికి చెందిన కుర్వ కుర్మయ్య ముగ్గురు కుమార్తెలు మక్తల్ లోని ప్రభుత్వ హాస్టల్లో చదువుతున్నారు. ఇటీవల చిన్న కూతురు(10) కుక్క కరవడంతో ఇంటికి వచ్చి గ్రామంలోని ప్రభుత్వ పాఠశాలలో 5వ తరగతి చదువుతుంది. ఈ నెల 25వ తేదీన తల్లి కూలీ పనులకు వెళ్లగా, తండ్రి మేకల వద్దకు వెళ్లాడు.
చిన్న కూతురు పాఠశాల నుండి వచ్చి చదువుకుంటుంది. మద్యం మత్తులో ఇంటికి వచ్చిన తండ్రి కామంతో కళ్లు మూసుకపోయి సొంత కూతురిపై లైంగిక దాడికి పాల్పడ్డాడు.నీ కాళ్లు మొక్కుతా నాన్న.. నన్ను ఏమీ చేయొద్దు అని ఎంత వేడుకున్నా కనికరించకుండా అఘాయిత్యానికి పాల్పడ్డాడు. బాలిక గట్టిగా కేకలు వేయడంతో స్థానికులు విని తీవ్ర రక్తస్రావంలో ఉన్న ఆమెను కాపాడారు.

కూలీ పనుల అనంతరం ఇంటికి తిరిగివచ్చిన తల్లి కూతురి పరిస్థితి చూసి, చికిత్స నిమిత్తం గ్రామంలోని ఆర్ఎంపీ వద్దకు తీసుకెళ్లింది. పరిస్థితి విషమించడంతో మరికల్ ప్రభుత్వ ఆసుపత్రికి తీసుకెళ్లగా..అక్కడి నుంచి మహబూబ్‌నగర్ జనరల్ ఆసుపత్రికి తరలించారు. శనివారం మహబూబ్‌నగర్ ప్రభుత్వ ఆసుపత్రికి తరలించగా, పోలీసు కంప్లైంట్ ఇస్తేనే వైద్యం చేస్తామని అక్కడి వైద్యులు తెలపడంతో ఈ దుర్మార్గ ఘటన వెలుగులోకి వచ్చింది. ఆదివారం బాలిక తల్లి ఫిర్యాదు మేరకు కేసు నమోదు చేసి, పరారీలో ఉన్న నిందితుడి కోసం పోలీసులు గాలిస్తున్నారు. మరోవైపు ఆసుపత్రిలో చికిత్స పొందుతున్న బాధిత బాలిక పరిస్థితి విషమంగా ఉంది.