Mrunal Takhur | టాలీవుడ్ ప్రేక్షకులను “సీత”గా కట్టిపడేసిన బాలీవుడ్ న‌టి మృణాల్ ఠాకూర్ (Mrunal Thakur) మరోసారి సోషల్ మీడియాలో అద్భుతమైన స్టోరీతో హార్ట్ టచ్ చేసింది. సీతారామం చిత్రంలో అసాధారణ నటనతో మంచి పేరుతెచ్చుకున్న మృణాల్, ఇప్పుడు స్టార్ హీరోల సరసన వరుస అవకాశాలతో బిజీగా మారిపోయింది. తాజాగా ఈ అందాల తార తన కల నెరవేర్చుకుంటూ ఖరీదైన మెర్సిడెస్ బెంజ్ కార్ కొనుగోలు చేసింది. కానీ ఆ నిర్ణయానికి వెనుక ఉన్న భావోద్వేగ కథ ఇప్పుడు ఇంటర్నెట్‌ని కదిలిస్తోంది.
అమ్మను అవమానించారు ..
మొత్తం కుటుంబాన్ని మోస్తూ, ఎన్నో కష్టాలను ఎదుర్కొంటూ తమను పెంచిన అమ్మ(Mother) గురించి మృణాల్ ఒక హృద్యమైన పోస్ట్ చేసింది. ఆమె చిన్ననాటి కష్టాలు, అవమానాలు, బాధలను గుర్తుచేసుకుంటూ తెలిపింది. నేను చాలా పేదరికంలో పుట్టాను. మా అమ్మ మాకు అన్నం పెట్టడానికి, స్కూల్‌కు పంపడానికి ఎంత కష్టపడిందో నాకు తెలుసు. బంధువులే మమ్మల్ని చిన్నచూపు చూశారు. మా అమ్మను ఎప్పుడూ కారులో ఎక్కనిచ్చేవారు కాదు. ‘నీకు అర్హత లేదు’ అని చెప్పేవారు. ఒకసారి అమ్మను రోడ్డుపైనే దించేసి వెళ్లిపోయారు. అది నా మైండ్‌లో బాగా నాటుకుపోయింది.. ఆ సంఘటన తనను జీవితంలో తప్పకుండా ఎదగాలని, డబ్బు సంపాదించాలని, అమ్మకు గౌరవం తీసుకురావాలని ప్రేరేపించిందని మృణాల్ వివరించింది.
మృణాల్ తన కోరికను నెరవేర్చుకున్న రోజు తాను కన్నీరు ఆపుకోలేకపోయానని తెలిపింది. అమ్మను అవమానించిన వాళ్లందరిలో ఎవరికీ లేని బెంజ్ కార్ అమ్మ కోసం కొన్నాను. నా కల అప్పుడు నిజమైంది అని మృణాల్ పేర్కొంది. అమ్మ‌డి పోస్ట్‌కు నెటిజన్లు ఫుల్ ఎమోషనల్ అయ్యి మృణాల్‌పై ప్రశంసలు కురిపిస్తున్నారు. మృణాల్ తొలుత టెలివిజన్ సీరియల్స్‌లో నటించింది. సినిమాల్లో అవకాశం ఇచ్చేందుకు చాలా మంది వెనుకాడారు. కానీ తన కష్టంతో, ప్రతిభతో అడుగడుగునా నిరూపించుకుంది. సీతారామం తర్వాత ఆమెకు తెలుగులో భారీ ఫ్యాన్‌బేస్ ఏర్పడింది. ప్రస్తుతం టాలీవుడ్, బాలీవుడ్‌ల్లో వరుస అవకాశాలతో దూసుకెళ్తోంది. అడివి శేష్‌తో డెకాయిట్ (Dacoit) చిత్రం చేస్తుండ‌గా, ఈ మూవీ 2026లో విడుద‌ల కానుంది. ఇంకా రెండు భారీ బాలీవుడ్ ప్రాజెక్టులు లైన్లో ఉన్నాయి