Sneha Reddy | అల్లు అర్జున్ నటించిన పుష్ప 2 ప్రీమియర్ షో సందర్భంగా జరిగిన విషాద ఘటనలో తీవ్రంగా గాయపడిన చిన్నారి శ్రీతేజ్ కుటుంబాన్ని తాజాగా అల్లు కుటుంబ సభ్యులు పరామర్శించారు. బుధవారం శ్రీతేజ్ నివాసానికి వెళ్లిన స్నేహ రెడ్డి, ప్రముఖ నిర్మాత అల్లు అరవింద్ చిన్నారి ఆరోగ్య పరిస్థితిని తెలుసుకుని కుటుంబ సభ్యులకు ధైర్యం చెప్పారు.
కొన్ని నెలలపాటు ఆసుపత్రిలో చికిత్స తీసుకున్న శ్రీతేజ్ ప్రస్తుతం ఇంట్లోనే విశ్రాంతి తీసుకుంటున్నాడు. ఈ సందర్భంగా చిన్నారిని కలిసి మాట్లాడిన స్నేహ రెడ్డి.. ఆరోగ్యం ఎలా ఉందని అడిగి తెలుసుకున్నారు. కుటుంబ సభ్యులతో కొంతసేపు మాట్లాడి వారికి భరోసా ఇచ్చారు.
అలాగే అల్లు అరవింద్ మాట్లాడుతూ.. శ్రీతేజ్ కుటుంబానికి తాము ఎప్పుడూ అండగా ఉంటామని తెలిపారు. ముఖ్యంగా శ్రీతేజ్ సోదరి చదువుకు సంబంధించిన పూర్తి బాధ్యతను తానే తీసుకుంటానని హామీ ఇచ్చినట్లు సమాచారం. ఈ పరిణామం కుటుంబ సభ్యులకు కొంత ధైర్యాన్ని ఇచ్చిందని తెలుస్తోంది.
ప్రీమియర్ షోలో జరిగిన విషాదం
పుష్ప 2 ప్రీమియర్ ప్రదర్శన సందర్భంగా హైదరాబాద్లోని సంధ్యా థియేటర్ వద్ద అభిమానులు భారీగా తరలివచ్చారు. ఈ క్రమంలో చోటుచేసుకున్న తొక్కిసలాటలో శ్రీతేజ్ తల్లి రేవతి అక్కడికక్కడే మృతి చెందగా.. చిన్నారి శ్రీతేజ్ తీవ్రంగా గాయపడి అపస్మారక స్థితిలోకి వెళ్లిపోయాడు.
అనంతరం అతడిని వెంటనే ఆసుపత్రికి తరలించి ఐసీయూలో చికిత్స అందించారు. కొన్ని నెలలపాటు కోమాలో ఉన్న శ్రీతేజ్ పరిస్థితి క్రమంగా మెరుగుపడటంతో ఇటీవల ఇంటికి తీసుకువచ్చినట్లు తెలిసింది.
అప్పుడే భరోసా ఇచ్చిన అల్లు అర్జున్
ఈ ఘటన జరిగిన వెంటనే అల్లు అర్జున్ కుటుంబ సభ్యులను పరామర్శించి తమవంతు సహాయం చేస్తామని ప్రకటించారు. శ్రీతేజ్ వైద్య చికిత్సకు సంబంధించిన ఖర్చులన్నీ భరిస్తామని, కుటుంబానికి ఎప్పుడూ అండగా ఉంటామని హామీ ఇచ్చారు.
ఇప్పటికే చిన్నారి భవిష్యత్తు కోసం రూ.2 కోట్ల ఫిక్స్డ్ డిపాజిట్ చేసినట్లు సమాచారం. తాజాగా స్నేహ రెడ్డి, అల్లు అరవింద్ స్వయంగా ఇంటికి వెళ్లి పరామర్శించడం మరోసారి చర్చనీయాంశంగా మారింది.ఈ సంఘటనతో అభిమానుల ఉత్సాహం విషాదంగా మారకుండా నిర్వాహకులు మరింత జాగ్రత్తలు తీసుకోవాల్సిన అవసరం ఉందని సినీ వర్గాలు అభిప్రాయపడుతున్నాయి.