Tollywood | ‘జన నాయగన్’ లీక్‌తో ఇండ‌స్ట్రీ అంతా షాక్… గ‌తంలో విడుదలకు ముందే లీకైన తెలుగు సినిమాలు ఇవే!

Tollywood | తమిళ స్టార్ విజయ్ నటించిన జన నాయగన్ సినిమా లీక్ వార్తలు సినీ పరిశ్రమలో తీవ్ర చర్చకు దారితీశాయి. థియేటర్లలో విడుదలకు ముందే సినిమా నెట్టింట ప్రత్యక్షమవడం అభిమానులకు పెద్ద షాక్‌గా మారింది. అయితే ఇలాంటి ఘటనలు టాలీవుడ్‌కు కొత్తేమీ కావు. గతంలో కూడా పలు పెద్ద తెలుగు సినిమాలు విడుదలకు ముందే పైరసీ బారిన పడ్డాయి.

Tollywood | తమిళ స్టార్ విజయ్ నటించిన జన నాయగన్ సినిమా లీక్ వార్తలు సినీ పరిశ్రమలో తీవ్ర చర్చకు దారితీశాయి. థియేటర్లలో విడుదలకు ముందే సినిమా నెట్టింట ప్రత్యక్షమవడం అభిమానులకు పెద్ద షాక్‌గా మారింది. అయితే ఇలాంటి ఘటనలు టాలీవుడ్‌కు కొత్తేమీ కావు. గతంలో కూడా పలు పెద్ద తెలుగు సినిమాలు విడుదలకు ముందే పైరసీ బారిన పడ్డాయి.

అందులో ముఖ్యంగా చెప్పుకోవాల్సింది అత్తారింటికి దారేది. పవన్ కల్యాణ్ హీరోగా, త్రివిక్రమ్ శ్రీనివాస్ దర్శకత్వంలో తెరకెక్కిన ఈ బ్లాక్‌బస్టర్ చిత్రం విడుదలకు ముందే లీక్ కావడం పెద్ద సంచలనంగా మారింది. మొదట ఫస్ట్ హాఫ్, ఆ తర్వాత దాదాపు పూర్తి సినిమా ఆన్‌లైన్‌లోకి రావడం నిర్మాతలకు భారీ షాక్ ఇచ్చింది. ఎడిటింగ్ సూట్ నుంచి కాపీ కావడం వల్లే ఈ లీక్ జరిగినట్లు తర్వాత తేలింది.

విజ‌య్ దేవ‌ర‌కొండ చిత్రం కూడా..

ఇక టాక్సీవాలా సినిమా లీక్ కూడా అప్పట్లో పెద్ద చర్చనీయాంశమైంది. విజయ్ దేవరకొండ హీరోగా నటించిన ఈ చిత్రం ఇంకా ఫైనల్ కట్ సిద్ధం కాకముందే, వీఎఫ్ఎక్స్ లేకుండా ఆన్‌లైన్‌లోకి వచ్చేసింది. దీంతో చిత్ర బృందం తీవ్రంగా నష్టపోయింది.

అలాగే గీత గోవిందం కూడా విడుదలకు ముందే లీక్ అయింది. రష్మిక మందన్న, విజయ్ దేవరకొండ జంటగా నటించిన ఈ సినిమాలోని కొన్ని సీన్లు, ముఖ్యంగా లిప్‌లాక్ సన్నివేశాలు సోషల్ మీడియాలో వైరల్ అయ్యాయి.

త‌ప్ప‌ని పైర‌సీ బెడ‌ద‌..

ఇంకా పెద్ద సినిమాలకు కూడా పైరసీ బెడద తప్పలేదు. దర్శక ధీరుడు ఎస్.ఎస్. రాజమౌళి తెరకెక్కించిన బాహుబలి: ది బిగినింగ్ చిత్ర షూటింగ్ సమయంలోనే కొన్ని వార్ సన్నివేశాలు లీక్ అయ్యాయి. వీఎఫ్ఎక్స్ పనుల సమయంలోనే ఈ లీక్ జరిగిందని సమాచారం.

పాతకాలంలో కూడా పైరసీ సమస్య ఉండేది. చిరంజీవి నటించిన శంకర్ దాదా ఎంబీబీఎస్ సినిమా సీడీ, డీవీడీ రూపంలో పైరసీ బారిన పడింది. అలాగే మహేష్ బాబు, పవన్ కల్యాణ్ సినిమాలు కూడా ఆ సమయంలో పెద్దఎత్తున పైరసీకి గురయ్యాయి.

పెద్ద హీరోల సినిమాలు కూడా..

ఇటీవలి కాలంలో కూడా పరిస్థితి మారలేదు. అల్లు అర్జున్ నటించిన పుష్ప: ది రైజ్ సినిమా సన్నివేశాలు ఆన్‌లైన్‌లో లీక్ అయ్యాయి. అలాగే ఎన్టీఆర్ నటించిన అరవింద సమేత వీర రాఘవ, రామ్ చరణ్ నటించిన ఎవడు చిత్రాలు కూడా పోస్ట్ ప్రొడక్షన్ దశలో లీక్ సమస్యను ఎదుర్కొన్నాయి.

ఈ ఘటనలన్నీ సినిమా పరిశ్రమలో పైరసీ ఎంత పెద్ద సమస్యగా ఉందో మరోసారి చూపిస్తున్నాయి. భారీ బడ్జెట్ సినిమాలకు ఇది పెద్ద ముప్పుగా మారుతోంది. సాంకేతిక పరిజ్ఞానం పెరిగిన కొద్దీ లీక్‌లను అరికట్టడం కష్టమవుతున్నప్పటికీ, నిర్మాతలు, టెక్నికల్ టీమ్స్ మరింత జాగ్రత్తలు తీసుకోవాల్సిన అవసరం ఉందని సినీ వర్గాలు అభిప్రాయపడుతున్నాయి.