ట్రంప్ ఈవెంట్‌లో కాల్పులు.. ‘అంతా డ్రామా’ అంటూ సోషల్ మీడియాలో రచ్చ!

అమెరికాలో ట్రంప్ హాజరైన ఈవెంట్‌లో కాల్పుల కలకలం రేగింది. వెంటనే ఇది 'ట్రంప్​ గ్యాంగ్​​ ఆడిన డ్రామా' అంటూ సోషల్ మీడియాలో పోస్టులు వైరల్ అయ్యాయి.

ట్రంప్ హాజరైన డిన్నర్ కార్యక్రమంలో ఘటన తర్వాత అప్రమత్తమైన సీక్రెట్ సర్వీస్ సిబ్బంది

Trump Event Shooting Sparks ‘All Drama’ Storm On Social Media

• ట్రంప్ హాజరైన కార్యక్రమంలో కాల్పుల కలకలం
• భద్రతా సిబ్బంది వెంటనే ట్రంప్‌ను తరలింపు
• staged, false flag అంటూ పోస్టుల వెల్లువ
• అసలు నిజంపై అధికారులు దర్యాప్తు

ట్రంప్ ఈవెంట్‌లో కాల్పులు..  సోషల్ మీడియాలో పోస్టుల హోరు

అమెరికా అధ్యక్షుడు డొనాల్డ్ ట్రంప్ హాజరైన కార్యక్రమంలో కాల్పుల ఘటన తీవ్ర కలకలం రేపింది. వాషింగ్టన్‌లో జరిగిన ఈవెంట్‌లో ఒక్కసారిగా కాల్పుల శబ్దాలు వినిపించడంతో అక్కడున్న వారంతా భయాందోళనకు గురయ్యారు. ట్రంప్‌ను భద్రతా సిబ్బంది వెంటనే సురక్షిత ప్రాంతానికి తరలించారు. ఘటన తర్వాత సోషల్ మీడియాలో మాత్రం ఇంకో యుద్ధం మొదలైంది.

ఎలా జరిగింది?

కాల్పుల శబ్దాలతో భయాందోళనకు గురైన అతిథులు టేబుళ్ల కింద ఆశ్రయం పొందిన దృశ్యం

వాషింగ్టన్ హిల్టన్ హోటల్‌లో జరిగిన కార్యక్రమానికి ట్రంప్‌తో పాటు పలువురు ప్రముఖులు, మీడియా ప్రతినిధులు హాజరయ్యారు. ఈ సమయంలో ఓ అనుమానితుడు భద్రతా వలయాన్ని దాటి లోపలికి రావడానికి ప్రయత్నించినట్లు అధికారులు తెలిపారు. అతని వద్ద ఆయుధాలు లభించాయని సమాచారం. ఒక భద్రతా సిబ్బందిపై కాల్పులు జరిపినట్లు అమెరికా మీడియా వెల్లడించింది. వెంటనే అతడిని అదుపులోకి తీసుకున్నారు.

సోషల్ మీడియాలో ఎందుకు రచ్చ?

ఘటన జరిగిన కొద్ది నిమిషాల్లోనే X, ఫేస్‌బుక్, టిక్‌టాక్ వంటి సామాజిక మాధ్యమాల్లో వేలాది పోస్టులు వెల్లువెత్తాయి. “ఇది ముందే ప్లాన్ చేసిన డ్రామా”, “ట్రంప్‌ సానుభూతి తెచ్చుకునే ప్రయత్నం”, “false flag operation” అంటూ అనేక మంది ఆరోపణలు చేశారు. కొన్ని పోస్టులు మిలియన్ల వ్యూస్ సాధించాయి.

సోషల్ మీడియాలో ఈ ఘటనపై అనుమానాలు వ్యక్తం కావడానికి పలు కారణాలు కలిసి పనిచేశాయి. ఘటన జరిగిన కొద్ది నిమిషాల్లోనే వివిధ వీడియోలు, క్లిప్‌లు, వ్యాఖ్యలు వైరల్ కావడంతో అనేక ఊహాగానాలు మొదలయ్యాయి.

కాల్పుల ఘటన అనంతరం అనుమానితుడిని అదుపులోకి తీసుకున్న భద్రతా సిబ్బంది – Truth Social / @Donald Trump

ట్రంప్ ప్రశాంతంగా కనిపించాడన్న వాదన : ఘటన సమయంలో ట్రంప్ భయపడకుండా కనిపించాడని, నిజంగా ప్రాణహాని ఉంటే మరింత ఆందోళన కనిపించేదని కొందరు నెటిజన్లు పోస్టులు చేశారు.

భద్రతా సిబ్బంది స్పందనపై సందేహాలు : సీక్రెట్ సర్వీస్ చాలా వేగంగా, క్రమబద్ధంగా స్పందించిందని, అందుకే ఇది ముందే ప్లాన్ చేసిన చర్యలా అనిపించిందని మరికొందరు ఆరోపించారు.

లైవ్ వీడియోలు కట్ కావడం : కొన్ని లైవ్ ఫీడ్లు మధ్యలో నిలిచిపోవడం, పూర్తి దృశ్యాలు వెంటనే బయటకు రాకపోవడం వల్ల “ఏదైనా దాచిపెడుతున్నారా?” అనే అనుమానాలు వ్యక్తమయ్యాయి.

కరోలైన్ లీవిట్ వ్యాఖ్య వైరల్ : కార్యక్రమానికి ముందు వైట్ హౌస్ ప్రెస్ సెక్రటరీ కరోలైన్ లీవిట్ “there will be some shots fired tonight in the room” అని చెప్పిన వ్యాఖ్య తర్వాత మళ్లీ వైరల్ అయింది. అదే కార్యక్రమంలో తర్వాత కాల్పుల ఘటన జరగడంతో దీనిపై పెద్ద చర్చ మొదలైంది.

రాజకీయ లాభం కోణం : ఘటన అనంతరం ట్రంప్ చేసిన వ్యాఖ్యలు, పరిస్థితిని హ్యాండిల్ చేసిన తీరు కొందరికి రాజకీయంగా ఉపయోగించుకునే ప్రయత్నంలా కనిపించిందని పోస్టులు వచ్చాయి.

అధికారులు ఏమంటున్నారు?

ఈ ఆరోపణలకు ఎలాంటి ఆధారాలు లేవని అమెరికా అధికారులు స్పష్టం చేశారు. నిందితుడి వ్యక్తిగత కారణాలు, మానసిక పరిస్థితి, రాజకీయ కోపం వంటి కోణాల్లో దర్యాప్తు కొనసాగుతోందని తెలిపారు. సోషల్ మీడియాలో వస్తున్న వదంతులను నమ్మవద్దని హెచ్చరించారు.

మళ్లీ చర్చలో భద్రత

కాల్పుల సమాచారం రావడంతో వెంటనే స్పందించిన భద్రతా బృందం

ఈ ఘటనతో అమెరికాలో ప్రముఖ నాయకుల భద్రత, రాజకీయ హింస, సోషల్ మీడియా తప్పుడు ప్రచారం అంశాలు మళ్లీ చర్చకు వచ్చాయి. ట్రంప్‌కు గతంలోనూ భద్రతా ముప్పులు ఎదురైన నేపథ్యంలో ఈ సంఘటనకు మరింత ప్రాధాన్యం ఏర్పడింది.