Tea: టీ, కాఫీ తాగడం ఆపేస్తే.. ఏం జరుగుతుందో తెలుసా

భారత్‌లో చాయ్ అంటే పడి చచ్చేవారు కోకొల్లలు. ఉదయం నిద్ర లేవగానే ఒక కప్పు టీ లేదా కాఫీ తాగకపోతే రోజు మొదలవదని చాలామంది భావిస్తారు. పని ఒత్తిడిని తగ్గించుకోవడం, బద్ధకాన్ని దూరం చేసుకోవడం, తలనొప్పిని తగ్గించుకోవడం కోసం కూడా టీ తాగుతుంటారు. స్నేహితులు కలిసినప్పుడు కూడా ముందుగా టీతోనే సంభాషణ మొదలవుతుంది. అయితే, ఈ టీ వల్ల ప్రయోజనాలతో పాటు కొన్ని నష్టాలు కూడా ఉన్నాయని నిపుణులు చెబుతున్నారు. ఒక నెల పాటు టీ, కాఫీలను పూర్తిగా మానేస్తే శరీరంలో ఊహించని సానుకూల మార్పులు సంభవిస్తాయని వారు అంటున్నారు. ఆ మార్పులు ఏమిటో చూద్దాం.

మెరుగైన నిద్ర నాణ్యత: ఒక నెల రోజుల పాటు టీ, కాఫీలకు దూరంగా ఉంటే నిద్ర నాణ్యత గణనీయంగా మెరుగుపడుతుందని నిపుణులు తెలియజేస్తున్నారు. ముఖ్యంగా నిద్రలేమి సమస్య ఉన్నవారికి ఈ అలవాటు మానడం వల్ల మంచి ఫలితాలు కనిపిస్తాయి. టీ, కాఫీలకు దూరంగా ఉండటం వల్ల ఎక్కువ సమయం హాయిగా నిద్రపోవచ్చు మరియు త్వరగా నిద్రలోకి జారుకోవచ్చు. అధ్యయనాల ప్రకారం, నాలుగు వారాల పాటు ఈ పానీయాలను తాగని వారు ఎక్కువ నిద్ర సమయం మరియు మెరుగైన నిద్ర అనుభవించారు.

రక్తపోటు మరియు షుగర్ నియంత్రణ: నెల రోజుల పాటు టీ, కాఫీలను తాగడం మానేస్తే రక్తపోటు అదుపులో ఉంటుందని నిపుణులు సూచిస్తున్నారు. అలాగే, రక్తంలో చక్కెర స్థాయిలు కూడా నియంత్రణలో ఉంటాయి. ఈ పానీయాలకు దూరంగా ఉన్నవారు మునుపటి కంటే ఎక్కువ చురుకుగా మరియు శరీరంలో నీరు సమతుల్యంగా ఉన్నట్లు గమనించారు.

అధికంగా టీ తాగడం వల్ల గ్యాస్, అజీర్ణం వంటి సమస్యలు తలెత్తుతాయి, కానీ నెల రోజుల పాటు టీ మానేస్తే ఈ సమస్యలు తగ్గుతాయి. అంతేకాదు, దంతాల పసుపు రంగు సమస్య కూడా తగ్గుతుంది. ఈ మార్పులు శరీర ఆరోగ్యానికి ఎంతగానో ఉపయోగపడతాయని, కనుక ఒక నెల పాటు టీ, కాఫీలకు దూరంగా ఉండి ఈ ప్రయోజనాలను పొందవచ్చని నిపుణులు సలహా ఇస్తున్నారు.