BRS demands| కాంగ్రెస్ ప్రభుత్వంలోని కుంభకోణాలపై విచారణ జరిపించండి : బీఆర్ఎస్ఎల్పీ

రెండున్నరేళ్ల కాంగ్రెస్ ప్రభుత్వంలో జరిగిన 20 అతి భారీ కుంభకోణాలపై సిట్టింగ్ జడ్జితో విచారణ చేయాలని, హౌస్ కమిటీ వేయాలని డిమాండ్ చేస్తూ బీఆర్ఎస్ శాసన సభా పక్షం సీఎం రేవంత్ రెడ్డికి లేఖ రాసింది.

విధాత, హైదరాబాద్ : రెండున్నరేళ్ల కాంగ్రెస్ ప్రభుత్వంలో జరిగిన 20 అతి భారీ కుంభకోణాలపై సిట్టింగ్ జడ్జితో విచారణ చేయాలని, హౌస్ కమిటీ వేయాలని డిమాండ్ చేస్తూ బీఆర్ఎస్ శాసన సభా పక్షం సీఎం రేవంత్ రెడ్డికి లేఖ రాసింది. . లెక్కకు మించిన కుంభకోణాలు వరుసగా బయటపడుతుండటం మాత్రమే కాకుండా.. స్వయంగా మంత్రులు, ప్రజాప్రతినిధుల ప్రమేయంతో ఈ అక్రమాలు జరుగుతున్నాయనే ఆరోపణలు ప్రజల్లో తీవ్ర ఆగ్రహాన్ని రేకెత్తిస్తున్నాయని లేఖలో  బీఆర్ఎస్  ఎమ్మెల్యేలు తెలిపారు. రెండున్నరేళ్ల పాలనా వ్యవధిలో ప్రభుత్వ యంత్రాంగంపై ప్రజలు ఉంచిన నమ్మకాన్ని పూర్తిగా చెరిపేశారని ఆరోపించారు.

ఈ కుంభకోణాల ఫలితంగా వేల కోట్ల రూపాయల ప్రజాధనం కొద్దిమంది చేతుల్లోకి వెళ్లిపోతుండగా.. సామాన్య ప్రజలకు అందాల్సిన సంక్షేమం, అభివృద్ధి పూర్తిగా దెబ్బతింటోందని బీఆర్‌ఎస్‌ ఎమ్మెల్యేలు తెలిపారు. అవినీతిని అరికట్టడంలో కాంగ్రెస్‌ ప్రభుత్వం పూర్తిగా విఫలమైందనే విషయం కుండబద్ధలు కొట్టినట్లుగా స్పష్టమైందనన్నారు. ఈ పాలన నియంత్రణ లేకుండా సాగుతున్న ఈ దోపిడీని చూస్తే.. ఇది నిర్లక్ష్యమా? లేక మీ ప్రోత్సాహమా అన్న అనుమానం ప్రజల్లో మరింత బలపడుతోందని తెలిపారు.

అవినీతి, కుంభకోణాలపై లేఖ రాస్తే విచారణ జరుపుతామని శాసనసభలో స్వయంగా మీరే ప్రకటించినందునా.. మీ పాలనలో జరిగిన కుంభకోణాల వివరాలను ఈ లేఖలో అందిస్తున్నామని బీఆర్‌ఎస్‌ ఎమ్మెల్యేలు తెలిపారు. మీ మాటపై మీకు ఏ మాత్రం చిత్తశుద్ధి ఉన్నా ఈ కుంభకోణాలపై సిట్టింగ్‌ జడ్జితో విచారణ జరిపించాలని కోరారు. ఈ కుంభకోణాల్లో ప్రమేయం ఉన్న వాళ్లపై కఠిన చర్యలు తీసుకోవాలని, ప్రజాధనాన్ని రికవరీ చేయాలని బీఆర్‌ఎస్‌ ఎమ్మెల్యేలు డిమాండ్‌ చేశారు.

లేఖలో పేర్కొన్న స్కామ్ ల వివరాలు :

1. సివిల్ సప్లై స్కామ్
2. అమృత్ టెండర్ల స్కామ్
3. కేఎల్ఎస్ఆర్ స్కామ్
4. నైనీ కోల్ బ్లాక్ – సింగరేణి స్కామ్
5. సింగరేణి ఓబీ స్కామ్
6. సోలార్ పవర్ స్కామ్
7. ఎన్టీపీసీ థర్మల్ పవర్ స్కామ్
8. హెచ్సీయూ భూముల స్కామ్
9. లగచర్ల ల్యాండ్ స్కామ్
10. కోటి ఎకరాల భూమి నిషేధిత జాబితా స్కామ్
11. ఎక్సైజ్ మైక్రో బ్రూవరీ స్కామ్
12. హమ్ రోడ్స్ స్కామ్
13. టీడీఆర్ స్కామ్
14. యంగ్ ఇండియా స్కూల్స్ స్కామ్
15. ఫోర్త్ సిటీ స్కామ్
16. హిల్ టీపీ స్కామ్
17. అక్రమ మైనింగ్ స్కామ్
18. డెక్కన్ సిమెంట్స్ స్కామ్
19. మంచి రేవుల దేవాదాయ భూముల స్కామ్
20. హ్యామ్ రోడ్ల టెండర్ల స్కామ్.