దేశమంతా రామమయం.. ఆంధ్రప్రదేశ్ దొంగలమయం

దేశమంతా రామ మయం అయిపోతే.. ఆంధ్రప్రదేశ్ అంతా దొంగలమయం అయిపోయిందని బీజేపీ అధికార ప్రతినిధి భానుప్రకాష్ ఎద్దేవా చేశారు

• దొంగఓట్లపై న్యాయం జరిగే వరకూ పోరాడుతాం
  
• బీజేపీ అధికార ప్రతినిధి భానుప్రకాష్
  

విధాత, విజయవాడ: దేశమంతా రామ మయం అయిపోతే.. ఆంధ్రప్రదేశ్ అంతా దొంగలమయం అయిపోయిందని బీజేపీ అధికార ప్రతినిధి భానుప్రకాష్ ఎద్దేవా చేశారు. విజయవాడలో శుక్రవారం ఆయన మీడియాతో మాట్లాడారు. దొంగ ఓట్లు, కరెన్సీ నోట్లతో ఎన్నికల్లో గెలవాలని అధికార పార్టీ పన్నాగాలు పన్నుతోందని విమర్శించారు. నకిలీ ఎపిక్స్ కార్డులపై రాష్ట్ర వ్యాప్తంగా దర్యాప్తు చేపట్టాలని ఆయన డిమాండ్ చేశారు. ఈ అక్రమాల బాగోతంలో అధికారులను సస్పెండ్ చేసి చేతులు దులుపుకున్న ప్రభుత్వం.. దీని వెనుక ఉన్న పెద్దలను కూడా శిక్షించాలని కోరారు.

నకిలీ ఎపిక్స్ కార్డులపై నిజాయితీగా దర్యాప్తు చేపడితే.. అప్పటి ఎన్నికల్లో ఎన్నికైన అధికార పార్టీ నేతలు తమ పదవికి అనర్హులవుతారని అన్నారు. దొంగ ఓట్లు, కరెన్సీ నోట్లనే నమ్ముకుని వైసీపీ ఈ ఎన్నికల్లో అధికారంలోకి రావాలని చూస్తున్నట్లు అర్థమవుతోందని చెప్పారు. తిరుపతి లో 34 వేలకు పైగా ఎపిక్ కార్డులు డౌన్ లోడ్ చేసుకోవడం వైసీపీ అక్రమాలను తేటతెల్లం చేస్తున్నదని తెలిపారు. కేంద్ర ఎన్నికల సంఘానికి బీజేపీ అధ్యక్షురాలు పురంధేశ్వరి ఫిర్యాదుతోనే బట్టబయలైందన్నారు. ఈ కేసును పోలీసులు పక్కదారి పట్టించే ప్రయత్నం చేస్తున్నారని ఆరోపించారు.

ఇప్పటికే తిరుపతి ఎస్పీని కలిసి ఫిర్యాదు చేశామని, నిష్పక్షపాతంగా విచారించాలని కోరినట్లు పేర్కొన్నారు. ఏపీలో ఐపీసీ సెక్షన్లు పని చేయడం లేదు.. వైసీపీ సెక్షన్లు పని చేస్తున్నాయని సెటైర్ వేశారు. దొంగఓట్ల వ్యవహారంలో న్యాయం జరిగే వరకు బీజేపీ పోరాటం చేస్తుందని స్పష్టం చేశారు. ఒక్క తిరుపతిలోనే 34వేల దొంగ ఓట్లు ఉంటే.. ఇతర నియోజకవర్గాల్లో వెలుగులోకి రావాల్సి ఉందన్నారు. తిరుపతి ఎంపీని అనర్హుడిగా ప్రకటించి తొలగించాలని డిమాండ్ చేశారు.

అభివృద్ధిలేని ఆంధ్రప్రదేశ్ లో మనం ఉన్నామని… అవినీతి ప్రదేశ్ గా, అరాచక ప్రదేశ్ గా, అప్పుల ప్రదేశ్ గా, అంధకార ప్రదేశ్ గా మార్చిన ఘనత జగన్ కే దక్కుతుందని దుయ్యబట్టారు. మైనింగ్, వైన్, ఇసుకలో అంతా దోపిడీనే అని.. వైసీపీలో ఉన్న వారంతా దొంగలే అన్న విధంగా నేడు ప్రజల్లో భావన ఉందని చెప్పారు. ఎమ్మెల్యేల సీటు మార్చినా, ఎంపీ సీటు మార్చినా రాష్ట్రానికి ఒరిగేదేమీ లేదని, ఏపీ ప్రజలు ముఖ్యమంత్రినే మార్చాలని నిర్ణయం తీసుకున్నట్లు తెలిపారు. ఎమ్మెల్యేల పని తీరుపై సర్వేలు కాదు… సీఎం పని తీరుపై సర్వే చేయిస్తే కనీసం పాస్ మార్కులు కూడా రావంటూ విమర్శలు చేశారు.