Traffic Challan Rules India | ట్రాఫిక్​ చలాన్లు ఇక ప్రమాదకరం : కొత్త రూల్స్​ రాబోతున్నాయి జాగ్రత్త!

మోటారు వాహన చట్టంలో కేంద్రం కీలక సవరణలు చేసింది. చలాన్ జారీ విధానం పూర్తిగా డిజిటల్, ఐదు ఉల్లంఘనలకే లైసెన్స్ సస్పెన్షన్, చెల్లింపుకు 45 రోజుల గడువు. తరవాత బండి కూడా జప్తు

India’s New Motor Vehicles Rules 2025: Digital Challans, 45-Day Deadline, Licence Suspension and vehicle seize

• మోటారు వాహన నియమాల్లో కొత్త సవరణలు
• చలాన్ ప్రక్రియలో డిజిటల్ మార్పులు
• ఐదు సార్లు ఉల్లంఘన జరిగితే లైసెన్స్​ రద్దు – బండి జప్తు
• వాహనం నడిపినవారిపైనే కేసులు – ఓనర్లపై కాదు

న్యూఢిల్లీ, అక్టోబర్ 5 (విధాత‌): Traffic Challan Rules India | రోడ్డు భద్రతను పెంచే దిశగా కేంద్ర ప్రభుత్వం మరో ముందడుగు వేసింది. మోటారు వాహన నియమాల్లో కీలక మార్పులు చేస్తూ, ట్రాఫిక్ ఉల్లంఘనలపై చలాన్ జారీ మరియు చెల్లింపు విధానాన్ని పూర్తి డిజిటల్‌గా మార్చే ప్రతిపాదన తీసుకువచ్చింది. సెప్టెంబర్ 29న విడుదల చేసిన ముసాయిదా నోటిఫికేషన్ ప్రకారం, ప్రజల అభ్యంతరాలు, సూచనలు స్వీకరించడానికి 30 రోజుల గడువు ఇచ్చారు. ఆ తరువాతే ఈ నిబంధనలకు తుది రూపం తెస్తారు. ఈ మార్పులు డ్రైవర్లు, వాహన యజమానులకు అత్యంత కఠినతరం కానున్నాయి. ఈ నిబంధనల వల్ల రోడ్డు ప్రమాదాలు తగ్గి, నియమాల అమలు మరింత కఠినంగా, సమర్థవంతంగా జరుగుతాయని అధికారుల అంచనా.

కేంద్ర రోడ్ ట్రాన్స్‌పోర్ట్ అండ్ హైవేస్ మంత్రిత్వశాఖ (MoRTH) ఈ ముసాయిదాను మోటార్ వాహన చట్టం, 1989లోని వివిధ సెక్షన్ల ఆధారంగా సిద్ధం చేసింది. దీన్ని ఇప్పటికే అధికారిక రాజపత్రంలో ప్రచురించారు. అభ్యంతరాలు లేదా సూచనలు comments-morth@gov.in ఈమెయిల్‌ ద్వారా లేదా ట్రాన్స్‌పోర్ట్ భవన్, పార్లమెంట్ స్ట్రీట్, న్యూఢిల్లీ చిరునామాకు పంపవచ్చని పేర్కొన్నారు. ప్రజల అభిప్రాయాల తర్వాతే ఇది తుది రూపంలో అమలులోకి వస్తుంది.

డ్రైవర్లకు కొత్త హెచ్చరిక: ఐదు ఉల్లంఘనలు – లైసెన్స్‌ రద్దు

డ్రాఫ్ట్ నిబంధనల్లో అత్యంత ముఖ్యమైన మార్పు డ్రైవింగ్ లైసెన్స్‌లకు సంబంధించినది. 1989 మోటారు వాహన నియమాల్లోని నియమం 21(1)లో కొత్త నిబంధన (25) చేర్చనున్నారు. దాని ప్రకారం, ఒక డ్రైవర్‌ చలాన్‌ చరిత్రలో ఐదు లేదా అంతకంటే ఎక్కువ సార్లు ట్రాఫిక్‌ నిబంధనలను ఉల్లంఘించినట్లయితే, అతని లైసెన్స్‌ను సస్పెండ్ చేయవచ్చు లేదా రద్దు చేయవచ్చు. “ఇది పదేపదే నియమాల ఉల్లంఘన చేసే డ్రైవర్లకు గట్టి హెచ్చరిక” అని ట్రాఫిక్ అధికారులు వ్యాఖ్యానిస్తున్నారు. ప్రభుత్వ సమాచారం ప్రకారం, దేశంలో రోడ్డు ప్రమాదాల్లో 70% ఘటనలకు ట్రాఫిక్ నిబంధనల ఉల్లంఘనే కారణం. కాబట్టి ఈ మార్పుతో డ్రైవర్లు మరింత జాగ్రత్తగా నడపాల్సి వస్తుందని నిపుణుల అంచనా.

చలాన్ ప్రక్రియలో డిజిటల్ విప్లవం: నేరుగా కెమెరాల నుంచే ఆటోమేటిక్ చలాన్లు

ప్రస్తుతం ఉన్న నిబంధన 167ను పూర్తిగా సవరించి, చలాన్ జారీ విధానంలో డిజిటల్ మార్పులు చేస్తున్నారు. ఇకపై ట్రాఫిక్ పోలీసులు లేదా రాష్ట్ర ప్రభుత్వ అధికృత అధికారి భౌతిక లేదా ఎలక్ట్రానిక్ రూపంలో చలాన్ ఇవ్వవచ్చు. పాత విధానంలో ఉన్న ఆలస్యాన్ని తగ్గిస్తూ, ఇప్పుడు డిజిటల్ మానిటరింగ్ కెమెరాల ద్వారా ఆటోమేటిక్ చలాన్లు (Auto-Generated Challans) జారీ అవుతాయి.

డెలివరీ టైమ్: ఉల్లంఘన జరిగిన 15 రోజుల్లో పోస్ట్ ద్వారా లేదా 3 రోజుల్లో SMS/ఈమెయిల్ ద్వారా చలాన్ అందుతుంది. రికార్డింగ్ సిస్టమ్: అన్ని చలాన్ వివరాలు కేంద్ర పోర్టల్‌లో క్రమానుసారంగా నిక్షిప్తం అవుతాయి.

చెల్లింపు గడువు: చలాన్ వచ్చిన 45 రోజుల్లో అపరాధ రుసుము చెల్లించాలి లేదా ఆన్‌లైన్‌లో సాక్ష్యాలతో సవాలు చేయాలి. వివాదం లేకపోతే – చలాన్ అంగీకరించబడినట్లుగా పరిగణిస్తారు. ఆ తర్వాత 30 రోజుల్లో ఆన్‌లైన్ లేదా ఆఫ్‌లైన్‌గా చెల్లించాలి. ఒకవేళ ఆరోపించబడిన అపరాధంపై వివాదం జరిగితే, రాష్ట్ర ప్రభుత్వం నిర్దేశించిన అధికారి 30 రోజుల్లో తీర్పు ఇవ్వాలి. తీర్పు రాకపోతే చలాన్ చెల్లదు. తిరస్కరించితే, 50% డిపాజిట్ చేసి కోర్టుకు వెళ్ళవచ్చు.

చెల్లించకపోతే 15వ రోజు నుంచి రోజువారీ SMS రిమైండర్లు వస్తాయి. చివరికి ఆ వాహనాన్ని ‘Not to be Transacted’గా గుర్తించి, రిజిస్ట్రేషన్ లేదా లైసెన్స్ అప్‌డేట్‌ సదుపాయాలు బ్లాక్ చేస్తారు. కోర్టు ఆదేశం లేకుండా కూడా వాహనం జప్తు చేసే అధికారం ఉంటుంది.

ఈ-చలాన్ నిబంధనల్లో కొత్త మార్పులు: డ్రైవర్​కే శిక్ష – ఓనర్​కు కాదు

నెట్‌వర్క్ కనెక్టివిటీ లేని ప్రాంతాల్లో ఆఫ్‌లైన్ రిపోర్ట్ నమోదు చేయవచ్చు. చలాన్ రిజిస్టర్డ్ వాహన యజమాని పేరుతో 3 రోజుల్లో జారీ అవుతుంది. SMS లేదా ఈమెయిల్ రూపంలో 3 రోజుల్లో, పోస్ట్ ద్వారా 15 రోజుల్లో నోటీసు అందుతుంది. చెల్లింపులు రాష్ట్ర ప్రభుత్వ పోర్టల్, ట్రాఫిక్ పోలీస్ స్టేషన్లు లేదా ఈ-చలాన్ గేట్‌వే ద్వారా చేయవచ్చు. ఎలక్ట్రానిక్ రికార్డులు కేసు పూర్తయ్యే వరకు భద్రపరచాలి. ముఖ్యంగా, ఉల్లంఘన సమయంలో వాహన యజమాని డ్రైవ్ చేయలేదని నిరూపిస్తే, అతను నిరపరాధిగా క్లెయిమ్ చేసుకునే అవకాశం ఉంటుంది.  అన్ని రకాల ఉల్లంఘన కేసులు ఆ సమయంలో వాహనం నడిపినవారికే వర్తిస్తాయి. “ఇది యజమానులకు రక్షణ కల్పించే మార్పు” అని న్యాయ నిపుణులు చెబుతున్నారు.

మొత్తం మీద, ఈ సవరణలు భారతదేశ ట్రాఫిక్ వ్యవస్థను క్రమశిక్షణ, పారదర్శకత, సాంకేతికతతో మిళితం చేసే కీలక అడుగుగా మారనున్నాయి. ప్రజలు తమ సూచనలు త్వరగా పంపాలని మంత్రిత్వశాఖ కోరింది. మరిన్ని వివరాలకు కింద ఇవ్వబడిన అధికారిక గెజిట్​ను పిడిఎఫ్​ రూపంలో పొందవచ్చు.